П реподобне отче Алексие, / на земли Карпатстей просиял еси / и ко истинней вере / люди твоя обратил еси; / узы и гонения многоразличная претерпевая и / Подвигоположника Христа непрестанно благодаря; / Того моли, святче Божий,/ отпущения грехов нам даровати // и велию милость.
П реподобне отче Алексие, / звездо небесная, / на тверди церковней просиявшая / и землю Карпатскую светом Православия осветившая, / плененныя люди / от заблуждения латинскаго обратившая / и ко истинней вере отцев наших приведшая, / моли Христа Бога // даровати нам велию милость.
П реподобне отче Алексие, / от мирскаго жития отреклся еси / и Христу себе поработил еси, / взем ярем Его легкий и благий; / покорил еси плоть твою духови / и тако всего себе Богови вверил еси. / Ныне же, предстоя Престолу Вседержителя, / моли о нас, да сподобит ны // вечныя и блаженныя жизни во Царствии Его.
У годника изряднаго / и молитвенника теплаго, / преподобнаго отца нашего Алексия, / исповедника Христова / и новаго апостола, / ныне восхвалим в пениих и песнех духовных. / Егоже молитвами, Господи, / избави нас вечных мук, // даруя нам велию милость.
П реподобне отче Алексие, / твердейший адаманте, / многия раны и поругания претерпел еси, / исповедуя веру Православную / пред еретики злочестивыми; / от них же в темницу заключен был еси, / подражатель апостолом в сем явивыйся; / с ними же молися Христу Богу, //спастися душам нашим.
У годника Божия / и предстателя за нас усерднаго / в честней памяти его восхвалим днесь, / почитающе честныя подвиги / и лобызающе раны его, / иже претерпе, исповедуя Бога Вседержителя, / возвращая нас к вере отцев наших. / Егоже молитвами, о Троице Пресвятая, // прости согрешения наша и даруй нам велию милость.
Глас 4
З вездо светозарная, / от Солнца Христа возженная, / возсиявшая нам днесь / в земли Карпатстей, / преподобне отче Алексие, /твоими молитвами / просвети темная сердца наша, / да очистим себе // от грехов покаянием.
Слава: глас 8
Господи Боже Вседержителю, / в Троице Святей прославляемый, / молитвами угодника Твоего,/ Алексия Карпаторусскаго, / утоли раздоры в земли нашей, / да вси едиными усты прославим Тя/и неизреченную милость Твою, / восхваляюще угодника Твоего// Алексия преподобнаго.
И ныне: глас тойже Богородичен: Ц арь Небесный за человеколюбие на земли явися, / и с человеки поживе: / от Девы бо Чистыя плоть приемый, / и из Нея прошедый с восприятием: / един есть Сын сугуб естеством, / но не ипостасию. / Темже совершенна Того Бога / и совершенна человека воистину проповедающе, / исповедуем Христа Бога нашего: / Егоже моли Мати Безневестная,// помиловатися душам нашим.
На литии стихиры глас 5.
Подобен: Радуйся:
Р адуйся, преподобне отче наш Алексие, / звездо светозарная, / в земли нашей днесь возсиявшая / и ко Христу Богу нас приведшая. / Апостолом во всем житии твоем поревновал еси, / истинную веру / отцем нашим проповедал еси; / непрестанно моли о нас / Господа нашего Христа, // даровати нам велию милость.
Р адуйся, преподобне отче наш Алексие, / новый исповедниче Христов, / биения и раны кротко претерпевый / веры ради отеческия, / тако нас научая / за Христа вся безропотно претерпевати / и веру Православную / твердо исповедовати. / Темже моли Подвигоположника о нас, / да подаст нам оставление грехов // и велию милость.
Р адуйся, преподобне отче наш Алексие, / радуйся, новый апостоле. / Радуйся, Святым Отцам в житии иночестем последовавый; / радуйся, апостолом в проповеди Евангельстей подражавый. / Вся красная мира сего презрев, / Единаго Бога возлюбил еси, / в молитвах же и подвизех / к Нему Единому горел еси. / Темже моли Его о нас, // да и мы пребудем в любви Его во веки.
Слава: глас 2
П остника усерднаго / и молитвенника изряднаго / ныне прославим в лике преподобных / и исповедника крепкаго восхвалим, / смирение, терпение и кротость стяжавшаго / и ко истинней вере отцы наша обратившаго. / Того, братие, ныне почтим, // совершающе честную память его.
И ныне: Богородичен, глас тойже: П риидите, Матерь Света песньми немолчными вси прославим, / Та бо роди Спасение наше: / и радуйся, принесем яко Единей / рождшей всех Начальнейшаго, / Иже прежде век Бога: / радуйся, Еву падшую паки наздавшая: // радуйся, Пречистая Дево Неискусобрачная.
На стиховне стихиры, глас 6.
И споведника терпеливейшаго, / постника и молитвенника / изрядно восхвалим / и честную память его воспоим, / почитающе труды и добродетели его/ и к нему вопиюще: / о нас моли Христа Бога нашего, / преподобне отче Алексие, // прославляющих честную память твою.
Стих: Честна пред Господем смерть преподобных Его. С ветильника Карпатския Руси, / преподобнаго отца нашего Алексия, / ныне возвеличим всечестне,/ дивящеся подвигом и трудом его, / имиже потрудися яко новый апостол./ Темже же моли о нас Христа Бога нашего, / да подаст нам оставление грехов / и утвердит стояти // в вере Православней.
Стих: Блажен муж бояйся Господа, в заповедех Его восхощет зело.
П реподобне отче Алексие, / честна и всехвальна есть память твоя, / ты бо потрудился еси / во благовестии Христове, / просвещая и укрепляя люди карпатския, / и поучая вся терпети / правыя ради веры, / да получат светлыя венцы / от Христа Бога нашего, // спасающаго души наша.
Слава: глас 3. З вездо Карпатская, / светильниче земли нашея, / преподобне отче Алексие, / славим вси честныя труды Твоя, / ты бо благословение Горы Афонския / земли нашей принесл еси, / идеже сподобился еси / отечестей вере Православней сочетатися, / юже непоколебиму соблюсти нам,/ даже до кончины, // моли Всеблагаго Господа Христа.
И ныне: глас тойже, Богородичен: Б ез семене от Божественнаго Духа, / волею же Отчею / зачала еси Сына Божия, Владычице, / от Отца без матере прежде век суща,/ и Младенца Того млеком питала еси. / Темже не престай молити, // избавитися от бед душам нашим.
Тропарь преподобного, глас 8.
Возлюбив всем сердцем Истину, / узы и страдания многоразличная кротко претерпев, / благословение Святыя Горы Афонския/ принеся Руси Закарпатстей,/ Православие тамо возродил еси, / преблаженне отче наш Алексие, / моли Христа Бога/ раздоры искоренити / и ниспослати душам нашим// мир и велию милость.
На Утрени:
По 1 – м стихословии седален глас 4:
От юности Православие возлюбив, на Горе Афонстей братиею обители Пантелеимоновы к сему причтен был еси; тии бо в благословение икону Богородицы “Акафистную” дароваша ти — во утверждение веры истинныя в земли Карпатстей. Тем же с Пречистою Девою о нас Христу Богу, отче Алексие, молися, спастися душам нашим.
Слава: и ныне: Богородичен:
Н ескверная Агнице и Чистая Голубице, преславно Девою пребывши, Бога Слово в пречистем чреве Твоем вместила еси и Того на руку носила и питала еси. Приими от нас Архангельское пение: радуйся, Благодатная, Господь с Тобою.
По 2 – м стихословии седален глас 7:
З а веру Христову гоним был еси и от латинян биение кротко претерпел еси; в темницу всажден и неправедным судом осужден был еси, подобяся Страстоположнику Христу. Темже моли Его прощение прегрешений даровати нам, днесь почитающих честную память твою, преподобне отче Алексие.
Слава: и ныне: Богородичен:
П речистая Владычице и Предстательнице всего мира, утоли скорби и болезни рабов Твоих, прославляющих имя Твое, Богородице, и с преподобным Алексием о нас Христа Сына Твоего моли, грехов отпущение нам даровати.
По полиелее седален, глас 5.
П реподобне отче Алексие, исповедниче Руси Карпатския, услыши моление чад твоих: вере Православней в земле нашей утвердитися и в ней непоколебимо пребывати Христа Бога моли, прославляющих честную память твою.
Слава, и ныне, Богородичен:
Б огородице Дево, о нас Сына Твоего моли, воспевающих Тебе, Владычице, да сподобит и нас пребывати с Тобою во Царствии Его.
Таже степенна, 1 – й антифон 4-го гласа: От юности моея:
Прокимен глас 4: Честна пред Господем смерть преподобных Его.
Стих: Что воздам Господеви о всех, яже воздаде ми?
Евангелие от Матфея, зачало 43.
По 50-м псалме стихира, глас 6:
Преподобне отче Алексие, светило земли Карпатския, множество ран от мучителей претерпел еси, исповедуя Христа, свыше укрепляюща тя в подвизе твоем. Ты люди наша Церкви Христовой приобщил еси и на Руси Карпатстей Православие возродил еси. Темже моли о нас Пресвятую Троицу в вере сей до конца дней наших пребыти, и христианской кончине дароватися нам и грехов оставлению.
Канон преподобного, глас 1.
Егоже краестрочие: “Апостола земли Карпатския восхвалим”
Песнь 1
Песнь победную поим вси Богу, сотворшему дивная чудеса мышцею высокою и спасшему Израиля, яко прославися.
Апостола новаго и исповедника твердаго ныне торжественно прославим, преподобнаго Алексия, в Карпатстей Руси подвизавшагося и народ свой в Православии утвердившаго.
Подвизаяся во обители святителя Николая, усердно молился еси, отче, подвиги иноческия неся и о Бозе деннонощно памятуя, пред Ним, яко слуга пред Воеводою, со страхом ходил еси.
Православную отеческую веру возлюбив, на Святей Горе Афонстей ю прияв, икону Богоматере оттуду в благословение народу нашему принесл еси, во исповедании веры его утверждая.
Богородичен: Царице Небесная, Богу чистотою и смирением угодила еси и Той сподоби Тя быти Материю Сына Своего и, Духом Своим осенив, Кивотом неодушевленным содела.
Песнь 3
Да утвердится сердце мое в воле Твоей, Христе Боже, Иже над водами небо утверждей второе и основавый на водах землю, Всесильне.
Твердость веры/ во исповедании твоем показал еси,/
и яко крепкий адамант,/ ради Христа узы и страдания/ претерпел еси, преподобне,/ от Негоже венец в Царствии Небеснем// прияти сподобился еси.
О народе твоем/ доброе попечение имел еси,/ Таинством церковным того приобщая/ и ко Христу и ко ограде церковней// овцы новыя приводя.
Любовь, яже есть соуз совершенства,/ стяжал еси, к Богу оною горя,/ и ради сего мучения ни во чтоже вменял еси,// Его ради вся претерпевая.
Богородичен: Аки жезл Ааронов прозябши,/ Богородице Дево,/ родила еси Христа Сына Божия,// из чрева Своего Того воплотивши.
Седален глас 5:
Преподобне отче Алексие, столп Православия в земли нашей пребыл еси, утверждая в вере предков наших, в оной же и нас, и детей наших до конца дний пребыти научити, да сподобимся вси Вечери Божественныя во Царствии Небеснем.
Слава, и ныне:
Покровом Твоим огради, Богородице, землю Карпатскую, в ней бо множество иноков и инокинь во имя Твое подвизаются, прославляюще Тя, Матерь Цареву и Покровительницу нашу.
Песнь 4
Духом провидя, пророче Аввакуме, Словесе воплощение, проповедал еси, вопия: внегда приближитися летом – познаешися, внегда приити времени – покажешися. Слава силе Твоей Господи.
Земная презрел еси, преподобне отче, во уметы вся оная вменяя, к Горним востекл еси, мирское житие оставив: в иноческия обители устремился еси и Богу в них усердно послужил еси.
Егда, млад сый, размышляя о житии твоем, отче, к старцу Аркадию пришел еси и на иночество благословение от него получил еси.
Обитель преподобнаго Онуфрия в земли Холмстей посетил еси, и в ней с братиею усердно трудился еси, тамо же монашество и священный сан прияти сподобился еси, и ко отцем нашим послан быв, во страданиих за веру тех укрепляя.
Богородичен: Ликующе поем Тя в песнех, восхваляем Избранную Богоотроковицу, Тобою бо спасение улучихом, воплощением из Тебе Бога Слова, Всенепорочная.
Песнь 5
Светлый нам возсия Свет Присносущный утренюющим о судьбах заповедей Твоих, Владыко Человеколюбче, Христе, Боже наш.
Истиннаго исповедника Христова и твердаго столпа Православия почитаем тя, преподобне отче, светло днесь восхваляюще память твою; моли о нас Преблагаго Бога, да помилует нас в День Судный.
Карпатский апостол явился еси, преподобне отче Алексие, люди заповеди Евангельскими просвещая и оныя ко Христу Богу приводя, да будут наследницы Царствия Его.
Ангельский чин приял еси, блаженне, Богу в нем усердно послужил еси, страсти плотския в себе побеждая, подвиги удручая тело свое.
Ради веры пострадал еси, отче, гонения, биения и заушения кротко претерпевая, к Подвигоположнику очи свои возводя, спасительныя Страсти Его воспоминая, Ему страданьми своими подражал еси.
Богородичен: Пресвятая Владычице, Мати Христа Бога, Того неизреченно родивши, даруеши мирови мир и спасение душам нашим.
Песнь 6
Пророка Иону подражая вопию: живот мой, Блаже, свободи из тли и спаси мя, Спасе мира, зовуща: слава Тебе.
Ангелоподобное житие/ показал еси, святе,/ постом, молитвою,/ бдением, коленопреклонением;/ оными подвиги страсти твоя увядил еси,/ смирением и терпением// врага рода нашего победив.
В сонном видении/ явися настоятелю обители,/ в нейже подвизашеся, отче,/ из воды мощи твоя подъяти повелевая/ и оныя на поклонение поставити,/ да христоименитыя людие,/ к ним притекающе,// исцеление улучат.
Славословие Богу приносише непрестанно,/ сладчайшее имя Христа/ во устех имея, преподобне,/ и к Нему очи мысленныя// всегда устремляя.
Богородичен: К Матери Царевой/ усердно припадем,/ во чреве Своем Бога понесшей,/ и молимся к Ней:// да грехов наших испросит оставление.
Кондак, глас 4.
З везду Карпатскую почтим, / лучезарным светом возсиявшую / и апостолом уподобившуюся, / богоноснаго отца нашего Алексия, Православие возлюбившаго / и народ свой ко истенней вере возратившаго, / темже и мы ему благодарно возопиим: / радуйся,// многомощное светило Руси Карпатския.
Икос
Б лагодарение Богу нашему возшлем, яко не остави нас в заблуждении латинстем пребывати и воздвиже от народа нашего преподобнаго Алексия. Той бо люди ко истинней вере возврати, и светом Евангелия всех нас просвети, предстоя же ныне у Престола Вседержителя, молит Пресвятую Троицу о почитающих его и взывающих: радуйся, многомощное светило Руси Карпатския.
Песнь 7
Пещь, Спасе, орошашеся, отроцы же, ликующи, пояху: отцев Боже благословен еси.
Иго Христово на рамех твоих терпеливодушно носи, Ему во страданиих подражая, и пребысть яко адамант несокрушим, вся раны с благодарением Богу терпя и вопия Тому: отцев Боже, благословен еси.
Яко сокровище драгоценнейшее честныя мощи твоя обретошася и в раку положени быша, да точиши чудеса всем, к тебе припадающим и помощи твоея просящим, покровителю земли Карпатския отче Алексие, Бога усердно моли о воспевающих песнь сию: отцев Боже, благословен еси.
Воистину апостол земли нашея явился еси, преподобне, уловил еси в сети Христовы люди твоя, Бога в истинней вере чтити научая и верно Ему вопити: отцев Боже, благословен еси.
Богородичен: О Владычице, покрый честным Твоим омофором люди Твоя, Тя истинно Богородительницу прославляющих, и молися к Сыну Твоему, да спасет нас Своею благостию, ипрославим Его: отцев Боже, благословен еси.
Песнь 8
Егоже ужасаются ангели и вся воинства, яко Творца и Господа, пойте, священницы, прославите, отроцы благословите, людие, и превозносите во вся веки.
Смирением и терпением скорбей угодил еси Богу, всеблаженне, и ныне с лики ангельскими прославляеши Троицу Пресвятую, радуяся неизреченно, и вопия: священницы, пойте, отроцы, благословите, людие, превозносите во вся веки.
Хвалим тя, отче наш Алексие, яко ты на ниве Христовей потрудился еси, отцы наша к Православию приведя, и ныне молися о нас, чадех их, да подаст нам Христос Бог оставление грехов, вопиющим: священницы, пойте, отроцы, благословите, людие, превозносите во вся веки.
Велика тя угодника прославляем, преблаженне, яко ради Христа вся претерпел еси и чада твоя к вере правей возвратил еси, апостолом подобяся; и ныне с ними купно вопиеши: священницы, пойте, отроцы, благословите, людие, превозносите во вся веки.
Богородичен: Ангелов Радость, Престол Херувимский еси, Всечистая, на Немже Христос почи, Тя Деву Чистейшую Богородительницу соделав; Ты же, Богомати, со всеми святыми взываеши: священницы, пойте, отроцы, благословите, людие, превозносите во вся веки.
Песнь 9
Живоприемный Источник приснотекущий, светоносный Светильник благодати, Храм одущевленный, Сень Пречистую, Небеси и земли пространейшую, Богородицу, вернии величаем.
Любовию прославляем тя, богоносне отче, и благодарение Богу приносим, яко велика светильника стяжахом тя, преславне. Молися о нас Творцу Богу нашему: да благодатию Его и мы с тобою прославим Его в Горнем Иерусалиме.
Источника чудес преславнаго проповедуем тя, святче Божий, светильника пресветлаго и предстателя пред Господом усерднаго, Того непрестанно моли о нас, чадех твоих.
Богородичен: Молим Тя, Пречистая, избави нас от страстей и грехов наших, и Христу о нас молися с преподобным Алексием, да простит Человеколюбец вся беззакония наша.
Светилен, глас 1
Звезду, возсиявшую в Руси Карпатстей, ныне торжественно воспоим, преподобнаго и богоноснаго отца нашего Алексия, той бо к вере Православней народ наш возврати; темже и мы, молитвами его, в сей вере непрестанно пребудем.
Слава: и ныне: Богородичен
Кивот священный почитаем Тя, Пречистая, Ты бо вместила еси во утробе Твоей Невместимаго, Яже воплотися от чистых кровей Твоих, да спасет нас от наших грехов, яко Милосерд.
На хвалитех стихиры на 4, глас 2
Подобен: Доме Евфрафов:
