XVII л е к ц и я: Улыс классъясын гижанногö велöдöм

1. Гижанногö велöдöмлöн лингвистика подувъяс.

2. Орфограмма, налöн сикасъяс.

3. Орфография правилö.

4. Орфография действие, сылöн тэчас.

5. Орфография навык

 

1. Гижанногö велöдöмлöн лингвистика подувъяс.

Комиын кыв гижанног мыджсьö нёль подув вылö:

1) Фонетика подув

2) Роч кывъяс гижан подув

3) Кывъяс торйöдан, либö дифференцируйтан подув

4) Морфология подув

 

Фонетика подув серти гижигöн кыв гижсьö сідзи, кыдзи кывсьö. Быд шы петкöдлыссьö торъя шыпасöн. Коми кывйын тайö медшöр принцип. 1955 вося коми кыв учебникын [СКЯ 1955] пасйöма, мый 98% кывйыс гижсьö фонетика принцип серти. Тайö лым, пу, би, лыд, пань, важ, олöм, вотöс, корны, серавны.

Роч кывъяс гижан подулöн вöдитчöм паныдасьö сэк, кор комиын кывсö гижам сідзи жö, кыдзи и роч кывйын. Тайö щöтка, ещö, ящик, колхоз, совхоз, циркуль, фломастер, компьютер, Кронштадт, Санкт-Петерберг.

Торйöдан, либö дифференцируйтан подув паныдасьлö ыджыд да ичöт шыпас гижöмын, öтлаын да торйöн гижöмын, медым торйöдны öта-мöдсьыс омоним сяма петкöдчöмъяс.

Ыджыд да ичöт шыпасъясöн торъялöны нарицательный да ас нимъяс ыб да Ыб (сикт ним), ичöт Анна – Ичöт Анна (Ичöт Прöзвище). Торйöн да öтлаын гижöмöн торъялöны синтаксисысь кывтэчасъяс сложнöй кывъясысь. Унджыкысьсö сложнöй кывъяссö артмöдöны топонимъяс, ботаника терминъяс, пемöс нимъяс. Торйöдан принцип серти гижсьöны вöркань (öд вермас лоны и кывтэчас вöр кань), сьöдбöж ΄горностай΄, урбöж (турун), сьöдкай, Лымва, Тыдор, Вадор, Шорйыв, Шорсай.

Морфология вылö подуласьöмöн гижöд ковмывлö сэк, кор кывйын мунöны кутшöмкö ассимиляция сяма лоöмъяс да колö кывсö юклыны морфемаяс вылö, мед стöча гижны сійöс. Тайö гежöда паныдасьлысь петкöдчöм, кор оз лöсявны öта-мöдыскöд шуöм да гижöм. Сідз, шуам [ кыжжык ], а колö гижны кызджык, сы понда мый тані эм кыз кыввуж да – джык суффикс. Татшöмöсь [лöжжык] – лöзджык, [соч΄ыны] – сотчыны, [тач΄ö] – татчö, [мечч΄öскыд] – медчöскыд.

Кыв гижöмысь кындзи гижанног видлалö и öти визьысь мöдö кывъяс вуджöдöм. Орфографияын лöсьöдöмаöсь и примитöмаöсь визьысь визьö кыв вуджöдан правилöяс.

 

2.Офограмма, налöн сикасъяс.

Орфограмма – сійö кывйын, а сідзжö кывъяс кост гижöдын сьöкыдлун, «öпаснöй места». Сійöс правильнöя гижöм могысь колöны орфографияысь тöдöмлунъяс. Орфограммаöн вермас лоны шыпас, шыпас чукöр (ддз), визь (дефис), сложнöй кывъяс да суффиксоидъяс öтлаын гижöм.

 

Орфограмма вермö лоны

1) Йитчöмаöн графикакöд кöні соблюдайтчö графикалöн а) слогöвöй принцип серти небыдлун пасйöм нюр, сюр; б) небыдлун пасйöмын ь вöдитчöм: кось; в) кык дз пыдди ддз гижöм; г) i пасйöмын; д) е, ё, ю, я вöдитчöм: ёсь, югыд, яр;

2) Гижанногын примитöм правилöяс да условиеяс: а) öти визьысь мöд визьö кыв вуджöдöм; б) собственный нимъясын заглавный шыпасöн вöдитчöм; в) рочысь пырöм кывъясын ф, х, ц, щ гижöм; г) кыв шöрын кык торъя небыд согласный костын ь гижöм (разьсьö, додьсьыс); д) тч, дч, чч кадакывйын гижöм.

3) Грамматикаöн подулалöм гижöд:

А) сложный кывъяс гижöм

Б) мед – кывводз, - кодь суффикс кывбердын гижöм

 

Орфограммаяс

Улыс классъясын велöдан орфограммаяс

- чорыд параа д з л н с т бöрын і

- чорыд параа д з л н с т бöрын э

- небыд пара д΄ з΄ л΄ н΄с΄ т΄, а сідзжö ч, дз бöрын - яс водзвылын торйöдан ь

- небыд пара д΄ з΄ л΄ н΄ с΄ т΄ бöрын кыв помын да слог помын ь

- небыд пара д΄ з΄ л΄ н΄ с΄ т΄ бöрын е ё ю я и

- дж, тш, дз шыяс кык шыпасöн пасйöм

- чорыд согласнöйяс бöрын е ё ю я водзвылын торйöдан ъ

- рочысь пырöм кывъясын фхцщ шыпас

- визьысь визьö кыв вуджöдігöн öти шыпас водзö (визьö) вуджöдöм (либö кольöм)

- кывбöра эмакыв, нимвежтас

- мед кывбердкöд (медъён)

- кодь кывбердкöд (ыджыдкодь)

- дчтччч кадакывйын (сотчö)

- ог, он, оз кадакывкöд (ог мун)

- кык öткодь небыд согласнöйлысь небыдлун петкöдлöм (килльыны)

- кык торъя небыд согласнöйлысь небыдлун петкöдлöм (разьсьöма)

- тэчаса (сложнöй) öтувтан вежöртаса эмакыв (керка-карта)

- тэчаса (сложный) выль вежöртас артмöдысь эмакыв (турипув)

- тэчаса (сложный) эмакыв, öти юкöныс кö оз паныдасьлы öнія кывйын

- тэчаса (сложнöй) рöм петкöдлысь кывберд (кельыдгöрд)

- кык кывйысь артмöм кадакыв (пырны- петны)

- кык дз-а кыв (кыддза рас)

- ас нимъясын ыджыд шыпас (Сыктывкар)

- повторяйтчысь кывъя либö кыввужъя тэчаса кывберд (ёнысь-ён)

- кодь кывбердкöд (ёськодь)

 

3. Орфография правилö

Гижанног сöвмö грамматикаысь теория да орфографияысь правилöяс велöдöм серти. Орфография правилö велöдöм мунö грамматикаысь да фонетикаысь велöдöм бöрти.

Богоявленский Д.Н. психолог став правилöсö юкліс куим пельö: «одновариантные», «двухвариантные» и «правила рекомендаций».

Öти вариантаöсь гижанногъяс, кор öти и сійö жö грамматика да фонетика условиеын вöзйыссьö öти шыпаса гижöм: й бöрын –яс водзын ъ, ь оз гижсьы; (гласнöйяс бöрын, чорыд согласнöйяс бöрын, небыд согласнöйяс бöрын); ас нимын ыджыд шыпас.

Кык вариантаöсь – гижанногъяс, код гижöмлы эмöсь торъя правилöяс, но колö бöрйыны, кодсö гижны. Татшöмöсь сложный кывъяс гижанног (вижъюр). И-і, е-э, тч-дч-чч; ф-п, х-к, ч-ц; а сідзжö кодь – эмакывкöд да кывбердкöд.

Коймöд чукöрыслы правилöыс абу, колö гöгöрвоны кыв явлениесö да гижны орфографияысь задача вöчöм бöрти:

Мукöд дырйи – мукöддырйи; сакар тор – сакартор, ыб – Ыб сикт. Тöдчана пай босьтö контекст. Орфографияысь правилö вылын удж - уна тшупöда удж, сылöн шöр тшупöдъясыс: 1) восьтыны правилöыслысь сюрöссö (содержаниесö); 2) гöгöрвоöдны правилöлысь формулировкасö; 3) гижöдын правилö серти гижöм.

 

4. Орфография действие, сылöн тэчас.

Орфография действие дырйи гижысь шыöдчö орфографияысь правилö дорö. Гижысь кö аддзö кывйысь орфограмма, сійö вöчö орфография действие да шыöдчö орфографияысь правилö дорö. Орфография действие артмö кык тöдчана тшупöдысь: 1) орфография задача пуктöм (орфограмма индöм) да 2) сійöс могмöдöм (стöч гижанног аддзöм). Орфография действие веськöдöма гöгöрвоöмöн правилö серти гижöм вылö.

М.Р. Львов орфография действиеын торйöдö 6 тшупöд:

1) орфограмма аддзöм

2) орфограммалысь сикас тöдмалöм

3) задача вöчан туй аддзöм

4) öта-мöд бöрся задача вöчан туйяс тöдмалöм

5) орфография задача вöчöм

6) кыв гижöм

Например, [т у й й а с] кыв

1) орфограмма индöм: туй. яс

2) орфограмма сикас: й бöрын –яс (гижöм)

3) тöд вылö уськöдны, кутшöм правилöяс серти гижсьö –яс:

а) небыд согласнöй бöрын –яс водзвылын гижсьö торйöдан ь

б) чорыд согласнöйяс бöрын –яс водзвылын гижсьö торйöдан ъ

в) гласнöйяс бöрын нинöм оз гижсьы

г) й бöрын –яс водзвылын торйöдан ь, ъ оз гижсьы

4) Туйяс гижöдлы лöсялана нельöд правилöыс.

5) Туйяс кывйын й бöрын –яс водзвылын торйöдан ь, ъ гижны оз ков.

6) Туйяс гижöм.

 

5. Орфография навык.

Орфография навык – тайö автоматическöя орфография действие вöчны кужöм. Орфография навык – сложный навык, сійö артмö уна да ёна тренируйтчöм вылын. Сылы подулöн лоöны уна сикас посньыдджык да кокньыдджык кужöм да тöдöмлунъяс. Тайö фонетика боксянь кыв анализируйтöм (отсöг, вочаавны), кывлысь морфема тэчас (состав) аддзыны кужöм (чышкыштны, ыджыдджык, пöдса, чуксаліс), кывйысь орфограмма (опасный места) аддзыны кужöм, сылысь ним тöдöм да висьталöм (согласныйлысь небыдлун пасйöм, абу кылана согласный гижöм, ыджыд буква собственнöй нимын, сложный кыв гижöм, суффикс гижöм), орфограмма гижöмлы правилö аддзöм-корсьöм да мукöд.

Орфография навык артмö орфография действие унаысь повторяйтігöн, сійöс автоматизируйтöмысь. Тайöс сöвмöдöмын зэв тöдчанаöсь видзöдан, кылан да киöн гижан процессъяслöн паметь.

 

Литература:

1. Львов М.Р., Рамзаева Т.Г., Светловская Н.Н. Методика обучения русскому языку в начальных классах. М., 1987.

2. Львов М.Р., Горецкий В.Г. и др. Методика преподавания русского языка в начальных классах. М. Академия, 2002. С. 290-316.

3. Соловейчик М.С. Русский язык. Теория и практика обучения.