III л е к ц и я: Коми кывйö велöдöм да велöдан технологияяс

Традиционнöя велöдöм талунъя уна педагог донъялöны кыдзи зэв гажтöм да öтсяма уджъяса метод, кöнi челядь став велöдчан уджсö вöчисны öткодя велöдысь тшöктöм серти (педагогика принуждения). Велöдан могъясöн вöлi тöдöмлунъяс сетöм (ЗУН), а абу велöдысьöс кыдзи личность сöвмöдöм.

Велöдöмын методикаысь аслыспöлöслунъяс - авторитарность:

- велöдан уджъяс öткодя да быть вöчанаöсь (принудительнöй сяма)

- удж контролируйтö да донъялö сöмын велöдысь, а оз велöдчысьяс

- велöдöм веськöдöма шöркодя велöдчысь вылö

- велöдчысь – сöмын велöдан объект, öнiя технологияяс корöны, мед велöдчысь вöлi уджын субъектöн)

- велöдысь – командир, ставыс велöдöмын мунö велöдысь тшöктöм серти

 

Традиционный методикаын тöдöмлунъяс босьтöм подуласьö

- выль тöдöмлун велöдысьöн юöртöм вылö

- петкöдлöм (образец) серти велöдöм вылö

- индуктивнöя выль тöдöмлун сетöм вылö (частичнöйсянь öтувтöмö, общöйö)

- механическöя тöд вылö пуктöмö

- кывъясöн висьталöм вылö (вербальнöй изложение)

- кывлöмтор, тöдмалöм висьталöм вылö (репродуктивное изложение)

 

Велöдчан уджын абу асшöр удж, велöдчан уджын слаб мотивация. Челядь велöдчан уджын

- велöдчан могъяс пуктö велöдысь, челядьлöн асшöрöн мог пуктöм абу

- удж планируйтöм сетöма небöгын либö велöдысьöн, велöдчысь ачыс оз лöсьöд уджалан план

- уджын дон сетö велöдысь, а оз ачыс велöдчысь [Селевеко 1998: 34-38]

Талунъя велöдöмын олöмö пырö сотрудничество, сiйö веськöдöма вылö тшупöдö велöдчысьöс кыдзи личность кыпöдöм вылö. Велöдчöм ышöдöм да тöдöмлунъяс сознательнöя босьтöм могысь паськалö проблемнöя велöдан технология. Сiйö сöвмöдö челядьлысь асшöрöн тöдöмлун босьтан да сяма кужанлунъяс, асшöрöн уджалöм. Уджын да велöдчöмын ышöданторйöн лоöны и ворсöм: ворсан урокъяс, урок фрагментъяс, ворсана уджъяс, ворсана внекласснöй мероприятиеяс.

Внекласснöй мероприятиеяс нуöдöм могысь челядь вермасны асьныс лöсьöдны проект, нуöдны да ворсны сiйöс.

Велöдчöмöн веськöдлöм да сiйöс котыртöм боксянь колö пуктыны удж торъя тшупöда сьöкыдлуна (разноуровневые) тшöктöмъяс вöчöмöн. Та могысь УМК да учитель вöзйöны челядьлы некымын удж, быд велöдчысь бöрйö сiйöс, мый сiйö сяммö вöчны велöдöм тема серти.

 

Развивающöй технологияяс

 

Талунъя методикаясын примитöм Л.В. Занковлöн, а сiдзжö Д.В. Эльконин да В.В. Давыдовлöн велöдан системаяс донъявсьöны кыдзи сöвмöдан, развивающöй системаяс. «Под развивающим обучением понимается новый, активно-деятельностный способ (тип) обучения, идущий на смену объяснительно-иллюстративному способу (типу) [Селевко 1998:181]

Сöвмöдана велöдöмын велöдчысь лоö удж вöчан субъектын, тайö технологияыс веськöдöма и вежöр, и эмоциональнöй кытш, и мортлысь мукöд качествояс сöвмöдöм вылö.

Л.В. Занков ситемаын дидактика подувъяслöн аслыспöлöслунъяс:

- теория тöдöмлунъяслöн ыджыдалöм

- вылын тшупöда сьöкыдлунъяс вылын велöдöм

- ыджыд öдöн материал велöдöм

- челядь асьныс гöгöрвоöны велöдчан процесс да могъяссö

- проблемнöя велöдан элементъяс (коллизияяс) пыртöм

- торъя тшупöда (разноуровневöй) индивидуальнöя велöдöм пыртöм

 

Методикалöн аслыспöлöслунъяс

Велöдчöмлöн шöр мотивацияöн лоö тöдöмлун дорö интерес.

Гармонизация идея корö падвежавны рациональнöй да эмоциональнöй, фактъяс да öтувтöмъяс, коллективнöй да индивидуальнöй, информация сетана да проблемнöй, гöгöрвоöдана (объяснительный) да корсяна (поисковый) методъяс.

Л.В. Занков методика серти челядь уджалöны медся уна пöлöс удж сикасъясöн, ворсöмъясöн, дискуссия методöн, а сiдзжö методъясöн, кодъяс озырмöдöны воображение, мöвпалöм, паметь, сёрни [Селевко 1998: 186- 190].

Д.Г. Эльконин да В.В. Давыдовлöн челядьöс сöвмöдан система сiдзжö веськöдö

- теория гöгöрвоöдöм да вежöр сöвмöдöм вылö

- не сöмын ЗУН сетöм вылö, но и вежöр удж ногъяс сöвмöдöм вылö

- наукаын корсьысян туйясöн тöдмöдöм да уджавны велöдöм вылö Эльконин-Давыдов системаын нöшта на вылöджык пуктыссьö велöдöмын теория тöдöмлöн тöдчанлуныс. Теория тöдöмсянь йöткыштчöны уна сикас велöдан модельясö (предметнöй, графическöй, кутшöмкö знак сикаса) да на пыр велöдчан мог олöмö пыртöмын.

Велöдан предметлöн шöр понятие сöвмö спираль схема серти – шöрсяньыс кытш дорланьыс. Шöрас понятие йылысь абстрактнöй шöр гöгöрвоöмыс, дорланьыс мунö сiйö озырмöдöм, стöчмöдöм конкретнöй примеръясöн, фактъясöн да тадзи сöвмö научно-теоретическöй понятие.

Татшöм тэчас серти выль тöдöмлун сетöм принципиальнöя торъялö традиционнöя велöдöмын линейнöя материал сетöмысь, кор тöдмасьöм мунö торъя-торъя частнöй фактъяскöд, а сэсся медбöрын нин ставыс öтувтчö да гöгöрвоöдчö кыдзи понятие, и танi оз нин вермы лоны некутшöм понятие сöвмöдöм да озырмöдöм [Селевко 1998: 194].

Татшöм подход серти медводз колö тöдмöдны став кывсикасöн, сетны понятие на йылысь, а бöрын – торъя кывсикасъясöн. Кыв состав велöдiгöн сiдзжö медводз тöдмöдны став кыв юкöн сикасöн, а бöрынджык – торъя юкöнъясöн.

Эльконин-Давыдов системаын велöдöм веськöдöма теория боксянь вежöрлысь логика сöвмöдöм вылö: велöданторйысь шöр теориялöн ыджыдалöм, дедукция, велöданторйысь рефлексия.

Эльконин-Давыдов серти велöдчан удж (учебная деятельность) – абу сiйö, мый кага участвуйтö велöдчан процессын, мыйкö вöчö урок вылын да гортын. Велöдчан удж (целенаправленная учебная деятельность) Эльконин-Давыдов серти веськöдöма челядьöн теоретическöя мöвпавны велöдчöм вылö.

Эльконин-Давыдов серти велöдчан удж веськöдöма медъёна челядьлысь вежöр сям да вежöр удж сöвмöдöм вылö, и тайö процессас кага ачыс велöдан субъектыс, и тайö уджыс сöвмöдö да вежö асьсö велöдчысьöс.