Дизелдік отынды гидротазалаудың технологиялық схемасы.

Дизелдік отынның тікелей айырудағы фракциясы (230-350°С) шикізат болып табылып, атмосфералық айыру блогынан Н-301 сорабының қабылдауына (1.9 сурет) келіп түседі де цикуляцияланушы сутекқұрамды газбен араластырғышына беріледі, соңғысы ЦК-301 центрдентепкіш компрессорына келіп түседі. Газ-шикізатты қоспа Т-301 және Т-303 жылуалмастырғыштары арқылы өтеді де, мұнда реактордан келетін газ-өнімді қоспа ағынымен жылытылып, П-301 құбырлы пешіне келіп түседі. 380-400℃ дейін қыздырылған газ-шикізатты қоспа Р-301 реакторға келіп түседі де, мұнда алюмо-кобальт-молибдендік катализаторда күкірттік және азоттық қоспаларды гидрлеу жүреді. Газ-өнімді қоспа Р-301 реакторынан Т-301 және Т-303 жылуалмастырғыштың құбырлы кеңістігі арқылы өтіп, мұнда аз жылуын газ-шикізаттың қоспа ағынына береді де, Х-301 ауа суытқышында және Х-302 су жете суытқышында суытылады. 30-40℃ дейін суытылған газ-өнімді қоспа С-301 сеператорына келіп түседі де, мұнда ол тұрақсыз гидрогенизат пен циркуляцияланушы сутекқұрамды газға бөлінеді.

1.9 сурет. Дизелдік жанармайды гидротазалаудың технологиялық схемасы:

Н-301, Н-304, Н-309 сораптар; П-301-пеш; Р-З01- реактор; К-301- булау бағанасы; К-302- сутекқұрамды газды тазалау абсорбері; К-303-көмірсутектік газды тазалау абсорбері; К-308-бензиндік айырмадан көмірсутекті үрлеу бағанасы; ЦК-301-центрдентепкіш компрессоры; Т-301, Т-303, Т-304 -жылуалмастырғыштар: X-301, ХК-301 ауамен суыту аппараты; Х-302, Х-303- су жете суытқышы; С-301; С-302, С-303 -сеператорлар.

Тұрақсыз гидрогенизат Т-304 жылуалмастырғышы арқылы булау бағанасына К-301 ағып өтеді де, ал сутекқұрамды газ С-301 сеператорының жоғарғы бөлігінен күкіртсутектен маноэтаноламин (МЭА) ерітіндісімен тазалауға арналған абсорберге К-302 келіп түседі. Тазаланған сутекқұрамды газ К-302 абсорберінен қабылдау сеператоры арқылы компрессордың ЦК-301 қабылдауына келіп түсіп, әрі қарай шикізатпенен араластыруға беріледі. Сутекқұрамды газды керосинді гидротазалаудан С-303 беру мүмкіндігі бар. Сутегінің берілген концентрациясын ұстау үшін (схемада жоқ) таза сутекқұрамды газды беру қарастырылған. Қаныққан МЭА ерітіндісі абсорбердің К-302 төменінен МЭА регенерациялау блогына бағытталады.

Тұрақсыз гидрогенизат сеператордан С-301 жылуалмастырғыштың Т-304 құбырлы кеңістігі арқылы тұрақтандыру бағанасының К-301 14-ші немесе 20-шы табақшасына беріледі. Т-304 жылуалмастырғышында тұрақсыз гидрогенизат тұрақты дизельдік жанармай жылуымен қыздырылады. Бу және газ фазасы К-301 бағанасының жоғарғы бөлігінен шығып ауа конденсатор-тоңазытқышынан ХК-301 өтеді. Конденсат С - 302 сеператорына ағып өтеді де, газ сұйықтан, ал бензин судан бөлінеді. Бензиннің бір бөлігі сеператордан С-302 Н-304 сорабыменен К-301 бағанасын себелеуге беріледі. ал артық бөлігін керосинді гидротазалаудан келген бензиндік фракциямен араластырылып күкірт сутектен үрлеу үшін К - 308 бағанасына беріледі.

Көмірсутекті газ сеператордың С-302 жоғарғы бөлігінен күкірт сутектен тазарту үшін абсорберге К-303 келіп түседі. Тазалау 15% МЭА ерітіндісі К-303 бағанасының төменгі бөлігінен регенерациялауға бағытталады. Тазартылған көмірсутекті газ абсорбердің К-303 жоғарғы бөлігінен қондырғыдан шығарылады да, ал бір бөлігін К - 308 бағанасына бензиннен күкіртсутекті үрлеу үшін беріледі. Тазартылған бензиндік фракция К-308 бағанасының төменгі бөлігінен реформингтеу секциясына айдамаланады, не болмаса атмосфералық айыру шикізатының желісіне беріледі. Ласталған көмірсутектік газ керосинді гидротазалау секциясына бағытталады.

Гидротазартылған тұрақты дизельдік жанармай К-301 бағанасының төменгі бөлігінен шығарылып Т-304 жылуалмастырғышының құбыраралық кеңістігі арқылы өтіп, мұнда тұрақсыз гидрогенизатқа өз жылуын береді де, соңынан ауа тоңазытқышында X -303 50°С дейін суытылып дайын өнім паркіне жөнелтіледі.