I л е к ц и я: Коми кыв велöдан методика кыдзи наука да велöдан дисциплина

Министерство образования и науки Российской Федерации

Федеральное агенство по образованию

Государственное образовательное учреждение

Высшего профессионального образования

Коми государственный педагогический институт

Прокушева Т.И.

Методика обучения коми языку в начальных классах.

Общие вопросы. Грамматика и орфография.

Учебное пособие для студентов ФПМНО.

Сыктывкар, 2008.

Министерство образования и науки Российской Федерации

Федеральное агенство по образованию

Государственное образовательное учреждение

Высшего профессионального образования

Коми государственный педагогический институт

Улыс классъясын коми кыв велöдан методика.

Шöр юалöмъяс. Грамматика да гижанног.

ФПМНО-са студентъяслы велöдчан пособие.

Сыктывкар, 2008.

Учебное пособие «Методика преподавания коми языка в начальных классах. Грамматика и орфография» подготовлено для студентов 3-4 курсов факультета педагогики и методики начального образования по специальности «Педагогика и методика начального образования» с дополнительной специальностью «Коми язык и литература в основной средней школе». Пособие содержит курс лекций (21 лекция) по основным темам названного курса по разделам «Грамматика и орфография».

Содержание

Л е к ц и я: Коми кыв велöдан методика кыдзи наука да велöдан дисциплина.

Л е к ц и я: Школаын коми кыв велöдан методъяс

III л е к ц и я: Коми кывйö велöдöм да велöдан технологияяс

IV л е к ц и я: Коми кыв кыдз и школаын велöдан предмет

V л е к ц и я: Коми кыв урок. Грамматика, гижанног.

VI л е к ц и я: Улыс классын челядьöс велöдан стандарт да уджтас.

VII л е к ц и я: Коми кыв велöдан небöгъяс.

VIII л е к ц и я: Фонетика да графика велöдöм.

IX л е к ц и я: Грамматикаысь, кыв тэчасысь да артманногысь понятие сöвмöдöм.

X л е к ц и я: Кывлысь тэчас да артманног велöдöм.

XI л е к ц и я: Кывсикасъяс велöдöм.

XII л е к ц и я: Эмакыв велöдан система.

XIII л е к ц и я: Кывберд велöдан система

X IVл е к ц и я: Кадакыв велöдöм.

XV – XVI л е к ц и я: Улыс классъясын синтаксис да пунктуация велöдöм.

XVII л е к ц и я: Улыс классъясын гижанногö велöдöм.

XVIII л е к ц и я: Гижанногö велöдан уджъяс.

XIX л е к ц и я: Гижанногысь öшыбкаяс.

XX л е к ц и я: Талунъя велöдöм дорö корöмъяс.

 

Л е к ц и я я с

 

I л е к ц и я: Коми кыв велöдан методика кыдзи наука да велöдан дисциплина.

1. Коми кыв велöдан теория да практика кыдзи наука.

2. Методика велöдан лингвистика подувъяс.

3. Коми кыв методика кыдзи велöдан дисциплина.

 

1. Коми кыв велöдан теория да практика кыдзи наука.

Методика наукалöн кык нырвизь – теория да практика, сiйö могмöдö велöдысьöс да велöдчысьясöс прикладнöй кыв велöдöмын уджалан метод, приём сикасъясöн. Теориялöн мог туявны тöдöмлун да кужöмлун сöвман процесс, сылысь законъяс, гöгöрвоны велöдан подувъяс, гöгöрвоöдны методъяс, вайöдны найöс системаö, лöсьöдны наука боксянь технологияяс, урокъяс, урок чукöръяс, донъявны налысь эффективность да с.в.

Методика наукалöн туяланторйöн (предмет) лоö челядьöс велöдiгöн коми кыв теориялöн да практикаöн велöдан процесс.

Велöдöм гöгöрвосьö кыдзи öтлаö босьтöм нёль юкöн:

А) велöданторлöн содержание

Б) велöдысьлöн удж – сыöн велöдан процесс котыртöм да материал сетöм

В) челядьлöн удж – выль тöдöмлун босьтöм, кужöмлунъясö велалöм

Г) гöгöрвоöмлöн результат - бурыс и тырмытöмторйыс

 

Методикалöн могъяс

1) Гöгöрвоны, мыйла велöдны: мыйла велöдны тайö тшупöдас, тайö школа сикасас; колö сетны тöдöм, али колö велöдны корсьысьны да вöчны открытие; велöдны предметсö динамикаын али статикаын.

2) «Мыйö велöдны?» юалöм вылö вочавидзöм: бöрйыны велöдан содержание (сюрöс), лöсьöдны уджтас, велöдчан небöгъяс, тöдчöдны тöдöмлунъяслысь минимумсö (стандарт), контроль подувъяс, тöдмавны тöдöмлунъяс, найöс донъялöм;

3) «Кыдзи велöдны?» юалöмъяс вылö корсьысьöм: корсьны уджалан методъяс да приемъяс, сетны урок сикасъяс, лöсьöдны велöдысьлы методикаысь индöдъяс да отсöгъяс, велöдчан оборудование.

4) «Мыйла тадзи, а абу мöд ног?» юалöм вылö корсьысьöм: велöдчан методъяс да содержание донъялöм, мукöд видзöласъяскöд да концепцияяскöд вочаалöм, быд методикаысь туяна да лöсяланатор аддзöм, донъялöм босьтöм.

Кыв методика видлалö разнöй тшупöдъяс вылын серни сöвмöм, лингвистика понятиеяс сöвман процесс, уджавны кужанлунъяс, кывйысь тöдöмлунъяссö. Прикладнöй методика корсьö методъяс, лöсьöдö удж сикасъяслысь системаяс, лöсьöдö уджъяс, тшöктöмъяс, правилöяс, тэчас-схемаяс, урок модельяс, беседаяс, диалогъяс.

Прикладнöй методика корсьысьö сэтшöм удж котыртан сикасъяс, мед сiйö лöсялiс талунъя олöмлы, педагогикаын корöмъяслы – тайö челядьöс сöвмöдан (развивающий) принцип, деятельностнöй подход тырвыйö олöмö пöртöм, асшöрöн уджавны велöдöм, информация корсьны велöдöм, ассьыныс тöдöм да кужанлунъяс донъявны велöдöм да мукöд, проблемнöя котыртöмöн велöдöм, личностно-ориентированный подход пыдди пуктöм.

 

Кыв методикалöн юкöнъяс

1) лыддьысьны да гижны велöдöм

2) гижанногö велöдöм

3) грамматика велöдöм

4) тöдöмлунъяс да кужöмлунъяс донъялöм

5) сёрни сöвмöдны велöдöм

 

Методика сöвман öшмöсъяс

А) велöдан опыт, традицияяс, бурджык опыт öтувтöм

Б) велöдан наукаяслöн сöвмöм: коми кыв наука, языкознание, речеведение

В) смежнöй наукаяс сöвмöм – психология, дидактика да с.в.

Г) выль аддзöм да восьтöмторъяс кыв да кыв велöдан методикаын

Д) методикаысь эксперимент, выль программаяс да системаяс лöсьöдöм

 

2. Методика велöдан лингвистика подувъяс.

Коми кыв велöдöм подуласьö коми кыв наука вылö. Методика подуласьö коми лингвистикаын наука боксянь став аддзöм-видлалöмтор вылас. Кыв наукалöн став 11 юкöныс велöдсьö школьнöй практикаын, тайö

1) лексика

2)морфология – кывсикасъяс йылысь юкöн

3) синтаксис

4) гижанног, либö орфография

5) графика - шыпасъяс да анбур йылысь юкöн

6) кывтэчас, либö кыв состав

7) кыв артманног

8) фразеология

9) лексикография, словаръяс йылысь юкöн

10) орфоэпия – шуанног йылысь юкöн

11) шыяс йылысь юкöн, либö фонетика

 

3. Коми кыв методика кыдзи велöдан дисциплина

Школаын уджавны дасьтысьöм могысь студент тöдмасьö коми кыв предмет кузя велöдан сюрöсöн (содержаниеöн), велöдан могъясöн, методъясöн, технологияясöн велöдан подувъясöн. Сiйö тöдмасьö стандартöн, уджтасöн, став учебникъясöн да содтöд учебнöй литератураöн. Студент ветлöдлö школаö, тöдмасьö талунъя школакöд, наблюдайтö ичöт класса челядьöс, налысь удж, вермöмъяс, сьöкыдлунъяс. Профессия уджö дасьтысигöн студент сюся уджалö практическöй да лабораторнöй занятиеяс вылын, дасьтö индöм тема вылö урок, удж сикасъяс, фрагмент, уроклысь конспект, петкöдлö сiйöс ёртъяс водзын (участвуйтö ролевой игра сикаса уджын), донъялö мукöдъяслысь уджсö, чукöртö методикаысь копилка уна сикаса удж формаясöн, ворсöмъясöн, занимательнöй материалöн.

Студент сюся тöдмасьö педагогикаын выль мöвпъясöн, аддзöмторъясöн,технологияясöн. Тырмымöн тöдöмлун да кужöмлун босьтöм бöрти студент вынсьöдö ассьыс профессия кежлö дасьтысьöм педпрактикаяс пыр, кöнi мукöд урокъяс да уджъясысь кындзи ачыс дасьтö да сетö коми кывйысь да литератураысь урокъяс.

И медбöрын, студент нуöдö туялана удж коми кыв, литература методикаысь да профессиональнöя дорйö сiйöс комиссия водзын. Коми кыв да литература методикаысь юалöмъяс видлавсьöны студентъяслöн научнöй конференция вылын.

 

4. Коми кыв методика велöдан туяланiнъяс да туялысьяс.

Коми кыв методика наука туялöны республикаын педагогика да методика велöдан учреждениеясын. Тайö Коми пединститут, Сыктывкарса педагогическöй колледж, велöдчысьяслысь тöдöмлунъяс сöвмöдан Коми республикаса институт, Сыктывкарса канму университет.

Улыс классъяслы коми кыв методика туялысьяс пиысь тöдчана пайыс Е.А. Меньшиковалöн, С.Д. Кановаловлöн, М.И. Сажиналöн, Е.А. Кузивановалöн, О.Изъюровалöн, Е.Г. Артемовалöн, Н.Н. да Н.Ф. Каневаяслöн, Э.И. Поляковалöн, А.А. Безносиковалöн, Н.В. Раевскаялöн, Т.И. Прокушевалöн, В.М. Грабежовалöн, О.Т. Койковалöн.