Кыдз ме винакöт дугдi тöдчыны 1 страница

ЛЕОНИД ЕГОРОВИЧ

Ouml;КТÖМ ПРОЗА

 

 

ПЫТШКÖС:

 

Авторсянь < Быд кадлöн аслас чужöм 93

Баня < Иньва 68, Пармаын асыв 74

Быдöс бур < Гажа рыттэз 69

Веня-министр < Быд кадлöн аслас чужöм 93

Вештiсьöм < Быд кадлöн аслас чужöм 93

Война туйез кузя < Быд кадлöн аслас чужöм 93

Войналöн чужöм < Быд кадлöн аслас чужöм 93

Гармонист < Быд кадлöн аслас чужöм 93

Горадзуль < Быд кадлöн аслас чужöм 93

Гортö < Парма 62

Дима веськалiс <

Егор-артиллерист < Иньва, 1995

Енлö письмо < Гажа рыттэз 65

Зурасян кадся ошибкаэз < Быд кадлöн аслас чужöм 93

Кань-черикыйись < Бичирок, 1959

Коза да чань < Озъягöдок, 1956

Курича-сват < Быд кадлöн аслас чужöм 93

Кыдз ме винакöт дугдi тöдчыны < Гажа рыттэз 58

Менам посад < Быд кадлöн аслас чужöм 93

Музейын < Быд кадлöн аслас чужöм 93

Ниндуллез < Быд кадлöн аслас чужöм 93

Ном да росянка < Бичирок, 1959

Ош вийиссез < Быд кадлöн аслас чужöм 93

Пирöг < Гажа рыттэз 58

Поэтлö совет < Иньва 67

Пöрись друггез < Иньва 58

Сашенька-хозяйка < Быд кадлöн аслас чужöм 93

Степан Караваев творчество йылiсь < Иньва 58

Столовöйын < Иньва 67

Таня < Тулысся ваэз, 59

Тöдiсь Паладь < Томмезлöн рыт, 60

Урöса синнэз < Иньва 64

 

 

ПИРÖГ

 

Кöть талуння рытыс вачкисьö тöння рыт вылö и сэтшöм жö шоныт, кыдзи тöн, но талун сьöлöм вылын гажажык. Да, кыдз не гажажык — талун артельлöн вундiссис сю, вöвдiссис лён, вежтiссис государстволö нянь. Каждöй уджалiсь морт шыннялiс, ошшасис богатöй урожайöн.

— А няньыс виль урожайсис кытшöм пöжассьö бытшöм! Öддьöн и öддьöн бытшöм, — позис кывны быдöнсянь.

Талун, адззывлытöм рытö, кыдзи гез кыссьö клубö отир. Вот ордчöн кутчисьöмöн мунöны том гозъя, нiя гажöна видзöтлöны öтамöдныс вылö. Жöникыс думайтö, что сылöн том инькаыс медбасöк, медкодя и сысся буржыка некин оз куж пöжавны пирöггез. Нельки стариккез и старухаэз мунöны клубö. Мукöдыс эд ны коласiсь важын ни эз пыралö сэтчин.

Мый нö талун сэтшöмыс лоис? Мыйлö сiдз талун отир кыссьö клубас?

Да талун клубын адззывлытöм рыт. Талун том инькаэз мыччалöны ассиныс искусство: кин виль урожайись чöскытжыкö пöжалöм пирöг. Мый эд только оз думайтö комсомолеццез!

Каждöй морт мунö клубас и думайтö: кинлöн жö лоас медбур пирöгыс? Каждöй том инька надейтчö, что сiя пöжалiс пирöгсö медчöскытö. Нельки жöниккез, кöдна одзжык эз и думайтö инькаэзныс стряпайтöм йылiсь, гусьöн тöждiсьöны, кыдз бы не усьны чужöмöн нятьö.

А вон и Гаврило дед мунö, сылöн медтом моньыс тожö пирöг пöжалiс.

Комсомолеццез, кöдна керисö этö адззывлытöм рытсö, перво полiсö, петас ли мыйкö. А вдруг оз пöжалö пирöггесö? А вдруг отир оз локтö? Но öнi нiя асланыс секретарь Августакöт нельки öт кок выланыс чеччалiсö, кыдз челядёк, шумитiсö, радуйтчисö.

— Нывкаэз, зонкаэз, видзöтö жö, видзöтö, мымда отирыс локтö, — баитiс Августа. Сылöн сьöд сэтöр туссез кодь синнэс бичирасисö гажöн. Видзöтан Августа вылö и томман. Сы жаритчöм чужöм сьöртi да кисойез сьöртi тыдалiсö здоровье да вын.

— И дед Гаврило локтö. И Митреика бабным локтö, Вот чудоыс! — шовкöтiс долоннезнас Августа. — Валя, Миша, Гриша, ноко эшö видзöтö быдсöн, мый эшö оз тырмы, — сеталiс сiя указаннёэз.

Клубын залыс вöлi украситöма öддьöн бура. Зал шöрас лёдзöн сулалöны пызаннэз. Нiя вевттьöмöсь бель чочком пызандöраэзöн. Пызаннэз вылын куйлiсö кык ряд пирöггез. Ох, и пирöггез, гöрд рöмаöсь, пышнöйöсь, кыдз бытьтö ловьяöсь видзöтöны тэ вылö и мыччалöны ассиныс боккезнысö! Нысянь вачкö нырö чöскыт аппетитнöй ароматöн.

Комсомолеццез тэчöмась каждöй пирöг вылö этикеткаэз, кытчö гижöма ним, кинлöн эта пирöгыс.

— Августа, а эта кинлöн пирöгыс? Список сьöртi унажык лоöны. Списокын 22, а пирöггез 23.

Некыдз эз вермö тöдны, мыля сiдз лоис. Пирöггесö примитiс Нина и мунiс городö. Кинлiсь эшö сiя примитiс, тöдны оз вермö. Думаитiсо, решитiсö: локтасö отир — тöдасö.

— Быдöс готов. Приглашайтö отирöс, — горöтчис Августа.

Гриша да Валя торжественнöя сулалiсö ыбöс дынын. Нiя киэзаныс чочком вышивайтöм чышкöттэз вылын видзисö рöма, пышнöй нянь чöвпаннэз и каждöй пырись мортлö баитiсö: «Добро пожаловать». Отир отвечайтiсö: «Спасибо», а мукöдыс — «Нянь да сов». А Гаврило дед да Митреика баб кынымкö пернапас пуктiсö.

Отир пуксисö. Августа лöньсьöтiс быдöннысö и висьталiс:

— Мийö талун керим няньлö торжество и бур уджлö слава. Виль урожайись пöжалiсö пирöггез 23 том инька, кöдна эшö олöны жöник сайын медодзза да мöдöдз год. Нiя кужöны быдтыны бур урожай, а талун видзöтам, кыдз кужöны пöжавны чöскыт да бытшöм пирöггез. Давайте пешлам, кин пöжалiс медбур пирöгсö.

Залын лэбис гажа шум. Каждöй морт пешлiс том инькаэзöн пöжалöм пирöг. Сэтчö адззисисö и медбур кöр тöдiссез. Кинкö кылö горöтiс:

— Маша, невночка шöмыс оз тырмы, сiйöн невна пирöгыс нюдз.

— Ме баитi моньöлö, öддьöн эн шöммöт, эн шöммöт. Вот видзöт, пирöгыс невна шöмаöв, — серьёзнöя баитiс моньыс йылiсь старуха.

— А ноко Васеика моньыслiсь пешлам пирöгсö. Уджавны сiя лют, видзöтам, кыдз гор би одзын письтö, — сералiс бригадир.

Томыник инька невна гöрдöтыштiс и мыччалiс пызан вылiсь ассис пирöгсö.

— А эта кинлöн пирöгыс? Вот пирöг дак пирöг, öмын сылö! — Ошкисö сiйö пирöгсö, кöдалöн эз вöв этикеткаыс. Комсомолеццез öвтiсö киэзнаныс и эз вермö висьтавны нем.

Пирöг куйлiс пызан вылын, кыдз ловья, чуньнат нырыштан и лэбтiсьö бöр. Гöрд рöма чужöмыс сылöн шыннялö.

— Видзöтö жö, видзöтö, пирöг бокас мыйкö гижöма, — пондiс горöтлыны кинкö.

Отир пондiсö видзöтны и быль казялiсö изюммезiсь гижöм ним: «Иралö».

— Да эта тракторист Василийлöн иньыс. Сiя родильнöй домын зон чужтiс. Корö Васясö, — горöтлiс Августа.

Василий вöлi öтöрын. Кöр пырис, сiйö пондiсö поздравляйтны:

— Ай да молодец! Настоящöй жöник. Пирöгсö бытшöма стряпайтöмыт — кыв ньылыштан. Кужан нянь быдтыны, кужан сiйö и славнöя сёйны.

Василий гöрдöтiс и нем эз вежöрт. Кöр сылö мыччалiсö пирöгсö да изюмöн гижöмсö, сiя вежöртiс и эшö öддьöнжык гöрдöтiс. Сэсся жагöника горöтчис:

— Кыдз эта пирöгыс татöн лоис? Ме сiйö эд больницаö нöбöтi. Зон менам чужис.

Отир коласiсь петiс Васялöн вонок да горöтчис:

— Ира кенакö этö пирöгсö тшöктiс Ниналö сетны. Вöлись быдöнныс вежöртiсö.

— Вот дак диво, — горöтлiсö отир, сералiсö, шумитiсö, — победительыс не молодуха, а молодец!

Ох, и бур вöлi эта рытыс.

 

ТАНЯ

 

Июль. Шондi öшалö небо шöрын, кыдз бидзуль, и приветливöя кисьтö му вылö ассис ловзьöтан энергиясö. Ыббез и видззез, мымда судзö син, вевттисьöмась зелёнöй бархатöн. Небо сöстöм, голубöй-голубöй, öтiк кымöрок абу. Дзар керан небо вылö, сiдз и вöяс сэтчö синлöн видзöтöмыт. Ыббез весьтын шондi орсö небытик руöн, му пытшксянь вевдöрö петкöтö, быдтö богатöй колхознöй урожай. Ласковöй тöлок, кыдз кагалöн окыштöм, котрасьö ыб вывсянь ыб вылö и шушкöтчö быдкодь турункöт.

Öддьöн эта коста кадыс гажа да бытшöм, сьöлöм вылын долыт, кокнит лолавны. Эта кадыс мортлiсь саймöтö медбур чувствоэз, öзтö сьöлöмын любитöм.

Павжун бöрын колхознöй видззез вылöт, кузь турун коласöт змейкаöн чуклясьöм туёк кузя фермасянь деревня Зиминаö мунiс Таня. Сiя эз тэрмась, видзöтлiс öтмöдöрö, мукöдпырсяс сувтчывлiс и нетшкис туруннэз.

Кöр Таня мышкыртчас, сылöн цветоккеза алöй косынкаыс öтлаасьö ловья цветтэзкöт и шогмö басöк букет. Танялöн кузь да сьöкыт веж чикиссес чатыртiсö юрсö, и сiя чуть да и чапкылiс нiйö морос одзас.

Таня талун кыдз бытьтö первуись чувствуйтiс оланлiсь счастье, первуись адззис, кытшöм быдлаын гажа, кытшöм туруныс нежнöй да зелёнöй. Сiя лолалiс пыдына, мымда вермис кыскис аслас моросö чöскыт кöра воздухсö.

Таня мунiс и думайтiс председателькöт басни йылiсь, кöда висьталiс сылö, что ыстас сiйö курссэз вылö велöтчыны городö, кыдз сiя шуис, лэбтыны квалификация. Сiдзжö висьталiс, что колхозас локтас виль зоотехник, кöда велöтчис кöркö Танякöт öтiк школаын. Таня некытшöм значеннё эз сет эта баснилö, но думаэз некыдз эз мездiсьö сы бердiсь. Вдруг сылö тöдвылас усис öтiк момент, и Таня шынь серöмтчис öм угöввезнас.

Десятöй классiсь велöтчись Серёжа Хозяинов вöлi мыгöрнас кöсыник да кузь, сьöд юрсиыс кымöс вылас кыдз бытьтö водöма бокланьö, киэс не ас сьöртi кузьöсь, чуть ли не пидзöс весьтöдз. Ветлöтiс не тэрмасьöмöн, небытика, дюттясьöмöн. Школаын сiйö дразнитiсö «великöй алхимикöн», но Серёжа некöр эз öбижайтчы эна кыввез вылö. Витöт классын велöтчикö Таня сьöкыта вежöртiс арифметика. Серёжаöс тшöктiсö отсавны Танялö. Öтпыр, кöр Серёжа занимайтчис Танякöт, босьтiс киэзас сылiсь чикиссесö и внимательнöя ны вылö пондiс видзöтны, кыдз бытьтö изучайтiс совсем тöдтöм предмет. Таня лöгасис и шуис сiйö орангутангöн. Серёжа немымда эз öбидитчы, а только горöтчис: «Таня, тэ лоан красавицаöн».

Таня öнi повторитiс Серёжалiсь кыввесö и бöра шынь серöмтчис. «Вот и не красавица: тырппезö кызöсь, нырö учöтик, рожабаннэз гöрдöсь и только чикиссезö кузьöсь», — лöгöнмоз аскöттяс баитiс Таня.

Серёжа Хозяинов десятöй класс кончитöм бöрын аймамыскöт мунiс овны мöдiк районö и сэксянь Таня сiйö эз адззыв. И вот Серёжа — учёнöй зоотехник...

Танялö мунiс двадцатöй год — эта сэтшöм кад, кöр быдöс тэ одзын: и радость, и удж, и любитöм. Таня тожö думайтiс десятöй класс кончитöм бöрын лоны дояркаöн, кыдз Маруся Коровина, кöдö даже областяс быдöнныс тöдöны. «Вот эта настоящöй удж, — думайтiс Таня, — сьöкыт и ответственнöй. А то колхознöй кассир... Лыддьы да вились лыддьы. Но и эстöн овлö бур, кöр колхозниккес ласковöйöсь, гажаöсь, берегитöмöн босьтöны кианыс деньга — асланыс труд понда награда».

Только Танялöн мамыс думайтiс мöднёж. Сiя гусьöн тшöктiс председательöс пуксьöтны ассис нывсö уджавны правленнёын. Таня аслас синнэзöн адззылiс, кыдз мамыс юкталiс председательсö винаöн, медбы сiя сетiс Танялö не нятьöсь удж. Сiдзжö Танялö тöдвылас усис, кыдз школа кончитöм бöрын мамыскöт шогмис медодзза ссора, кöр Таня висьталiс, что быдöс выпускниккес и сiя кольччöны уджавны колхозын. Мамыс Таняöс тшöктiс мунны велöтчыны одзлань либо уджавны городын. Танялö мамыс вöлi жаль. Эд кöркöся передовöй колхозница, война коста уджалiс мужик местаын, пыр вöлi весёлöй и баитлiс: «Вот быдмас Танюша — менам лоас смена», а öнi кольччис олан сьöрись, эз казяв, кыдз медбöрья годдэзö колхозын совсем оланыс вежсис, пондiсö уджавны уна быдкодь машинаэз, колöны том киэз, грамотнöй отир.

И эшö жальжык вöлi мамыс, что сiя шедiс Марфа-подружкаыс влияннё увтö, кöда пыр тотис мамыслö, сет пö нывтö городскöй жöник сайö, сэк вöлись тэныт оссяс оланыс. Вот пö менам нылö, Светкаыс, мунiс городö военнöй сайö и некытöн оз уджав, бархатö пасьтасьö, театррезö ветлö и меным быдкодь гöстинечсö, подароксö ыстöны. А тэнат нылыт бытшöм — полковник сайö мунас.

«Кытшöм гадость», — горöтчис аслыс Таня, и сылöн синкыммес öтлаасисö и кымöс вылас шогмис пыдын чукыр.

Кöр мамыс вежöртiс, что Таня кыв ассис оз веж, гусьöн нылыс шогья корис председательöс сувтöтны нывсö уджавны правленнёын.

Эна думаэзсянь Таня эз и казяв, кыдз локтiс ю дорö. Сувтiс берег дорас и пондiс любуйтчыны шондi вылын ва переливвез орсöмöн. Вдруг сiйö кытсöвтiсö челядь, гöгöртiсö и пондiсö горöтлыны, корны:

— Таня, сьыв миянлö песня. И только сiдз жö, кыдз клубын сьылан.

Таня пуксис кер вылö и пондiс сьывны. Голос сылöн чистöй, гора, лэбзис гöгöр; то ольсассис му кузя, зелёнöй турун кузя, то саясьлiс тыдавтöм ылынiнö, то вдруг öшлiс ю сайö. Челядь кывзiсö шы не тöв. Кöр Таня дугдiс сьывны, челядь дружнöя пондiсö шовкöтны киэзнаныс, а мукöдыс горöтлiсö «браво».

Таня чеччис местасис да горöтiс:

― Челядь, купайтчыны! — Сiя саясис бадь кусттэз сайö и сэтчинiсь чожа петiс сьöд купальнöй костюма.

Таня эта костюмöн вöлi стройнöй да здоровöй. Мымда красотаыс том здоровöй телоын! Натьтö, каждöй морт завидуйтö том порася красоталö. Челядькöт öтлаын сiя уськöтчис купайтчыны ваö. Челядь горöтлiсö, чирзiсö, тульöтчисö ваас. Тульöтчöмсянь ваыс быгсялiс, быдкодь рöмöн орсiс шондi вылын. Таня уйис перво ва паныт, сыбöрын поперегалiс юсö и вуджис мöд берегас. Пуксис берег дорö аслас любимöй местаö, кытöн сiя часто пукавлiс шондi гаж вылын.

Таняöс вились öдöлейтiсö думаэз. Медбы юрсис нiйö вашöтны, сiя пондiс видзöтны ваыс котöртöм вылö и вдруг син вылас усис — пос вылын, сулалö тöдтöм мужчина и внимательнöя видзöтö сы вылö. Таня дрöгнитiс и чожа вевттис киэзнас мороссö.

— Бессовестнöй! — лöгöн горöтiс сiя и уськöтчис ваö.

Кыкись сунгисьлiс, кыдз утка, а сыбöрын иньдöтчис ю шöрö. Кöр локтiс ю шöрöдз, пондiс чувствуйтны, кыдз бытьтö сылöн киэс и коккес кöртлöмöсь. Таня вынсьöтчис вöрöтлыны коккезнас, но нiя эз кывзö, бытьтö кынмöмась. Ва сiйö нöбöтiс увланьö, юрыс бергöтчис. Таня эшö пондылiс уйны и кыдз туман пыр адззылiс пос вылiсь мортсö. Таня вежöртiс, что öштö вынсö, но решитiс всё равно не горöтлыны. Юрыс совсем пондiс бергавны, öмас и нырас вöлi курыт, сола, и кыдз вöтöн моз кылiс челядьлiсь горöтлöм. Сiя вежöртiс только öтiк кыв «дяденька». А сыбöрын...

Вöйись вöлi му вылын ни. Сiя куйлiс лолавтöг. Сы гöгöр чукöртчис отир, кöдна локтiсö деревнясянь. Отир сiйö качайтiсö, керисö искусственнöй лолалöм. Недыр мыйись Таня пыдына ловзисис. Отир юалiсö, кин сiйö кыскис васис. Но некин эз тöд, только кöр Таня первуись ловзисис, адззылiсö кытшöмкö тöдтöм мортöс, кöда иньдöтчис деревнялань. Сы вывсянь котöртiс ва, сiя мунiс кöмтöг, öт киас видзис неыджыт чемодан, мöд киас — ботинкаэз. Но кин сiя? Некин эз вермы бытшöмика висьтавны.

Лун-мöд бöртi Таня веськалiс. Сiя петiс удж вылö. Луныс вöлi сэтшöм жö гажа, кыдз несчастье лунö, но сьöлöм вылас Танялöн вöлi недолыт, сьöкыт. Кöр сiя кайис правленнё посöдзö, сы одзын, кыдз му пытшкись петiс, сувтiс Марфалöн зон Феликс. Сiя юрсянь кок увтöдз меряйтiс синнэзнас Таняöс и керис чужöм вылас жалейтан вид. Феликс тожö кончитiс десятöй класс, но сiя öтнас откажитчис уджавны колхозын. Сiя баитiс, что ме ассим поэтлiсь талант ог понды губитны деревняын. Феликсыслö Таня гленитчис, и сiя неöтпырись ни агитируйтiс нывкасö мунны городö.

— Танюша, красавица, тэ татöн деревняын косьман, кыдз засуха коста сирень. Вежöрт, ме тэнö... ми пондам велöтчыны, адззылам ыджыт свет. Тэнат красотаöн, фигураöн не колхозын уджавны, — кеймисьöмöн да гажтöма баитiс Феликс.

Таня лöгöн, бытшкöмöн видзöтiс Феликс синнэзö и веськыт кинас сiйö вештiс туй вылiсь.

— Вот öнi ме чорыта решитi уджавны колхозын... Стиляга... — лöгöн горöтчис Таня. Феликс сулалiс, юрсö öшöтöмöн, сы вылын вöлi сера пиджак, кокас веж моднöй сандалеттэз и векнитик голубöй брюкиэз.

— Кысянь только тэ сэтшöмыс чужин, — эшö содтiс Таня и пырис правленнёö.

Правленнёын пукалiс только счетовод дядя Терентий. Таня дыр эз адззы пондöтны счетоводкöт басни. Сыбöрын волнуйтчöмöн, кытшöмöсь локтiсö первöй думаэз, юалiс счетоводлiсь, пöриськодь ни мортлiсь, кöдалöн шульга киыс местаын öшалiс пиджаклöн пустöй сос, локтiс ли виль зоотехник.

Дядя Терентий лэбтiс юрсö, кыдзкö особеннöя, синсö чикыртöмöн видзöтiс Таня вылö очкиэз вевдöрöт. Счетоводыс бытшкан видзöтöмсянь Танялöн рожабан йыввес гöрдöтiсö.

Счетовод лэдзис очкиэсö ныр вылас, кынымиськö шваткис счёты шариккезöн и сыбöрын вöлись горöтчис, что тöн локтiс и эшö содтiс: кыдз «вамöм курöг». Таня мылякö повторитiс счетоводлiсь кыввесö «вамöм курöг» и думайтыштiс: бур, что «вамöм курöг».

Чожа правленнё ыбöс сайын кылiс басни и посöдзын председательлöн виньдалан ваксьöм. Сiя баитiс горöн и привычка сьöртi повторяйтiс «мил человек».

— Мил человек, ме ыджыт удовольствиеöн... ме томмезлö абу против, но кин вежас семейнöй дояркаэзöс. Томмезлöн думаэс артисттэзöн лоны, быдöс йылiсь думайтöны, только не фермаэз йылiсь.

— А тiйö буржыка бы ныкöт баитiт, — пондiс кывны тöдтöм бархатнöй голос. — А то кыдз жö...

Чожа председатель и тöдтöм морт пырисö правленнёö. Председатель знакомитiс счетоводöс зоотехниккöт. Сiя вежливöя сетiс поклон дядя Терентийлö и Танялö.

Сiя вöлi мыгöрнас ыджыт, атлет, юрсиыс чуть кудриа, синнэз голубöйöсь, видзöтö веськыта, бытшöма. Сы видзöтöмын тыдалö смелость, честность. Сы вылын бура пукалö спортивнöй куртка, сьöд брюкиэз бура, стрелкаöн, гладитöмöсь.

«Серёжа Хозяинов, — чуть эз горöт Таня, но видзсис. — Вот кытшöм лоöм: бытшöм, ыджыт, вына, — думайтiс Таня, — а кажитчö, неважын только мунiс...»

Нiя пуксисö председатель пызан дынö и бöра пондiсö баитны семейнöй дояркаэзöс вежöм йылiсь. Председатель перебирайтiс думаэзнас том колхозницаэзöс и баитiс зоотехниклö:

— Эта оз мун фермаö... этакöт занимайтчим ни, а Валялöн юрас тöвчик бергалö.

— Ежели мийö сiдз пондам занимайтчыны кадррезкöт и сiдз думайтны отир йылiсь, миянлö некöр не адззывны лунöн мöссянь пуд йöв! — сьöлöмсянь горöтчис зоотехник.

— Мил человек, ме эстöн не первöй год, а слава богу, ола пятидесятöй гожум и тöв. Ме отирсö тöда, кыдз ассим вит чунь. Вот кыдз энö, — и председатель мыччалiс ассис нёль чуня ки. — Том отир городö норовитö мунны, нывкаэз городскöй техниккезöс видзчисьöны... Ме тöда... — эз кончит ассис кыввесö председатель.

— Ме кылi, школаись выпускниккез кольччöмась уджавны колхозын, — одзлань баитiс зоотехник и веськыта видзöтiс председатель синнэзö.

— Эх, мил человек, только слава... газета понда, — председатель чапкис кок увтас чигарка окурок и тальччис сы вылö кирзовöй сапогнас. — Только газета понда... да и быдöннысö дояркаэзöн да свинаркаэзöн он сувтöт. Том отирлöн думаныс мöдiк.

Председательлöн кыввес зубыта сотiсö Танялiсь сьöлöмсö. Сылö лоис зубыт не только томмез понда, но и ас понда. Нельки сы синнэзiсь петiс сола синва.

— Тiйö одö тöдö миянöс, председатель, — лöгöн орöтiс Таня. Председатель дивуйтчöмöн, а зоотехник любопытнöя видзöтiсö Таня вылö. Таня сулалiс пызан сайын и бытшкис синнэзнас председательöс. — Ме муна уджавны дояркаöн.

Видзöтöм сылöн вöлi гордöй, смелöй, сiя жö кадö позис лыддьöтны сы синнэзiсь мыйкö ласковöйö, тöдтöмö. Эта позаын сiя вöлi öддьöн бытшöм, кыдз бытьтö кай лöсьöтöма ассис борддэсö лэбзьыны вывланьö, конечтöм просторö. Танялöн сьöлöм вылас вöлi долыт, кыдз бытьтö мыйиськö сiя мезмис: локтiс кад висьтавны ассис чорыт кыв мамыс одзын и отир одзын. Сiя лоас дояркаöн, берегитас школалiсь честь.

— Вот адззат, тiйö неправöсь, — вились горöтчис зоотехник. Сiя нырыштсис веськыт кинас пызан вылö и шыннялöмöн, внимательнöя видзöтiс Таня вылö. Танялöн волнуйтчöмсянь чужöмыс рöмсялiс, пель ныввес гöрдöтiсö, и сiя уськöтчис öтöрö.

Председатель и зоотехник нем эзö вежöртö и только видзöтiсö öтамöдныс вылö. Счетовод видзöтiс аслас очкиэз вевдöрöт зоотехник вылö и горöтчис:

— Бур одзын.

Правленнёсянь Таня локтiс гортас кокнит сьöлöмöн. Пырис керкуö гажöн, шумöн, нельки мамыс невна повзьыштiс. Сiя важын ни нывсö эз адззыв сэтшöм весёлöйöн, сэксянь, кыдз нылыс пондiс уджавны кассирöн.

Мамыс Танялö сетiс письмо, кöда вöлi Светланасянь. Светлана ошшасис аслас оланöн, гижис виль операэз да балеттэз йылiсь, виль модаэз да мöдöтчаннэз йылiсь и корис городö.

Мамыс внимательнöя следитiс Таня лыддьöтöм сьöрын. Но нылыс лыддьöтiс невнимательнöя, сыбöрын небрежнöя чапкис пызан вылö письмосö и горöтчис:

— Чепуха. Мама, тэ тöдан мый? Он тöд? — Сiя кыкнан кинас кутiс мамыслiсь голясö и ыжмитiс морос бердас юрсö. — Ме талунсянь полноценнöй морт, назначитiсö дояркаöн. И тöдан кин отсалiс? Зоотехник.

Мамыс мездöтiс Танялiсь киэсö голя бердсис, лэбтiс синкыммесö и мöдiс мыйкö öбиднöйö горöтчыны нылыслö, но кыдз бытьтö виньдiс. Внимательнöя видзöтiс нылыс синнэзö, кöдна югьялiсö конечтöм счастьеöн, ыш ловзисис, сыбöрын, кыдз бытьтö сiдз, юалiс:

— Кытшöм эшö зоотехник?

— Серёжа, — Таня чуть гöрдöтыштiс да содтiс, — Серёжа Петрович Хозяинов. Тэ сiйö тöдан. Городсянь локтiс миянö уджавны.

— Мый нö сэсся, ежели умыс етша, — кезöтчöмöн горöтчис мамыс.

Сылö сьöкыт вöлi вежöртны, что учёнöй отир пондiс локны городсянь деревняö. Мамыслö некöр вöлi одзжык думайтны эта йылiсь. Сiя добросовестнöя пыр уджалiс колхозын и думайтiс нылыс счастье йылiсь.

Мамыслö сьöкыт вöлi вежöртны, кыдз вежсис колхозын оланыс. Эз казяв, кыдз отирыс мöднёж пондiсö думайтны счастье йылiсь.

— Ой, нылiньöй, видзöт одзат и бöрат — может ме нем ог вежöрт. Таня бöра кыкнан кинас ыжмитiс мамыслiсь юрсö морос бердас и пыма лолалiс сы пель одзын. Таня вöлi счастливöй, сылöн моросыс пыдына лолалöмсянь чочком кофточка увтын то лэбтiсьлiс, то ямлiс. Шёлковöй чикиссес водiсö спина кузя косöдз и пежьялiсö шондi вылын. Кузь да тшöк синлыссэс бахромаöн вевттисö сылiсь синнэсö. Мамыс кылiс Танялiсь пыма лолалöмсö и сьöлöмлiсь токöтöмсö. Сiя старайтчис вежöртны, мый керсьö нылыс сьöлöмын, оланын, гöгöр.

Ашынас, кöр только эшö Кузьма Мыс увтсянь шондi козьныштiс ассис медодзза югöрресö, Таня котöртiс фермаö. Сiйö гажöн панталiсö дояркаэз.

— Но, öнi берегись, мöс вöра, сет пуд йöв каждöй лун, — горöтчис зоотехник, кöда пукалiс телега вылын и хитрöя сералiс. Только сы горöтчöм бöрын Таня казялiс, что сэтöн и зоотехник. Сiя перво кыдз бытьтö öшис, а сыбöрын серöмтчис.

— Но, Татьяна Никитична, лок примит группа. А сыбöрын кык час кывзан лекция, сёрöнжык практикуйтчан мöс вöра вылын, а зачёт примита сэк, кöр пудöн йöв пондан чилькöтны каждöй мöссянь, — сё öтмоз сералiс зоотехник.

Танялö сьöкыт вöлi пондöтчыны уджавны. Висисö пельпоннэз, спина, чилькöтчытöн дубалiсö чуннез. Таня умöльтчис. Асылöн саймыны вöлi сьöкыт, он нырыштiс кровать бердö изöн. Но Таня эз сетчы, уджалiс, думайтiс, кыдз содтыны удойез.

Сэксянь, кöр локтiс зоотехник и Таня пондiс уджавны фермаын, чулалiсö кык месяц. Сергей Петрович внимательнöя следитiс Таня удж сьöрын, отсалiс советöн, велöтiс и ачыс эз казяв, кыдз голубöй сина нывка пондiс сылö гленитчыны. Этö чувствуйтiс и Таня. Зоотехник часто пондiс дырöнжык сулавны Таня дынын, пыдына видзöтны сы синнэзö.

Таня чувствуйтiс асьсö счастливöйöн, полноценнöй мортöн. Но медгажа вöлi сiя луныс, кöр Таня первуись пуктiс мамыс киэзö ассис заработок — деньга. Мамыс дыр видзöтiс виль сотенкаэз вылö, сыбöрын петiсö синваэс и окалiс нывсö. Эта коста жö только чыв-пав пырис мамыслöн подружка — Марфа и порогсянь пондiс клопöтны киэзнас кыз боккес кузя:

— Настасья, Настасья, мый жö сэтшöмыс лоöм? Светка гортö локтiс. И только öтiк узелокöн. Вежöртан, только öтiк узелокöн. Мый эд то лоöма. Жöникыс сы дынiсь мунöма и Светкаöс, бессовестнöй, нач деньгатöг кольöма. Шуö, уджав пö, ачыт шедты деньга. Государстволö пö уджалiсь отир колö. Государство... Бытьтö государствоыс Светка туйö отирöс оз адззы... Неужели Танялö сымда деньга колхозын сетiсö? Восемьсот, шуан, и эшö трудоденнез?.. И Феликсöс институтö эзö примитö, провалитiс экзаменнэз. Вот тэнат Таня правильно керис, а то бы мунiс городö, юрсö öштiс, кыдз Светка.