V л е к ц и я: Коми кыв урок. Грамматика, гижанног

 

1. Урок дорö корöмъяс.

2. Урок сикасъяс.

3. Коми кыв уроклöн тэчас.

 

1. Коми кыв урок дорö корöмъяс:

1) Урок вылын юргö мича, озыр, литературнöй коми кыв – гижöда да гижöдтöм, уна сикас жанра художественнöй текстъяс. Велöдысьлöн вомгора сёрниыс выразительнöй, стöч да лоö примерöн челядь сернилы.

2) Текстöвöй материал бöрйöма сiдзи, мед сiйö тöдмöдiс челядьöс коми йöзкöд, культуракöд, история да этнографиякöд да сöвмöдiс интерес коми кыв да олöм дорö.

3) Челядьöс велöдiгöн пыдди пуктыны кыв наука юкöнъяс костысь йитöдъяс – лексика, фонетика, морфология, синтаксис, графика, гижанног, мед кывйö велöдöм мунiс комплекснöя. Кывсикас велöдiгöн шыöдчыны морфемика дорö, мед петкöдлыны, мыйöн петкöдлыссьö кадакывлöн колян кад, донъявны, сёрникузяса кутшöм юкöдöн лоö сiйö, тöдмавны кыввор (лексика) вежöртассö да стöчмöдны гижанног.

4) Быд урок вылын колана ногöн аддзыны лöсялана пай теория да практика костысь. Теория – сiйö кывйысь понятиеяс, определениеяс, законъяс, правилöяс, модельяс, кывкöртöдъяс, а практика – тайö сёрни – гижöда да гижöдтöм. Сёрнилöн став формаясыс – кывзöм, лыддьöм, висьталöм, гижöм, а сiдзжö гижанног, каллиграфия лоöны практика юкöнöн.

5) Вылын тшупöдö пуктöм воспитывайтан нырвизь: велöдчöм да коми кыв дорö интерес сöвмöдöм, асшöрöн уджавны велöдöм, челядьöс уджавны ышöдöм да окотитöм сöвмöдöм, челядьлысь вежöр да способностьяс сöвмöдöм, коми кыв дорö интерес сöвмöдöм.

6) Челядьлысь кыв озырмöдöм, йитöса сёрни сöвмöдöм.

7) Дидактикаысь, педагогикаысь да психологияысь выль научнöй аддзöмторъясöн вöдитчöм: сöвмöдöмöн велöдöм, личностно-ориентированнöя велöдöм, дифференцированнöй подход пыртöм, вежöрлысь уна сикаса операцияясöн удж котыртöм (синтез, анализ, абстрагирование, конкретизация, суждение, исключение, сравнение, öткодялöм, öтувтöм, аналогия, систематизация, классификация, умозаключение).

 

Урок сикасъяс

Урок позьö сикасавны торъя подувъяс серти – велöдöм материал серти, велöдан тшупöд серти, мог, велöдан метод да прием серти.

I. М.Р. Львов стöчмöдö урок сикасъяс да урокъяслысь медуна сикас торйöдö материал велöдан тшупöд серти (Львов 2002: 340).

1) Выль тема пыртан урок. Урок вылын эм выль тема либö тема юкöн пыртöм. Медбур выль материал пыртны урок заводитчöмсянь 10 минут мысти, кор челядьлöн познавательный активностьыс медыджыд. Выль материалöн тöдмасьöм унджыкысьсö мунö текстöвöй (кыв) анализ подув вылын, но тайö вермас лоны и велöдчан небöг серти асшöр удж, либö туясян (поисковöй) сяма удж ногъяс. Выль материал пырттöдз колö уськöдны тöд вылö важсö, кодi отсалас челядьлы выльсö гöгöрвоöмын.

Выль материал сетан уроклöн тэчасыс унджыкысьсö зумыд да öта-мöд бöрся тшупöдавсьö татшöм юкöнъясöн:

А) гортса удж прöверитöм;

Б) важсö тöд вылö уськöдöм (повторение);

В) выль материал пыртöм;

Г) выль материал вынсьöдöм;

Д) гортса удж сетöм;

2) Тöдöмлун, кужанлун, велалöм вынсьöдан урок (урок закрепления ЗУН).

Воддза уроквывса выль материал вынсьöдöм. Вынсьöдан урок вылын абу выль тема пыртöм, джудждаммöны тöдöмлунъяс сьöкыдджык уджъяс тшöт весьтö, босьтöм тöдöмлунъясöн мукöд, выль условиеясын вöдитчöм тшöт весьтö, асшöрöн удж вöчöм тшöт весьтö. Тöдсатор вылö челядь велöдчöны видзöдлыны неуна мöд ног, мукöд вежöр операцияяс пыр, кыдзи синтез, исключение, öткодялöм, вочаалöм, классифицируйтöм, систематизируйтöм, таблица лöсьöдöм, схема серти видлалöм. Удж мунö гижöм, лыддьысьöм, гижанног, пунктуация, сёрнитан этш сöвмöдöм вылын.

3) Повторитан да обобщайтан урок.

Урок нуöдсьö ыджыд тема либö юкöн помын. Сiйö вермö öтувтны уджтасысь öта-мöдсьыс ылын сулалан темаяс. Повторитан да обобщайтан урок кежлö челядь дасьтысьöны водзвыв, став классöн. Тайö урок вылын эмöсь уна ногöн мöдпöвйöвтöм удж сикасъяс, кутшöмкö выльтор пыртöмъяс, обобщайтан беседа, обобщайтан таблица, схема, модель лöсьöдöм, кывчукöръясöн удж, творческöй, ворсöм сяма уджъяс. Тайö вермас лоны проект дасьтöм да дорйöм, портфолио дорйöм, тема серти презентация, а сiдзжö интегрируйтöм урок.

4) Тöдöм, кужöм да велалöм донъялан урок (урок проверки знаний, умений, навыков, контрольный урок). Унджыкысьсö гижöда удж нуöдан урок, либö велöдöм тема серти контрольнöй диктант, контрольнöй изложение, либö грамматикаысь, гижанногысь гижöда материал. Вермас нуöдсьыны кыдз и урок фрагмент (20-25 мин.). Удж вöчан условиеяс чорыдöсь: быдöнлы колö петкöдлыны ассьыс тöдöм да кужанлунъяс, мед велöдысь кужис объективнöя донъявны удж да сувтöдны оценка. Уджъяс донъявсьöны öткодь корöмъяс серти.

 

II. Велöдан материал содержание боксянь урок сикасъяс: грамматика, гижанног, пунктуация, фонетика, лексикология, кыв сöвмöдан, каллиграфия, грамматика боксянь текст видлалöм вылын удж.

 

III. Метод да прием серти урок сикасъяс: списывание, диктант, öшыбка вылын удж, изложение, сочинение, текст редактируйтöм, экскурсия, проект лöсьöдан урок, проект дорйöм да мукöд.

 

3. Коми кыв уроклöн тэчас.

1) Урок заводитчöм да урок кежлö челядьлысь дасьтысьöм да внимание котыртöм.

2) Гортса удж видлалöм. Велöдысь видзöдалö челядьлысь тетрадьын вöчöм гортса удж, тöдмалö, паныдасисны-ö кутшöмкö сьöкыдлунъяс. Челядь отсöгöн тырмытöмторъяс бырöдöм, теорияысь юалöмъяс вылö вочавидзöм да карточка серти гижöда удж вöчöм могысь класс водзö петалöны 2-3 велöдчысь. Позьö гортса гижöда удж прöверитны öта-мöдкöд тетрадьöн вежсьöмöн.

Челядь вермасны вöчны гортса удж кодь жö гижöда удж, либö лöсьöдны таблица, схема, модель, кöнi тыдовтчас воддза урокысь тема гöгöрвоöм. Гортса удж прöверитöм вылö мунö 15 минутöдз.

 

3) Выль материал сетöм. Тайö уроклöн медтöдчана юкöн. Колö чукöртны став челядьлысь внимание да выль материал тöдмавны кöсйöм, мöд кывйöн кö, чужтыны на вежöрын удж дорö мотивация. Бур, лоас кö тема водзын проблемнöя юалöм, пуктöм.

Выль тема гöгöрвоöдöм вермас лоны туясян методöн, велöдысьöн гöгöрвоöдöмöн удж 2-4 классъясын тайö урок юкöныс мунö 3-7 минут, М.Львов шуö, 20 минут [Львов М.Р. 1998: 344].

4) Велöдöм тема вынсьöдöм. Вынсьöдан тшупöд вылын уджъяс колö тэчны да нуöдны öта-мöд бöрся аслыссяма пöрадокын. Вынсьöдан удж условнöя позьö юкны нёль пельö:

I. Велöдыськöд öттшöтш кыв öтьведайтöм (наблюдайтöм), мед аддзыны сэтысь выль велöдан явление, форма, свойство.

II. Асшöрöн уджалöмöн уна сикас тшöктöмъяса списываниеяс: визьнитны велöдöм форма, суффикс, гижны тырмытöм шыпас, тöдмавны вежлöг, сетны юалöм, таблица вылö видзöдöмöн тöдмавны вежлöг, морт, кад, аддзыны öтсяма юкöд, юöрпас дорö сетны юалöм.

III. Артмöдны (конструируйтны) сетöм модель (схема) серти кыв, кывтэчас, сёрникузя, артмöдны велöдан грамматика форма, а сiдзжö вочаавны либö öткодявны велöдöм сiйö жö сикаса явлениекöд: колян када кадакыв дорö вайöдны öнiя када кадакывъяс, юöртана сёрникузяысь артмöдны юаланаöс, кык прöстöй сёрникузяысь артмöдны öти тэчаса сёрникузя, сетöм сёрникузяын восьтны скобкаяс да пуктыны кыв лöсялана грамматика формаö;

IV. Творческöй уджъяс серникузяö, текстö, проектö выль велöдöм темаысь материал пыртöмöн: гижны корöм (приглашение) чуксалана сёрникузя пыртöмöн, гижны сикт йылысь сочинение ас нимъяс пыртöмöн, гижны кывбур сетöм шы тэчаса кывъяс рифмуйтöмöн (зэр – шер – чер - нэр).

4) Гортса удж сетöм. Гортса удж сетöны звöнокöдз.

 

Литература:

1. Львов М.Р. Указ. соч. 2002: 340- …

2. Зуев …

3. Львов М.Р. Указ. соч. 1998: 344.