Кыдз ме винакöт дугдi тöдчыны 18 страница

Сельсоветiсь председатель юасис гöсьлiсь, поди пö, перво сёйыштам, а сыбöрын и отиркöт пантасям.

Генерал-министр охотаöн согласитчис, что бур бы перво и сёйыштны, а сыбöрын и уджалыштны. Но мыйкö баитыштiс сiя морткöт, кöдыкöт локтiс и вежис ассис решеннё:

— Но, хозяин, добрöй морт, мыччав инö ассит хозяйство, — генерал горöтчис председательлö.

Председатель митiс киас кепкасö и юалiс: «Перво пруд видзöтам. Быд год леспромхоз кылöтö вöр Кумва кузя, а плотинасö оз воч. Плотинаыс оз ни вермы прудсö видзны.»

Локтiссез и панталiссез мунiсö плотина кузя. Председатель норасис леспромхозiсь бюрократтэз вылö.

Генерал мыйкö баитыштiс аслас морткöт и висьталiс, что отсалас вочны плотина. Сыбöрын мунiсö, кытöн строитсис больница.

Председатель бöра пöртчис казанскöй сиротаö и норасис, что кык год ни строитöны больница и некыдз озö вермö кончитны. То кирпич абу, то цемент, то деньга. Некин оз отсав: не район, не леспромхоз.

— А кытшöм отношеннё леспромхозлöн больница дынö? — чорыта юалiс генерал-министр.

— А кыдз жö? Татöн больницаын не токо селяна лечитчöны, но и леспромхозын уджалiссез. Спасибо Степан Бушуевлö, царство сылö небеснöй, сiя бура отсалiс больницалö, а öнi виль бюрократтэс, — чульс сьöвзис бокас председатель и мымдакö кежö лöнис да бöра горöтчис: — дона гöсь, шуганит жö тэ районiсь и леспромхозiсь начальствосö, мед отсалöны строитны больница.

Дона гöсь сетiс кыв, что отсалас строитны больница. И сэк жö думайтiс, не простöй пö эта председатель, хитрöй руч. Тырмас ветлöтны объекттэз кузя, то сiя эшö не этö корас, и висьталiс председательлö, что локтiс пö кад сёйны.

Председатель гöсьсö пыртiс столовöйö. Кöр нёджжöвтiс гöсь пызан вылö, киэсö павдöтiс, гажöна серöмтчис да горöтчис:

— Ба, да татöн министерскöй пызан.

— Старайтчим, старайтчим, дона гöсь, — паныт видзисö ответ активисттэз.

— Эта эшö не быдöс... Эшö баня лоас сур-брагаöн, — ошшасис коммунальщик.

Генеральнöй директор думайтiс ас кежас, что бертас областьö, «пывсьöтас» баняын ассис уджалiссесö эта спектакль понда.

Пондöтчис пир.

 

II

 

Министр Вениамин Константинович вежис ассис решеннё, мунас пö горт селоö машинаöн. Унажык пö адззыла.

Сотня гöгöр километр катыльтчисö машина вылын асфальта туй кузя. Мелькайтiсö челядьсянь тöдса ыббез, видззез, расоккез, юоккез. Моросын ёткöтiс сьöлöм. Важын ни эз вовлы гортö, причинаэз вöлiсö, и вот только öнi шедiс кад видзöтны ассис посад, ветлыны аймамыс шойна вылö, сетны зонсянь поклон.

Неыджыт мыс вывсянь мыччисис дона горт Кумва. Гöрд, зелёнöй, чочком крышаэза керкуэз вöйисö зелёнöй сад пытшкö. А вот графскöй парк. А вот югьялö пруд, ордчöн «Учöтик Швейцария», сэтчин, саясжык, сад.

Сибöтчисö Кумва дынö. Вениамин Константинович шофёрыслö висьталiс, кай пö селоö и сувтöт машинатö школа дынö.

Министр петiс машинаись и кайис невылын мысок вылö, кытöн кöззэз, нинпуэз да баддез коласын тыдалiсö шойна кресттэз. Могильник вылын мужикыс недыр сулалiс аймамыс шойна одзын, сувтiс пидзöс вылас и сетiс лажмыт поклон, пуктiс ыбись летöм цветтэз и иньдöтчис посадö.

Мый сiя адззис, аслас синнэзлö эз верит. Керкуэз пиньöвтчöмась, палисадниккез пöрöмась. Главнöй улица вылын гырись ямаэз. Вились строитöм керкуэз комолöйöсь, наличниккезтöмöсь. Вениамин Константинович думайтыштiс, что эстöн сулалiсö кудриа баддез, ны местын токо сiсьмöм мыррез. Пруд тырöма осокаöн, лоöм учöтик. Плотина вылын вöлi садитöм нинпуэзiсь, горзiсь баддезiсь аллея. Сы местаын бöра жö только мыррез.

Пыралiс сельскöй паркö, кöдö эшö графлöн лесничöй садитöм быдкодь пуэзöн да кустарниккезöн. Быд пу сулалö линия вылын. Парк тожö пöрисьмöм. Весöттöм. Гражданскöй да Отечественнöй войнаэз вылын вийöммезлö памятниккез пиньöвтчöмась и тырöмась ёгтурунöн. Некинлöн татчö не кок не ки абу сибалöм.

Только öтiк строеннё сё сэтшöм жö гажа, мича, кöдалö сотня годся унажык ни — школа. Сiйö строитöм граф Строгановлöн управляющöй крестьянскöй челядь понда. Торговöй ряд разьсьöм. Магазиннэз вöйöмась муö. Арболит плитаэзiсь виль магазин вачкисьö сарай вылö. Эстöн жö сулалö пожарнöй каланча, кöдалöн юрыс вот-вот усяс.

Вениамин Константиновичлö лоис недолыт. Моросыс измис, горшас кайис комок.

Министр мунiс школаö. Сэтöн порядок. Быдлаын сöстöм, öшыннэз вылын цветтэз. Челядь перемена коста гöгöртiсö тöдтöм мортöс и юасисö кин сiя. Мортыс висьталiс, что уна год ни чулалiс, кöр сiя эстöн велöтчис, но нельки партасö, кöда сайын пукалiс, öнöдз тöдö. Челядь сералiсö, горöтлiсö, что партаэз нылöн нач вильöсь, öнi важжес абуöсь ни. Челядь висьтасисö, что нылöн эм школьнöй музей и сэтчин быдöнлöн, кин кончитiс школасö медальöн, эмöсь фотографияэз, и кыскисö сiйö сэтчин.

Челядь ватагакöт тöдтöм морт пырис музейö, и быль казялiс учöтик фотография, сы увтö гижöмась: «Чирков Веня, — и дженытик биография: профессор, лауреат, министр».

Сьöд синока боёк нылочка чуньнас тюкнитiс фотография вылö и гажöна горöтчис:

— А ме тöда кин! Тэ Веня-министр.

Нывкалöн кыввез «Веня-министр» кыдз тöвчикöн паськалiсö школа пыр. Челядь сiйö гöгöртiсö, чирзiсö, сералiсö, горöтлiсö: «Миянö Веня-министр локтiс!» Учительскöйись петiсö велöтiссез и казялiсö тöдтöм мортöс. Томыник учительница сибöтчис тöдтöм гöсь дынö, здоровайтчис и юалiс, кин сiя.

Мöдыс отвечайтiс: «Ме тiян велöтчись, не лично тiян, а эта школалöн».

А кытшöмкö зоночка, кыдз чужмöр, горöтлiс: «Веня-министр, ми тэнö пантавны лöсьöтчим, нельки школа гöгöр и улица чышким».

— А если бы министр эз лок, сэк бы эд чышкö?

— А эгö бы. Ми праздниккез кежö токо весöтам, — кинкö горöтчис челядь коласiсь.

Учителлез школаись неöтпыр, стыдöн, жалейтöмöн висьтасясö, кыдз школаö вовлiс министр.

Школаын ветлöтöм бöрын министр мунiс больницаö. Главнöй врач, Пётр Семёнович, ен вылö вачкисись морт, ласковöя панталiс гöсьöс. Сiя сэкжö тöдiс коллегаöс, кöдакöт öтлаын велöтчис. Нiя дыр баитiсö, касьтылiсö, кыдз быдмисö, велöтчисö, кыдз öнi олö село, норасис, что виль больница озö вермö строитны, медоборудованнё важ, умöль. Здравоохраненнё вылö правительство етша сетö деньга. Сiя жö висьталiс, что талун вовлöм ни кытшöмкö министр, видзöтöм виль строиттöм больница и мöдöм отсавны. Ачыс эта пора керöм операция, и абу вермöм сыкöт пантасьны.

Вениамин Константинович видзöтiс аптека, пыралiс йöв заводö.

Луншöр бöрын отир öксьöмась Дом культурыын пантасьны асланыс земляккöт. Томмез сiйö озö тöдö, а пöриссес, кöдна сыкöт велöтчисö, нiя сэк жö сiйö тöдiсö.

Вениамин Константинович эшö эз ешты пырны клубö, сiйö гöгöртiсö селяна, здоровайтчисö, дивуйтчисö, юасисö. Молодец пö тэ, Веня, эн вунöт горттö, эн вунöт аймамытлiсь могилаэз.

Селяна, мый вöлi сьöлöм вылын, веськыта пöрöтiсö министр одзын. Ачыт пö адззан, мый кольччис кöркö зелёнöй, город кодь селоись. Туйез, улицаэз разьсисö, керкуэз сувтöтöны, кинлö кытчö гленитчö, некытшöм лад абу. Важ керкуэз пöлiньтчöны, некин оз воч. А эд миян селоыс сералiс, городiсь нарошно вовлiсö шоччисьны, саддэзын гуляйтны, купайтчыны, пруд вылiсь чери вугравны.

Эта коста кинкö горöтчис, кытöн нö пö председательыс, кык лун модис, министрöс пö колö буржыка пантавны.

Зоночка, даскык годся не унажык, петiс отир одзö и висьталiс: «А ме тöда кытöн! Сiя мöдiк министрöс, генералöс гöститöтö. Вина столовöйын юöны».

Пётр Семёнович, больницаись главнöй врач, котöртiс столовöйö. Гöссез, актив да председатель пукалiсö, гажöна баитiсö, öмтырöн сёйисö пызан вылiсь и юисö вина.

— А, здорово, Пётр Семёнович, как раз только локтiн, пуксьы пызан сайö, — код кодь ни председатель приглашайтiс врачöс.

— Ёрттэз, извинитö менö, что ме сора тiянлiсь компания. Министр, Вениамин Константинович Чирков, миянö локтiс. Öнi сiя клубын, отиркöт сёрнитö.

Морттэз, кöдна пукалiсö пызан сайын, öммезнысö осьтiсö и некытшöм кыв эз вермö горöтчыны. Председатель кыдз кыз онiсь саймис, юрсис нöбасис кодыс, мыкталöмöн юалiс, кин пö локтiс. Врач эшö öтпыр висьталiс.

Гöссез чожа чеччисö пызан сайись, крест-накрест «спасибо» висьталiсö и чожа нiйö вертолёт лэбтiс небоö.

— Ох, и ляпитчим, стыд и срам, — кинкö актив коласiсь лёбис, — этö тэ, председатель, виноват, быд шляпаын министрöс адззан, — кöритiсö председательöс.

Сё жö председатель, сылöн актив мунiсö пантавны министрöс. Но клуб дынын вöлiсö только нёль-вит морт, и нiя горöна ошкисö ассиныс дона землякöс.

Председатель гусьöнмоз, кыдз сурттöм пон, сибöтчис морттэз дынö и сiдз жö гусьöна, мыкталöмöн, юалiс, кытöн нö пö министрыс? Кинкö лэчыт кылöн вундыштiс: «Кöр тэ пируйтiн, сiя тю... тю... машина вылын нöбасис».

 

КУРИЧА СВАТ

 

Тi тöдат Масляковöс? А-а, одö тöдö? Ме сэк висьтала сы йылiсь. И быдсöн менам басниын быль. А если меным од веритö, кежавлö миян бригадаö. Бригадаись быд морт висьталас, что ме ог бöбöтчы.

Дак вот... Масляков эшö неважын миян бригадаын уджалiс бригадирöн. Бригадаын сiйö юралiсьöн величайтiсö, мыля стрась любитiс асьсö ошкыны, что сiя öддьöн образованнöй, быдлаын ыджыт пост вылын пукалöм: бадь кулиссез бригадаöн командуйтöм, баняын завхозöн уджалöм и курöггез начкылан цехöн веськöтлöм.

Масляковлöн вöлi эшö öтiк страсть. Сiя любитiс собраннёэз керны. А кыдз сiя ны вылын тарзис! Пондас баитны — öмсис дульыс бусöн резсьö. А баснисö сэтшöм кыввезöн каттяс, что ме и висьтавны ог вермы: колхозлöн диалектическöй материальнöй экономика... Мед сiя неладнöй, ог куж висьтавны, кыввез гардчöны.

А если бригадаись успеххез йылiсь пондас баитны — ми коммунизмын ни олам — быдсöн волькыт да мича, только сьыв да йöкты. А кыдз кинкö сiйö öмалас, что кыдз жö быдсöн бур, кöр бригадаын гектар вывсис сюыс медъетша усьö. Эд думайтö, что Масляков гöрдöтас. Адззас паныт сэтшöм кыввез, кöть кок вывсит усь. Горöтчас, миян пö бригадаын лаборатория анализ сьöртi почваыс медтощöй. Вот сiйö и кут.

Масляков хитрöй... Медбы кылыс эшö буржыка бергалiс и совестьтöг бöбöтiс, быд лун гыркас тагья брага кисьтiс. Этö пö колö здоровье понда и медбы нерввез эз ныжмö.

Сылöн мывкыдас эшö вöлi öтiк тор. Кужис синнэз пöртмавны. Не-е-е... Эд думайтö, что сiя ылöстiс гипноз йылiсь. А кужис бöрись коккез вылын, кыдз циркись пон, колхозiсь руководителлез одзын сулавны. Миян колхозын öтiк-мöдiк öддьöн радейтöны сэтшöм отирöс.

Бригадаись колхозниккез неöтпыр сувтöтлiсö правленнё одзын вопрос — Масляковöс вашöтны бригадирись. Да кытчö тэ — дружоккес дорьясö, кытшöм пö тiянлö эшö толковöйжык да образованнöйжык юралiсь колö. Сiдз и шуöны — юралiсь пö колö.

Локтiс ытшкисян страда. Луннэз мичаöсь, шонытöсь — сьöлöм öгралö, жилаэзын вир пизьö.

Колхозниккез страда кежö кыдз праздникö мöдöтчисö. Коробьяэзiсь кыскисö медбур паськöм.

Первöй лунö быдсöн бригадаöн отир лэдзчисö страдуйтны видз вылö. Гажаöсь миян видззес, быдкодь цветöн нёджжасьöны, ма дукöн нырö вачкöны. А туруныс, туруныс косви, литовка увтын сильканöн звонитö. Видззез коласöт непаськыт, но пыдын ю чуклясьö. Уджалам-радуйтчам. Гажа песняэз сьылам.

Павжун коста казялiм, миян юралiсь керöс вывсянь коклидзиммезнас увланьö гижö, видззез вылö страдуйтны лэдзчö. Адззам, бöра код ни локтö. Дзурликасьöмöн лэдзчис ю дорöдз. Видзöтiс öтöр-мöдöрö, пыжжез абуöсь. Сэк сапоггесö коккезсис чапкис, вешьян коккесö пуджис, перво öт кокнас, сыбöрын мöд кокнас ваас, а вуджнытö юсö мывкыдыс эз судз.

Мымдакö жöдзис берег дорын и пондiс горöтлыны ю сайсянь, медбы собраннё вылö ытшкисиссез чукöртчисö. Колхозниккез готсьöны-ваксьöны юралiсьыс вылын и чукöртчöны ю берег дорö.

Масляков öт ю берег дорын, отир — мöд берег дорас. Масляков пондöтiс собраннё.

Перво киэсö павдöтлiс, сыбöрын чуньнас тюкнитiс кымöрлань и пондöтiс басни: «Миян мудрöй правленнё юралöм сьöртi и не умöльжык менам юралöм сьöртi — тi талун ытшкисят. — Сiя кыскис кармансис винаöн бутылка и горöтчис: — Поздравляйта тiянöс страдаöн. Тiян здоровье понда». Масляков бутылка голюксö сюйыштiс öмас, пöрöтiс вина и рякöстiс: «Кинлö эшö колö?»

Эта коста кысянь и мыччисис ыджыт витикöн чукыльтчöм сюрреза Курича сват. Эта миян бригадаись колхознöй баран, челядь сiйö сiдз нимкодялöмась.

Баранлöн Масляковся унажык мывкыдыс, стрась оз любит коддэзöс. Кыдз только кылас, что кинкöсянь вина либо самогон дукöн вачкö, вöтчас и коккез вылiсь пöрöтас.

Курича сват сибöтчис Масляков дынö матöжык, сыбöрын петитчис-петитчис да кыдз татшкис сiя местаö, кысянь коккез быдмöны, только и адззылiм Масляковöс. Ю вылын öтöр-мöдöрö круггез котöртiсö, да сiя местаын, кытчö юралiсь сунгисис — ваполлез потласисö. Колхозниккез нельки повзисö, вот пö беда шогмис — вöйис Масляков. И сэтöн жö ва пытшкись, кыдз вакульлöн, бригадирлöн юрыс мыччисис. Лягушка моз виклясис берег дорöдз, кынöм вылас кыссис кöс му вылöдз и пуксис, кыдз лёшмöм гоб. А кинкö сылö горöтчис: «Масляков, бур баняöн тiянöс!»

Масляков киэзнас тiльыштiс синнэзсö и пондiс кулакнас грöзитны колхозниккезлö.

Эта спектакль бöрын, кыдз колхозниккез одзжык эз казялö, отир одзö петiсö председатель и райкомись инструктор. Нiя кутчисö поздравляйтны отирöс страдаöн.

 

МУЗЕЙЫН

 

Музейын самодеятельнöй художниккезлöн выставка. Отир чукöрокöн видзöтöны картинаэз, кытöн художниккез рисуйтöмась краскаэзöн пейзажжез, натюрморттэз, жанровöй картинаэз, знатнöй отирлiсь портреттэз, карандашöн керöм рисуноккез да лепитöм скульптураэз.

Экскурсовод, том нывка, очкиэза, бытшöм, сьылана голосöн старайтчö вежöртанажыка висьтавны быд картина да скульптура йылiсь.

Нывка мыччалiс указкаöн öтiк картина вылö, кытöн вöлi рисуйтöма важ гуна.

— Ёрттэз, вот эта картина вылын художник мыччалö, кыдз кöркö крестьяна вартiсö сю. Видзöтö, кыдз мыдзöм инькаэз вартаннэзöн пыркöтöны кольтаэзiсь небогатöй урожай.

— Сiдз и вöлi одзжык. Лунтыр вартiсян, а сюсö пыркöтан öлöдз мымда, — горöтчис старуха.

Экскурсовод висьтасис одзлань:

— А вот эта картина вылын художник мыччалö деревняын виль олан. Адззат, кытшöм гажа чужöмаöсь отир машина вылын мунöны уджавны. Нiя сьылöны, шутитöны, нiйö радуйтö удж.

Музеяс посетителлез гогинялiсö юррезнаныс, соглашайтчисö экскурсоводкöт.

— А вот этö картинасö гижис том художник, сiя ачыс уджалö колхозын механизаторöн. Сiя аслас картина вылын мыччалö том, бытшöм нывкаöс, кöда вот-вот только получитöм орден уна йöв высьтöм понда. Сылöн подругаэзыс радуйтчöны сы понда да поздравляйтöны наградаöн. А öнi, ёрттэз, мунам одзлань.

Экскурсовод группасö нуöтiс неыджыт залö. Посетителлез ыджыт интересöн видзöтiсö картинаэз и ошкисö художниккезöс.

— Ёрттэз, ёрттэз, матöжык чукöртчö, — ласковöя корис экскурсовод. — А эстöн залас картинаэз унажык висьтасьöны бытовöй темаэз йылiсь. Вот этö картинасö гижис Макаров, сылö кватьдас годся унажык ни, пенсия вылын.

Отир коласiсь кинкö юалiс экскурсоводлiсь:

— Мыля шуат гижис, натьтö, рисуйтiс? Экскурсовод бергöтчис шы вылö и висьталiс:

— Художниккез краскаэзöн картинаэз не рисуйтöны, а гижöны. Вежöртiт?

Посетитель шы эз сет, бытьтö согласитчис, а сыбöрын ныр увтас бобгыштiс: «Мыля гижöны, а не рисуйтöны?»

— Висьтася одзлань, — горöтчис экскурсовод, — Макаров бура тöдö олан. Керкуын пукалö инька, эшö непöрись, видзöтö öшынö, кöда пыр адззö, кыдз отир мунöны уджавны. А сы одзын, пызан вылын, куйлö пенсионнöй книжка. Сiя тöждiсьö, что пенсия вылын. Но сы чужöм сьöртi тыдалö, что сiя сётаки котöртас отир сьöрö и ныкöт öтлаын пондас уджавны.

Кинкö кывзiссез коласiсь горöтчис, что, конечно, пенсия вылын бур, но лучше бы асывсянь рытöдз уджавны, чем пöрисьмыны.

Экскурсовод иньдöтчис одзлань и корис, медбы чöлiсö. Сiя сибöтчис картина дынö, кöда öшалiс веськыта öшын одзын, и югöрыс, кöда пырис öшынöт, усис веськыта картина вылö.

Посетителлез нёджжöвтiсö картина вылö и кинкö ны коласiсь дивуйтчöмöн горöтчис:

— Вот этö да-а...

А кинкö эшö содтiс:

— Вот лешак, кыдз ловья.

— Ёрттэз, чöлö жö, чöлö, — корис экскурсовод. — А этö картинасö гижис нач том художник, ГПТУ-ись ученик.

Кинкö бöра öмалiс экскурсоводсö:

— Вот лешак, ну и на..!

— Ёрттэз чöлö жö невна кежö, — бöра корис экскурсовод.

— Картинаыс шусьö «Получка бöрсянь». Видзöтö керку посöдзын гатш пöрöм мужик. Конечно, сiя код. Карманас тыдалö эшö недосповна юöм вина бутылка. Усялöм, нырыс и рожабаныс кульöмась. Сы одзын сулалö иньыс, кусiньтчöм, горзö, оз тöд, мый сыкöт керны. Öшынсянь видзöтöны айныс вылö повзьöм челядь. Нiя нуженöсь [12], умöля пасьтасьöмöсь. Ны учöтик сьöлöммезын ыджыт горе, что бöра айныс деньгасö эз гортö вай, быдöс юис...

Экскурсовод эшö эз ешты быдöс висьтасьны картина йылiсь, кинкö пондiс пильскыны-горзыны.

— Ёрттэз, мый лоис, кин горзö? — бергöтчис отирлань экскурсовод.

Отир рознитчисö. Угöлын сулалiс нывка-подросток и чышкис синваэсö.

Экскурсовод сибöтчис нылочка дынö и юалiс, мый пö сыкöт лоис. Нылочка эшö öддьöнжык пондiс горзыны.

— Поедь... Пьянник... Не морт... — торья кыввез горöтлiс нылочка.

Экскурсовод кывзiс нылочкаöс и нем эз вежöрт, мыля сiя горзö.

— Вот эт-а-а, пья-я-нникыс, — и нылочка мыччалiс картина вылö, — миян деревняись Ош Петра.

— А тэ то мый горзан? Кин тэныт сiя? — юалiс морт отир коласiсь.

— Некин... А менам айö сэтшöм жö пьянник.

 

 

 

ЧЕЛЯДЬЛÖ

 

 

КОЗА ДА ЧАНЬ

(Сказка)

 

Кöркö öтiк беднöй-беднöй мужиклöн вöлiсö картаын пода: коза да чанёк. Козаыслöн сюррес гырисьöсь, крепытöсь, а чанёклöн кучикыс вöснит, гöныс кокольсялöм, дженытик бурсиыс гардчöм.

Хозяинлöн туруныс вöлi етша, и сiя только кепись ыждаöн сёдлiс. Коза сёйыштас ассис пайсö и мунö чанёк дынö.

Öтпыр сiдз жö коза локтiс чань дынö и öмтырнас пондiс аклявны турунсö. Чань сылö и шуö:

— Коза, ме тэнö ог öбидитлы, тэнчит пайтö ог мырддьывлы.

Козалö эз гленитчы чаньлöн басниыс:

— Та кыдз, кокольöсь чань, ме вылын горöтлыны лысьтан! Ме татöн кыным год ни ола, и некин менö эз корит. А тэныт эшö год эз тыр, а чуктö лэбталан ни!

Чань шы эз сет. Сiя эз любит уна баитны. Козалöн только тошыс зэгöтчис. Сiя юрнас бергöтлiс и сё чаньсö повзьöтлiс:

— Видзöт менам кытшöмöсь сюррезö кымöсам, а тэнат мый эм? Кымöсыт куш. Ме кыдз данга кымöсат, сiдз и лов тэнат петас!

Чань сералiс коза вылын и шуис:

— Эн ошшась выннат.

— А давай пешлiсям, кин вынажык. Лöсьöт кымöстö, а ме сэтчö данга, — баитö коза.

— Пешлiсям,— шуö чань.

— Да тэ кымöстö улöжык лэдз, а то ме ог судз.

Чань лöсьöтiс кымöссö. Коза петитчис-петитчис, да кыдз швангис чань кымöсö, только сюррес кусiньтчисö. А чаньлöн синнэзсис бичиррез койыштiсö.

— Эшö öтпыр — баитö коза. Чань шуö:

— Тырмас. Тэ öнi кымöстö лöсьöт. Бöрам сувт.

Коза и шуö:

— Вот ылöстöм чань, кин жö бöрсяняс адззö люкасьны!

Коза эз ешты кымöссö лöсьöтны, бöрись коккезнас кыдз чань зурзис козаыс кымöс кузя, сiдз сылöн сюррес öтöр-мöдöрö и резсисö. А коза ачыс ылö черк-барк берездасис. И эта понiсь сiя неделя куйлiс.

Сыбöрын, кöр коза веськалiс, öтпыр эз öбидит чаньöс и выннас эз ошшась.

 

КАНЬ-ЧЕРИКЫЙИСЬ

 

Гришалö дас год. Арнас мунас велöтчыны куимöт классö. Айыс сылöн уджалö мельникöн. Кык турбинаа мельница сулалö ыджыт пруд дорын. Прудыс öддьöн паськыт да пыдын. Сыын олöны быдкодь чериэз, нельки кузь уса да паськыт юра горш соммез.

Гриша öддьöн любитö кыйны чери. Школьнöй аквариумö сiя ваялö ловья чериоккез. Черисö кыйны сылöн эмöсь быдкодь вугыррез: поснит и гырись понда.

Гажа луннэзö кыйö гöрд борда кельчиэз да сера песканнэз, а рытнас, кöр пруд вылö пондас лэдзчисьны кизерик туман, нильыг налиммез.

Сiя чери кыйны ветлывлiс мельница дынсянь ылöжык, кытöн черисö некин оз повзьöтлы да и ваыс пыдынжык да лöньжык. Пуксяс ыджыт пу колода вылö и быдса чассэзöн видзöтö поплавоккез вылö.

Сылöн вöлi ёрт — руд кань Мурка. Гриша öддьöн радейтiс Муркасö. Кыдз босьтас вугыршаттез, Мурка пукалö ни посöдзын, видзчисьö, кöр сiя иньдöтчас чери кыйны. Кык ёрт ветлывлiсö öтлаын чериавны. Мурка ордчöн Гришакöт пукалö колода вылын и быдса чассэзöн караулитö чериöс: оз я бöбась кытшöмкö томыник, ылöстöм пескан матöжык сибöтчыны. А кыдз бöбасяс, Мурка хлоп только вачкас лапанас ва кузя. Пескан викыльтыштас бöжнас и визывтас. Мурка гажтöма пондö видзöтны Гриша вылö аслас неудача кузя. Кöть и чери сы лапаэзö оз шедавлы, а Гришакöт пукалö.

Но Гришалö ковсис янсöтчыны аслас ёрткöт.

Делоыс вöлi сiдз. Гриша да Мурка ордчöн пукалiсö колода вылын. Чери бура шедiс, и Гриша эз казяв, кыдз шондi саясис вöр сайö. Нельки вунöтiс, что сылöн и Муркалöн кынöммезныс сималöны.

Ва вевдöрын ройезöн пондiсö лэбавны номмез, учöтик бабылоккез и быдкодь мöдiк насекомöйез. Ва кузя пондiсö визлавны ва чераннез, ваын олiсь жучоккез. Кельчиэз да песканнэз чеччалiсö ва вевдöрын и ньылалiсö ва вылiсь гаггез. Öтöр-мöдöрын бульöтiсö щукаэз да ёкышшез, нiя вашöтлiсö поснитик черисö. Чери эшö буржыка пондiс вугырö шедны, только вот сiя беда, гаггез Гришалöн бырсисö. Гриша котöртiс гаггезла, кöдна вöлiсö консервнöй банкаын кер увтын.

Муркалöн кынöмыс öддьöн сималiс. Сiя сибöтчис котёлок дынö, кытöн вöлiсö небытик песканнэз да кельчи пияннэз. Видзöтiс, видзöтiс ны вылö и кутчис нiйö лапанас бергöтлыны. Ачыс, натьтö, думайтiс: «Ежели сёя, Гриша бура видас». Бергалiс, бергалiс котёлок гöгöр и лапасö нюжöтiс песканöс кыскыны, но бöр лэдзис. А чериыслöн дукыс сiдз и пырис нырас, Муркалöн дульыс лэдзчис. «Мед кöть мый лоö», — видно, думайтiс Мурка и перыта гыжсö мöртiс песканö. Котёлок нильдiс и быдсöн черинас ваö пöрис.

Чериэз пондiсö кывтны ва вылöт кынöммезнаныс ва вевдöрын. Пустöй котёлок тырис ваöн и лэдзчисис пыдöсö.

Гриша бертiс, адззö — не чери, не котёлок абу. А Мурка чöскыта нювсис и виноватöя видзöтiс другыс вылö. Сiя нюжлалiс лапасö ва бердö и вашöтлiс ва чераннезöс. Гришалö жаль вöлi черисö, но нем он кер, и проститiс Муркасö.

Гриша одзлань пондiс вуграсьны. Вдруг сы синнэз вылö усис страшнöй чери: юрыс паськыт да сьöд, кузь уссэс виклясьöны и гырись синнэс веськыта видзöтöны Гриша вылö. Гриша эз ешты думайтны, что эта, натьтö, сом, кыдз чери вачкис бöжнас ва кузяс, и чочком быгöн вевттисис ваыс. Пондiс кывны Муркалöн нора горзöм. Гриша нёджжöвтiс бокас, а каньыслöн и след абу. Сыбöрын видзöтö, Муркаыс ва вылын то вöйö, то лэбтiсьö. Гриша пондiс горöтлыны: «Мурка, Мурка, тэ кытчö?» Ва пизис да бульöтiс, и Гриша эшö öтпыр кылiс Муркалiсь нявзöмсö. А сэсся Мурка öшис ва пытшкö. Гриша вежöртiс, что Муркаöс пышшöтiс сом.

Гриша бертiс гортас гажтöм, Муркатöг, котёлоктöг и черитöг.

 

НОМ ДА РОСЯНКА

 

Ном чужис нюр шöрын, вундасян осока лист увтын. Петiс учöтик, учöтик кольть пытшкись и сэк жö пондiс кынöмыс вирöдз симавны. Дюттясьыштiс юрси кыза кузь коккез вылас, паськöтiс шучтыдалан бордоккесö и дзингöмöн лэбзис сёян кошшыны.