Кыдз ме винакöт дугдi тöдчыны 4 страница

— А мыля не ме ордын? — паныт юалö Егор Прохорович. Степан Матвеевич шуö:

— Внучек гöтрасьö менам и закон сьöртi пондасö овны ме ордын.

— Тэ, кум, старомоднöй морт, сэтшöм законыс важын ни абу, — чикыртiс синнэсö Егор Прохорович.

— Кыдз этö абу? Сьöвзьыны только тэнат басни вылö кольччö. Егор Прохорович лöгасис:

— Тэ, кум, родимöй пятно, капиталистическöй ляк, политика он тöд.

Степан Матвеевич паныт:

— Тэ, дона кум, увья пиня. Менам Петя — инженер и тэ ордö, сюра мöс ордö, и оградаат некöр оз пыр.

— На-ко, курччöвт! — Степан Матвеевич мыччалiс кукиш Егор Прохоровичлö. — Менчим кушмöм юрöс серавны, нем оз пет!

Вот сiдз непогодь и паськалiс.

Степан Матвеевич и Егор Прохорович пустякись лöгасисö. Письмоэз внучеккезлö гижисö, гöтрасьны эз лэдзö. Уджавны кутчисö ошшез моз. Степан Матвеевич пондiс порссез вылö горöтлыны. Даже порссез, кöть и нылöн юраныс вемныс кизер, и то пондiсö казявны, что хозяиныскöт неладно. Если Степан Матвеевич ныкöт пантасьö, то порссез норовитöны чожажык бокö пышшыны.

А Егор Прохорович буржыка пондiс «винтöн зэлöтны», «чёртлiсь бöж шемавны». Строителлез вылын горöтыштлö, только синнэс биöн öгралöны.

Кыдзкö районын совещаннё вöлi, и нiйö бöрйисö президиумö, дак Стёпан Матвеевич и Егор Прохорович öтiк рядö эз пуксьö. Егор Прохорович натодель стул сувтöтiс бöрöжык и пуксис райисполкомись председатель бöрö. Кöть и отир эз кылö ны лöгалöм йылiсь, но нiя казялiсö, что стариккез коласын мыйкö неладно.

 

* * *

Локтiс ар. Вына тöв пондiс чöвтны пуэз вылiсь вежöтöм листтэз и сьöрсьöн-бöрсьöн иньдыны вöтчыны воробей стаяэз сьöрö. Ыббез кушамисö, сюподдэз бергöтчисö му пластöн зябь увтö. Буса туйез кизертчисö нятьöн.

Колхоззэз кончитiсö хозяйственнöй год.

Правленнёэзын счетоводдэз лыддьöны доходдэз, мымда босьтiсö пода, карч да сю вöдитöмись. Гижöны буржык отирöс почётнöй доскаэз вылö, стенгазетаэзö.

Степан Матвеевич аслас порсь фермаöн сетiс колхозлö доходсö куим сотня тысяча руб мымда, босьтiсö двадцать два порсьпиянöн каждöй пиялiсь порссянь. Бур показателлез понда сылöн ферма участвуйтiс областнöй сельскохозяйственнöй выставка вылын.

Егор Прохорович эта жö годö аслас бригадаöн строитiс и быдсöн механизируйтiс мöс ферма, строитiс клуб.

Степан Матвеевичöс колхоз премируйтiс курорт вылö путёвкаöн. Медбы не öбидитны Егор Прохоровичöс и не янсöтны стариккезöс, «Заря» артельлöн правленнё сiйö тожö премируйтiс путёвкаöн. И кыдз нарочно шогмис — нiя шедiсö öтiк санаторийö — «Золотöй колосö».

Стариккез мунiсö торйöн, нельки öтiк поездö эзö пуксьö, санаторийын öтiк палатаö эзö пырö.

Степан Матвеевич аскöттяс сералiс Егор Прохорович вылын: «Ась кöсперкыс госсялö». А Егор Прохорович думайтiс: «Каждöй лун сiйö колö вашöтлыны Эльбрус вылö — госыс кöть чинас».

Сибалiс кад бертны гортаныс. Кöр Степан Матвеевич и Егор Прохорович локтiсö конечнöй станцияö да мунiсö пуксьыны автобусö, кинкö бöрсяняныс горöтiс:

— Степан Матвеевич, Егор Прохорович! Кытчö тi! Здравствуйте! Ме тiянöс нуöтны натодель локтi.

Тракт вылын сулалiс «Заря» сельхозартелись шофёр и шыннялiс. Сы бокын вöлi шоколаднöй рöма автомобиль «Победа» и шондi вылын свиттялiс свежöй красканас.

— Вот, Степан Матвеевич, миян виль машина. — Сiя любовнöя малалiс машинасö.

Степан Матвеевич шуö:

— Спасибо, зонка, меным автобусын бур. — Сiя öт кокнас шагньöвтiс автобус лиснич вылö, сыбöрын шупыта бöр бергöтчис да горöтчис: — А тэныт, Алёшка, ме висьтала: тэ — дезертир, завидливöй поп. Йöз машина вылö артельлiсь честь вежин.

Алёша нем эз вежöрт, только синнэсö кылöтлiс. Егор Прохорович локтiс Алёша дынö, кисö пуктiс пельпон вылас, хитрöя чикыртiс синнэсö да висьталiс:

— Кинлöн, шуан, машинаыс? Значит, машина «Зарялöн», шофёр «Искралöн». Ах тэ, едрёна палка, тэнчит бöжтö ыбöс коласö колö шемавны. Дезертир! — Егор Прохорович макнитiс кинас да пуксис мöдiк автобусö.

Алёша сулалiс тракт вылын и гыжьялiс юрбöрсö. Сiя нем эз вежöрт: «дезертир да дезертир». Локтiс станциясянь, пырис правленнёö и висьталö: стариккесö пö вежöмась курорт вылас, мывкыднысö пö нiя кольöмась сэтчин, а менö дезертирöн видiсö.

— Вот кыдз делоыс бергöтчис. Значит, стариккез эз вежöртö, что миян колхоззэс öтлаасисö, — горöтчис председатель. — Эй, Пашко, кытöн тэ! Ноко ветлы, кор правленнёö виль инженерöс и виль зоотехникöс.

Чулöтiсö экстреннöй совещаннё.

— Ёрттэз, колö тэрмасьны. Вот-вот автобуссэз локтасö. — Тэрмöтiсö отирсö председатель и Паша. — Да буржыка пасьтасьö. Тi, томмез, видзöтö: цветтэз эд вунöтö.

Колхозниккез сулалiсö тракт дорын. Недыр мыйись автобуссэз локтiсö. Отир пондiсö горöтлыны. — А, Степан Матвеевич! Егор Прохорович! Здравствуйте!

Колхозлöн председатель кайис грузовик вылö и горöтiс:

— Кывзö, ёрттэз! Дона Степан Матвеевич! Дона Егор Прохорович! Öтлаöтöм сельхозартель «Заря» нимсянь поздравляйта тiянöс бура шоччисьöмöн. Социалистическöй соревнованнёын ыджыт победаэз понда правленнё награждайтö тiянöс дона подароккезöн да почётнöй грамотаэзöн. Подароккез и грамотаэз правленнёын получитат. А öнi, — одзлань баитiс председатель, — тiянлö желайта счастливöя чулöтны пöрись каднытö. Правленнё и быдöс колхозниккез решитiсö сетны тiянлö пенсия.

Отир горöтлiсö, поздравляйтiсö Степан Матвеевичöс и Егор Прохоровичöс. А нiя шай-пай лоисö и кыв эз вермö горöтчыны.

— А вот тiянлiсь делонытö одзлань достойнöй нуöтiссез. «Победалöн» ыбöс оссис и сэтчинiсь петiсö Настя да Петя.

— Вот миян колхознöй инженер, а вот — учёнöй животновод. — Шыннялiс председатель и ордчöн сувтiс ныкöт.

Степан Матвеевич и Егор Прохорович бергалiсö, бергалiсö, но кытчö воштiсян... и кутчисисö да и öтамöдкöт окасисö.

 

Сiдз и миритчисö Степан Матвеевич да Егор Прохорович.

Петя да Настя гöтрасисö. Олöны виль керкуын. Стариккез дыр пукалöны рыттэзöн ордчöн, критикуйтöны öтамöднысö, сералöны сы вылын, кыдз нiя лöгалiсö.

— Ох, комедия! — китшкö-сералö Степан Матвеевич.

— Кыдзи сказкаын, — шуö Егор Прохорович.

Нiя любуйтчöны том параöн и видзчисьöны наследникöс. Нельки ниммез ни думайтiсö: ежели лоас правнучек, ним сетасö Егор Прохорович честьö Егор, ежели правнучка, то Степанида.

 

ЕНЛÖ ПИСЬМО

 

Рытнас Савелий пырис вичкуö. Видзöтiс öтöр-мöдöрö — отир абу. Только клирос дорын сулалiс, кыдз кажитчис сылö, гöрд да порсь чужöма и кыз кынöма дьякон. Сiя жаднöя курмалiс серебрянöй поднос вылiсь медяккез да серебрушкаэз, кöднö вайисö вичкуö юрбитiссез.

Дьякон казялiс Савелийöс, нёджжöвтiс «дарисянь» дульсмöм синнэзнас, чожа дзебис подноссö деньганас и пондiс лёкгоршöн нюжлавны:

— Господи, помилуй, господи, помилуй, а-а-ми-инь!.. Мый сулалан? Кеймы еныслö, грешнöй душа!

Савелий кыскис писис конверт и шысеттöг нюжöтiс дьяконлö. Дьякон думайтiс (не первуись эд!), что сылö старик козьналö деньга, и курасян киэзöн кватитiс конвертсö. Сыбöрын дзар керис конверт вылö и кижган голосöн рякöстiс:

— Эта мый?

— Микола Чудотворецлö письмо. Тэ еннэскöт топ олан, ысты сiйö адрес сьöртi, — хитрöя горöтчис Савелий и содтiс: — А то лыддьöт, сэтчин абу некытшöм секрет.

А сэтчин то мый вöлi гижöма:

«Святöй угодник Микола Чудотворец! Тэныт гижö грешнöй му вывсянь письмо не грешнöй Савелий.

Пятьдесят год ме тэныт кейми, олi честнöя, эг гусясь, некинöс эг öбидит и эг бöбöт, супружескöй грехся некытшöм мöдiк грех эз вöвлы. И вот локтiс меным маета: куим год кынöмö висис, куим год синнэзöс бытшöмика эг куньлы и прокод тэнат образ одзын вичкуын и гортын кейми-горзi. Да вичкуас и тэнат образ синнэзiсь неöтпыр синва котöртiс. Но тэ меным эн отсав. Тэ менö эн веськöт. И сэк ме вежöртi: не тэнат, не мöдiк святöйезлöн некытшöм вын абу. Тi, святöйес, да и вичкуын служитiссес, кыдз миян кодъюр дьякон — рочöн шуа, мед буржыка вежöртiн — обманщиккез: деньга босьтат, а отсöт одö сетö.

А ме вот ветлi больницаö, сизим лун сэтчин куйлi и нач веськалi. Томыник хируг, тожö Николай, гырксим орöтiс пев кузя яй торок — и веськалi!

Öнi ме гортiсь тэнчит образтö, да и мöдiк святöйезлiсь, горын сотi. А ны местаö сувтöтi Николай хируг-чудотворецлiсь образ».

Дьякон орöтiс синнэсö письмо бердiсь и лёкгоршöн ракöстiс:

— Тэ мый, мывкыдсит öшин? Кеймы öнi жö еныслö, дур... дубина!

Савелий китш-китш серöмтчис да висьталiс негорöн:

— Öнi вöлись мывкыдсялi, — и матöжык сибöтчис чудотворец образ дынö да, сы вылö чуньнас мыччавтöн, содтiс: — Сiя öнi тожö оз понды горзыны. Ме сылiсь тöн ойнас, кöр тэ ляч вöлiн код, горзан механизмсö рази...

 

ПОЭТЛÖ СОВЕТ

 

Öтiк поэт книжнöй магазинын видзöтiс виль книгаэз. Эта коста сы дынö сибöтчис морт, кöда киас видзис поэтлiсь виль стиххезöн сборник.

— Олан-вылан! — горöтчис сiя и крепыта жмитiс поэтлiсь кисö. — Ме Никита.

— Олат-вылат, Никита!.. Но тiянöс ме мыйкö ог тöд, — паныт горöтчис поэт.

— А ме сiя Никита, кöда йылiсь тэ слава керин, что ме генерал.

— Кыдз этö?

— А тэ тöдан, дона гижись, менчим погоннэзöс кулисö. — Сiя юр вывсис босьтiс кепка и малыштiс галя кодь шырöм юрсö. — Да эшö дасвит сутки сетлiсö. Вот кыдз.

— Кыдз жö сiдз шогмис?

— А вот сiдз. Часто öддьöн кодалi. А кыдз коддза да смевсяла, сiдз и генерал... Ог сэсся висьтась, нёштöм история.

Никита мыччалiс босьтöм книжка вылö, павтыртiс öтiк лист, синнэсö чикыртiс и шыннялöмöн горöтчис:

— А тэ, дона поэт, öнi гижин бы ме йылiсь сiдз: «Оз кодав сэсся Никита, сiя не ни генерал...»

 

СТОЛОВÖЙЫН

 

Пызан сайын пукалö-жöдзö пöриськодь ни морт. Сiя кучиксис петтöдз бöрйö меню вылiсь сёяннэз.

Кык морт, кöдна тöдiсö этö жöдзисьсö, висьталiсö официанткалö, мед эта мортлö пызан вылö вайисö тöння, шöммöм сёяннэз.

— Мыля? — юалiс официантка.

— Да сiйö кöть кытшöм бур сёянöн вердö, сёравно гижас жалобнöй книгаö.

 

 

БАНЯ

 

Миян экспедиция мунiс одзлань, а ми кыкöн кольччим эта деревняö и пемдiм. Пемдiм да пырим шоччисьны лесник керкуö, кöда сулалiс неылын важ мельница сайын, гырись пожума вöр дорын.

Хозяиныс гортын эз вöв, но хозяйкаыс примитiс миянöс кыдз бур гöссезöс: пöта и чöскыта вердiс сола ельдöггезöн да кыз рыжыккезöн, туся шыдöн. Юкталiс виль туисiсь быгья сюромкаöн. Добрöй ужин вöлi!

Но ачыс хозяйкаыс, Марфа Петровна, эшö добрöйжык вöлi и бура гленитчис миянлö. Вöлi сылö кватьдас годся унажык ни, но кок вылас эшö кокнит, мыгöрнас веськыт и öддьöн сёрниа.

Сы юр вылын гордöя пукалiс бисерöн вурöм кокошник, вылас лöз видзис печата дубас, коккезас свиттялiсö гöрд воннеза виль котiэз.

Ми сылiсь юалiм, тöдö ли Марфа Петровна важ песняэз, и корим, если эз эшö вунöт нiйö, медбы миянлö сьылiс. И сiя миянлö сьылiс кынымкö песня, и ми, конечно, нiйö магнитофоннöй лента вылö гижим. А сыбöрын ми юалiм хозяйканымлiсь, эз ли сiя кывлы легенда сы йылiсь, кыдз öтiк нывка эта местаэзiсь белогвардееццезöс баняын пывсьöтöм.

Марфа Петровна мыйкö дырна лöнь керсис, сыбöрын том синнэзöн дзарнитiс миянлань и китш-китш ваксьыштiс:

— Кытшöм сэтшöм легенда? Эта вöлi быль.

Сылöн ответыс миянлiсь сьöлöммез пондiс гильöтны, и ми, конечно, кыдз кужим, сiдз и пондiм корны, медбы сiя висьтасис.

Марфа Петровна полöмöн видзöтыштiс керку ыбöслань, мыйкö кывзыштiс и горöтчис;

— Сiдз и ло — висьтала. Но ежели мый неладно горöтча, эд осудитö.

Марфа Петровна нырыштсис гырдззаэзнас пызан дорö и шыннялöмöн юалiс:

— Тi локтiканыт адззылiт Сьöдъю вылiсь важ мельница? Дак вот, сы дынсянь неылын öшыннэзтöм керку эм, а бокас — пöлiньтчöм баня.

Чуть ылынжык неыджыт деревушка. Деревняас отирыс абу ни, мунiсö мöдiк деревняö öвны.

Ми локтiканым быль адззылiм мельница, öшынтöм керку, пöлiньтчöм баня. Ылынжык вöлi чапкöм, петшöрöн тырöм вит-квать керкуись деревушка.

Марфа Петровна одзлань висьтасис:

— Эта мельницаыс вöлi Петра поплöн, сысянь и шуисö сiйö поповскöйöн. Мельникöн уджалiс Ермолай, поплöн работник. Кыдз только миян ладорö локтiсö гöрддэз, Петра попыс кыдз тöвчикöн нöбасис, кытчöкö öшис. А Ермолай сiдз и кольччис мельникавны. Сылö жаль вöлi кольны сэтшöм бур мельницасö, кытöн сiя уджалiс томсянь. Да и сёравно эд кинлöкö колö уджавны.

Мельниклöн вöлi ныв, невеста, сiя отсасис айыслö мельничнöй хозяйствоын. Да уджалiс сiдз, что мужиккез сылö завидуйтiсö. Нывка вöлi вына, чож да статя. Деревняись том зонкаэз, кöдна вовлiсö изны мельницаö, синнэзнысö дзардiсö нывка вылö. Öтiк зонка, Савелийöн сiйö шуисö, кыдз сир лякасис нывка бердö, пондiс ас саяс корасьны. Кöть ой, кöть лун, зэр коста и шляча мунiкö, пыр мельнича дынын ниртчис. Но мельник синнэзнас эз адззы зонкаöс. Мöднёж эз и шу, кыдз шельмечöн.

А мыйсянь сiдз? Да вот мыйсянь. Ермолай томнас ош кодь вына вöлi. Сьöкыт гыр пиннезнас пöлатьö вермис лэбтыны и подков киэзнас вермис веськöтны. Вот кытшöм сiя вöлi. А Савелий мыгöрнас вöлi кöс да и деревняас лыддисис первöй балагурöн, изгальникöн. А сэтшöм мортыс пö абу бур работник.

Кыдзкö стрöча коста Ермолай горöтчöма, что Савелий пö — нюдз гужи и менам родö сэтшöм зяттес пö озö колö. Вот сэтöн Савелий и мыччалас ассис вынсö да удальсö. Сiя тай, батя, кватитас мельник вöвлiсь бöрись коккесö (Ермолай вöв вылас пукалöма), лэбтас вöвсö и зимгас му вылö. Савелий мымда вын гот-гот вакыштас и горöтчас:

— Дак вот, мельник, тöд миянöс: ми сöстöм зöрись тагья брага юам, а тэнат брагаыт мельница бусiсь керöм. И тэнат нылыт менам лоас.

Сыбöрын мымда вын шутньöвтас (сэсся некин деревняас сiдз эз куж шутнявны) и гордöя иньдöтчас деревняö..

Сэксянь, вöлыс увтын куйлöмсянь, мельник кувтöдз шульга кокнас виджгыльтiс-крöмайтiс. А Савелий эшö частожык пондас вовлыны мельничаö. И сё грöзитчас нывкалö: «Он мун ме сайö доброöн, дак мельницасö сота и пöимсö тöв кузя иньдöта, а тэнö, кыдз курöгöс, конувтам сюйышта да вöррез вевдöрöт лэбзя, нöбöта сэтчин, кысянь шондi петö». Вот кытшöм отчаяннöй вöлас Савелий, — гордöя горöтчис Марфа Петровна, — некинлiсь оз пов — не ош кодь вына мельниклiсь, не чёртлiсь, не зверьлiсь.

Ермолай тожö грöзитчас: шедан пö тэ, шельмеч, изгальник, - кера кишкаэсит завёрткиэз, а асьтö мельнича йирö лэдза. Да и тэ пö, нывка, берегитчы менам.

А нывка öддьöн любитас Савелийöс. Мый керны, медбы айыслiсь сьöлöмсö небзьöтны? Думайтас, думайтас нывка да керас учöтик хитрость. Кöть айыс вöлi лöг-лöг, а нывсö öддьöн радейтас, сылöн сьöлöмыс вöлас небыт. И эшö брага стрась радейтас. Вот нывка и думайтö керны сэтшöм брага, кытшöмö эшö отир эз ювлö. Кера пö, айöс юктала, и сылöн сьöлöмыс небзяс. А кыдз небзяс, сэк и Савелийкöт мирита. Вот кытшöмöсь вöласö сылöн думаэз.

Брага керöма и, медбы айыс кытчöдз эз казяв, дзебöма сiйö лагунöн баня пытшкö. Мед пö томитчас сэтчин, вынажык лоас.

И быдсöн нывкалiсь думаэсö дзугöма война, гражданскöйыс. Сэк кымöраöсь вöлiсö годдэс. То чочкоммез локтасö, то гöрддэз — мый только и керсис. Мельница неöтпыр öтiк власть дынсянь мöдiк власть увтö шедлас. Только эта коста, кöр баняас лагунсö дзебис, мельницаыс вöлас гöрддэс киын, а асывнас чочкоммезлöн отряд босьтас этö деревушкасö.

Чочком офицер аслас помощниккезкöт пырас мельник керкуö. И ныкöт отлаын — Петра поп, кысянь сiйö, понöс, и вайöтöмась! Ермолай гортас оз лöсяв, вöрö мунас дуга пуэзла.

Петра поп и шуö: ноко пö, нывка, менам доброöн буржыка гöссесö верд да юктав... Вот эд кытшöм дзез кынöм — менам доброöн пö верд!

Нывка, мый вöлi, ваялас пызан вылö, вердас-юкталас. Поп бöра и шуö: ноко пö, нывка, гöссезöс менам баняын пывсьöт.

Нывка баня лонтас. И öддьöн бура лонтас — мед пö дзез кынöммес пöжасьöны. А господаыс, видно, тойсялöмась — дугдывтöг гыжьясьöны, нельки киэзнаныс пырöны сэтчин, кытчö оз лöсяв. Нывка и думайтö: абу ни тi солдаттэз, ежели сiдз тойсялöмась. Кытчö ни тiянлö, тойöсь господалö, властьсö видзны? Вашöтасö бöра гöрддэс тiянöс.

Попкöт мунасö солдаттэс баняö. Баня ыбöс одзö сувтöтасö часовöйöс. А Савелий эта коста мельница крыша увтын дзебсисяс. Сiя стрась лöг вöлi чочкоммез вылö: нылiсь вöввез мырддьöмась да и айсö вартлöмась. Чуть абу вийöмась Савелийöс — кыкись пö лыйöмась сылö, но ештöма пышшыны.

Савелий кань моз лэдзчас вöскись и шуö нывкалö: самогоннат пö юктав часовöйсö, а ме сы коста муна. Сiя петас мельница увтöт, сунгисяс, кыдз утка, ваö и уяс ю кузя, только юрыс ва вевдöрас жöдзас. Петас деревня сайö, сэтчинсянь верзьöмöн вашöтас деревняö, кытöн сулалас гöрддэзлöн отряд.

Чочкоммез дыр пывсясö, пöжасö боккезнысö. Баня дынын часовöй нывка лекарствосянь валяйтчö му вылын.

Нывка пукалö керкуын и видзчисьö, чожа ли бертас Савелий отлаын гöрддэзкöт. Эта коста баняланьсянь пондасö кывны кижган песняэз. Нывка дзар керас öшынö и синнэз вылас оз верит: баняись ванйöв оссяс ыбöс, и поп, кыдз кулёвöй мешöк, пöрас му вылö. Сыбöрын петас офицер, вылас гимнастёрка, кальсоннэз, киэзас видзö сапоггез и мыйкö горöтлö невежöртанаö. Петасö мöдiккез: öтiк вешьянтöм, только сапоггез вермöм кöмавны, мöдiк вылын, кыдз майöг вылын, поплöн паськöм павьялö, а куимöтыс нач куш, совсем бöбсялöм и мымда вын ряксö: «Мы за царя-батюшку, ура!»

Эта коста гöрддэз тöвчикöн лэбзясö деревняö, и поткöтас вöрсö «ура». Чочкоммез быдöнныс шедасö пленö.

Пывсиссез асланыс солдаттэз одзын, дзик лёшмöм гоббез — срам ны вылö видзöтны. Бугыля синаöсь, ылöстöмöсь, кин вынсьöтчö сулавны, кин виклясьö, кыдз гаг, му вылын, а поп öм увтас бобгö: «Господи, прости! Господи, прости!». И некин ны коласiсь оз вежöрт, мый ныкöт керсьö.

Нывка петас видзöтны, мый сэтчин керсьö. Офицерыс казялас сiйö да сылань чуньсö, кыдз пишаль, иньдöтас и бöбмöм голосöн пондас горöтлыны: «Вон, вон татiсь, обороника-а-а!» Ачыс только бöрланяс петитчö и петитчö, а Савелий сiйö пидзöснас бöр кузяс, пидзöснас — зöровöй кисельöн вердö.

Тi юалат, мыйсянь нiя бöбсялöмась? А нывкаыс брагасянь. Ваыс абу тырмöма, но и давай койны брагасö баня гор вылас. Вот брага парсяняс и коддзöмась.

Кöр нывкалöн айыс бертас вöрись, гöрддэс отсаласö миритны сiйö Савелийкöт. Ермолай пыксяс-керас да и благословитас нывсö петны шельмеч жöник сайö. Сэксянь Савелий да нывка дудiэз моз оласö пöрисьмытöдз...

Марфа Петровна дугдiс висьтасьны. Эта коста öтöрын сьöкыта дзуркнитiсö поспуэз, оссис керкуись ыбöс, и пырис хозяин — настоящöй богатырь — и керкуас сразу жö кыдз бытьтö лоис дзескытжык. Сiя жагöника чöвтчис, сьöкыта нёджжöвтiс иньыс вылö да небыта горöтчис:

— Ох, старуха, адзза, что оз тэныт терпитчы пывсьöм йылiсь висьтасьны.

— Да мый ни керан, Савеллюшко, кöр тшöктöны, — шуис хозяйка. Сыбöрын хозяин сибöтчис миян дынö. Тöдсасим. Савелий Михайлович шуис:

— Сёрми вот уджнам. А талун эд миян золотöй свадьба. Ноко, Марпа, банясис петкöт медовухатö...

Вот тiянлö и легенда!

 

БЫДÖС БУР

 

— Алло, алло!

— Да, да, да, да! Мый горштö летан?

— Ме ог горшöс лет. Кин кывзö?

— Кынымись колö висьтавны... Бюро добрых услуг. Мастерскöйись баитöны.

— Извинитö. Ме эг тöд. А кин баитö?

— Мый тэ бöбöв я мый я? Электрик!

— Извинитö. Ме пöрись ни, пеллезö бöбöтчыны пондiсö.

— Мый тiянлö миянсянь колö?

— Пожалуйста, керö услуга — менам керкуын розеткаэз умöльöсь.

— Но и мый?

— Вермас эд электричествоöн стукнитны.

— Но и мый?

— Вочны колö.

— А эз эшö некинöс стукнит?

— Эз на эшö.

— Дак мый нö отирсö тревожитан?

— Дак эд стукнитас.

— Кöр стукнитас, сэк и звонит.

— Ме керкуас öтнам ола.

— Но и мый?

— Кöр стукнитас, сэк некинлö звонитны лоас.

— Но и бур. Счастливо!

 

 

 

АВТОРСЯНЬ

(1993' вося небöгись одзкыв)

 

Ме не профессиональнöй гижись. Нянь-сов эг шедты литературнöй уджöн. Но вöлiсö сэтшöм каддэз, кöр меным вöлi öддьöн охота баитны отиркöт литература пыр.

Ме учöтсянь любитi литература. Уна тöдi коми стихотвореннёэз. Öддьöн радейтi Питю Öньöлiсь гижöм. Ачым сочиняйтлi стиххез, басняэз, сказкаэз, кöднö ачым жö и орсi аслам челядься ёрттэзлö.

Чужи ме Ленин кулан годö, кöр отир герьялiсö: «Ок, не шондi лэдзчис пемыт вöр сайö». Быдми Гортлуд деревняын, кöда пырис Юксеевскöй волостьö (öнi Косинскöй районын). Учöтсянь тöда, гажа менам вöлi горт-деревня, кытöн вöлiсö даскык двор гöгöр. Быдöс керкуэз, чоммез, сарайез, гиддэз, конюшняэз керöмöсь кондовöй вöрись и вевттьöмöсь öтiк топыт крышаöн, осьтатöг, нельки воробей юрсö оз сюйышт. Амбаррез, житницаэз, му гуэз — бокынжык. Но быдöс этна постройкаэз и огородеч гöгöртöмöсь заплоддэзöн, тшöк стыннэзöн, кытчö юрсö оз вермы пелитны курöг.

Быль, ме чужи, кыдз важ сьыланкылын сьывсьö: «Чужи-быдми сьöд вöр шöрын, деревняись петi». Менам деревня быд ладорсянь гöгöртöм югыт пожума и пемыт кöз да ньывпу вöррезöн, чочком яггезöн да нюр видззезöн. И ны коласын, неыджыт пруд дорын, пукалö менам веж луда, добрöй постройкаэза меддона чужанiн.

Война вотöдз миян деревняын олiс унажык том, здоровöй, öддьöн уджалiсь да мастеровöй отир. Ме тöда, кыдз пондöтчис война, томмез быдöс мунiсö фронт вылö, деревняын кольччисö инькаэз, челядь да куим старик. Бертiсö война вывсянь куим-нёль ранитöм морт, ны коласын и ме — калека. Но миян деревняын олiсь отирлöн вужжезыс вöлiсö крепытöсь. Öтiк хозяйство эз усь, öтiк керкулöн öшыннэз эз пöднассьö, öтiк семья эз пышшы бур олан кошшыны. Деревня сулалö, быдмö, паськалö öнöдз.

Кöр менам сьöлöм вылын лоö недолыт, ме муна горт деревняö, кытöн öнöдз олö томжык сойö аслас семьяöн.

Кöр меным тырис сизим год, мунi велöтчыны школаö, ыджыт деревняö, кыдз шуисö сэк деревня Бачмановасö. Эта жö годдэзö ме синнэз одзын мунiс коллективизация. Вöтöнмоз тöда, кыдз герьялiсö отир, кöр нöбöтiсö общöй колхознöй дворрезö ассиныс мöссэз, куканнез и вöввез. Тöда и кыдз керисö медодзза колхознöй бороздаэз ыб вылын гармонняэз орсöм увтын. Эна жö годдэзö миян деревняö локтiсö спецпереселенеццез Украинаись да Белорусияись. Нiя недыр олiсö миян деревняын — мунiсö овны вöр заптан посёлоккезö.

1938 годö, семилетка кончитöм бöрын, ме мунi велöтчыны педучилищеö. Эстöн первуись кылi, что гижиссез Михаил Лихачёв да Андрей Зубовöс пуксьöтöмась кыдз враггезöс. Кытшöм вöлi меным недолыт сьöлöм вылам, висьтасьны оз позь. Миян том юррез некыдз эз вермö вежöртны сэкся политикасö: быдлаын вöлiсö «враггез, националисттэз, шпионнэз». Сэк вöлi страшнöй лозунг: «Классовöй враг оз узь».

Педучилище кончитöм бöрын мунi велöтчыны вились осьтöм велöтчан заведеннёö — Кудымкарскöй учительскöй институтö. Велöтчи öтiк год филологическöй факультет вылын. Гожумнас пондöтчис война, и ме шедi военнöй власттез увтö. Перво менö ыстiсö велöтчыны Чкаловскöй авиационнöй училищеö. Велöтчи кык месяц штурманскöй классын, но чожа сизим курсантöс, ны коласын и менö, лэдзисö бöр гортö. Война бöрас ни тöдi, мыля менö лэдзисö училищеись. Сэк мекöт öтлаын велöтчис Кудымкарись Чугаев Михаил Ильич. Кöр сiя бертiс фронт вывсянь, висьтасис, что быдсöн миян курс мунiс фронт вылö. А меным сэк эшö эз тыр восемнадцать год, и менö вашöтiсö гортö.

Месяц бöртi шатласи Магнитогорскöй авиационно-техническöй училищеын. Даснёль лун ремонтируйтi фронт вылын жугдöм самолёттэз, а сыбöрын бöра иньдiсö гортö. И только 1942 годö июль месяцö мунi велöтчыны Пермскöй пулемётно-миномётнöй училищеö, кöдö кончитi 1943 год пондöтчöм одзын.