Сабақтың тақырыбы: Мамандық таңдау – болашақты таңдау

 

ТІЛДЕСІМ

   1-тапсырма. Сұрақтарға жауап беріңіздер:

1. Сіздің болашақ мамандығыңыз қандай?

2. Бұл мамандықты не себепті таңдадаңыз?

3. Мамандығыңыз бойынша қай салада жұмыс істеуге болады?

4. Сіз оқитын факультет тағы қандай мамандықтар дайындайды?

5. Мамандықтың қандай түрлері қазіргі заманға қажет?

6. Білімді маман болу үшін не істеу керек?

7. Білім мен ғылымды дамыту үшін не қажет?

 

   2-тапсырма. Ой қозғау: Мамандық дегеніміз не? (Топтастыру әдісі арқылы)

Топтастыру.

 

 

ОҚЫЛЫМ

   3-тапсырма. Мәтінді оқып, мазмұндаңыздар:

«Мамандық» сөзі латын тілінен шыққан, «жұрт алдында сөйлеу, жариялау» дегенді білдіреді. Мамандық – қандай да бір дайындықты, жауапкершілікті талап ететін еңбек қызметінің маңызды бөлігі.

Өмірде мамандықтың түрі өте көп. Жақсы маман болу үшін еңбек ету керек. Инженер, дәрігер, мұғалім, ғалым, жазушы, тілші, жорналшы, мүсінші, суретші, сәулетші, экономист, есепші, ұшқыш, ғарышкер болу үшін оқу керек. Жақсы жұмысшы, кенші, металлург, жүргізуші, балташы, құрылысшы, тоқымашы, тігінші, болу үшін өндірісте істеу керек. Бақташы, егінші, мал дәрігері, бағбан, сауыншы, мақташы болу үшін ауылда жұмыс істеу керек. Ал аяқ киім жөндеуші, сатушы, шаштараз, сағат шебері, зергер болу үшін тұрмыстық қызмет көрсететін салада істеу керек. Өнер саласына жататын мамандықтар: әнші, биші, музыкант, композитор, режиссер, т.б. (Қазақ тілі. Ш. Бектұров, А. Бектұрова)

ЖАЗЫЛЫМ

   4-тапсырма. Кестедегі сөздерді пайдаланып, сөйлем құраңыздар:

Шопан, малшы, тоқымашы, аспаз, жақсы маман, балташы, дәрігер, мұғалім, бағбан, суретші, мүсінші, балықшы, тілші, ұшқыш, сатушы, егінші, сауыншы, кенші, ғалым, құрылысшы, жұмысшы, мал дәрігері, инженер, агроном, геолог	өте қиын және керекті жұмыс
	болу үшін	ауылда тұру керек жұмыс істеу керек оқу керек еңбек ету керек мамандық алу керек
	менің мамандығым, сіздің мамандығыңыз, біздің мамандығымыз, олардың мамандығы

   5-тапсырма. Суреттердегі мамандық иелерінің қандай істермен айналысатыны туралы жазыңыздар:

Үлгі: Зергерлік – әшекейлі бұйым жасау өнері, бұл өнер түрімен айналысатын адамдарды зергер деп атайды. Зергер – сәндік бұйымдарды зерлеп, айшықтап жасаушы шебер, ұста.

АЙТЫЛЫМ

   6-тапсырма. «Кім жылдам?» ойыны. Шарты: мамандықтың барлық түріне бір-бірден сөйлем құрап айтыңыз.

Үлгі: 1. Айжан – тәрбиеші.

2. Әкем – тәжірибелі мұғалім.

3..............................................

4..............................................

5..............................................

6..............................................

7..............................................

   7-тапсырма. Мақал-мәтелдердің мәнін түсініңіздер:

1) Ұстаздан шәкірт озар.

2) Білімді өлсе, қағазда аты қалар, ұста өлсе, істеген заты қалар.

3) Ақыл көпке жеткізер, өнер көкке жеткізер.

4) Білімдіге дүние жарық, білімсіздің күні кәріп.

   8-тапсырма. Жұмбақты шешейік:

1. Арманы бала оқыту, зердеге білім тоқыту. Бұл кім?

2. Сан кірпішті қалады, зәулім үйлер салады. Бұл кім?

3. Дәрі-дәрмек береді, аурудың әртүрлі дауасын тауып береді. Бұл кім?

4. Қара қылды қақ жарған, «Әділдік» - оның ұраны. Бұл кім?

5. Арманы оның көп екен, серігі көлік, жол екен. Бұл кім?

 

№10-СОӨЖ тапсырмалары:

   1. Мәтінді оқып, мазмұндаңыз. Мәтінге ат қойыңыздар:

КСРО Министрлер Кеңесінің Қаулысымен 3 қазан 1957 жылы Ақмола қаласында құрамында агрономия, ауыл шаруашылығын механикаландыру және жерге орналастыру факультеттері бар ауыл шаруашылығы институты ұйымдастырылды. Қазақстан Республикасы Үкіметінің Қаулысымен 1996 жылы 7 мамырда Ақмола ауылшаруашылығы институты Ақмола аграрлық университеті болып қайта ұйымдастырылып, қоғам және мемлекет қайраткері Сәкен Сейфуллин есімі берілді.

    Қазіргі кезде Сәкен Сейфуллин атындағы Қазақ агротехникалық университеті – Қазақстан астанасының бірінші жоғары оқу орны, Қазақстандағы ең ірі білім және ғылым орталықтарының бірі.

    57 жыл ішінде білім ордамыз Қазақстанның алыс және жақын шет елдердің аграрлық секторларында, халық шаруашылығының түрлі салаларында жемісті еңбек етіп жатқан 55 мыңнан астам мамандар дайындады.Бүгінгі күнде университет түлектері Қазақстан Республикасының және еліміздің елордасы - Астана қаласының құрылысына тікелей ат салысып отыр. Олардың ішінде ерен еңбектері үшін үкіметтік марапаттауларға ие болған Министрлер, Президент аппараты мен Премьер –Министрдің кеңсе қызметкерлері, Парламент депутаттары, облыс, аудан және қала әкімдері, ірі кәсіпорын жетекшілері, елшілер, көрнекті ғалымдар, үлкен бизнестегі адамдар бар.

    Қазіргі кезде университеттің 43 кафедрасында 650-ден аса оқытушы, соның ішінде 353-тен аса ғылым кандидаты мен ғылым докторы оқу-ғылым және тәрбие сапасын үнемі арттыру жолында еңбек етеді.Университеттің 8 факультетінде 10000-ға жуық студент жаратылыс ғылымдары, әлеуметтік ғылымдар және бизнес, гуманитарлық, техникалық, ауылшаруашылық, білім беру ғылымдары болып жіктелетін мамандықтар тобы бойынша 37 бакалавриат, 24 магистратура, 6 PhD докторантура мамандықтары бойынша білім алуда. Сонымен қатар 5 бакалавриат, 3 магистратура мамандықтары бойынша көптілді оқу үрдісі жүзеге асырылуда.

Университет бүгінде көптеген көрсеткіштер бойынша елорданың ғана емес, жалпы еліміздің білім ордалары арасында көшбасшы болып табылады, ол еліміздің отыз техникалық оқу орындарының арасында үздік үштік қатарында.Оқу орны еліміздің білім-ғылым саласында ғана емес, шетелдік білім кеңістігінде жоғары беделге ие. Ресей, АҚШ, Германия, Франция, Түркия, Италия, Израил, Қытай, Моңғолия, Малайзия, Чехия, Польша т.б. елдердің бірқатар білім және ғылым орталықтарымен тығыз байланыста жұмыс істейді.

    Университетте оқу үдерісін қазіргі заман деңгейінде ұйымдастыруға мүмкіндік беретін 11 оқу ғимараты, жастар орталығы, ақпараттық технологиямен оқыту орталығы, 40 компьютерлік класс, шаруашылық есеп тәжірибеcі стансасы, 7 студенттік жатақхана, оқу -өндірістік шеберхана, 900 мыңдай кітап қоры бар кітапхана, редакциялық баспа бөлімі, оқулықтар, монографиялар, оқу-әдістемелік әдебиеттер, «Ғылым хабаршысы» жорналы мен «Менің университетім» газеті басылып шығарылатын баспахана бар.

Қазақстан Республикасының 30 техникалық жоғары оқу орындарының арасынан ІІІ орынға ие болды.Университеттің қоғамдық кәсіптер факультетінің 7 бөлімі жұмыс істейді. Онда студенттер таңдаған мамандығымен қатар түрлі бағыттағы шығармашылық таланттарын шыңдай алады.

    Университеттің спорт клубында 18 секция: қазақша күрес, ауыр атлетика, футбол, баскетбол т.б. жұмыс істейді.Студенттер сонымен қатар әскери дайындықтан өтіп, мотоатқыштар және әскери автомобиль түрлері бойынша лейтенант атағын алады.

QS агенттігінің зерттеулері бойынша ҚазАТУ 601+ әлем университеттерінің рейтингіне 8 қазақстандық университеттің бірі болып енді.