Преподо́бная ма́ти Мари́е, моли́ Бо́га о нас. Марии: Безстра́стие небе́сное стяжа́ла еси́, / кра́йним на земли́ житие́м ма́ти

Марии: Безстра́стие небе́сное стяжа́ла еси́, / кра́йним на земли́ житие́м ма́ти. / Те́мже тебе́ пою́щим, / страсте́й изба́витися / моли́твами твои́ми, моли́ся.

 

Слава, Троичен: Тро́ице есмь про́ста, неразде́льна, / разде́льна Ли́чне, / и Еди́ница есмь Естество́м соедине́на, / Оте́ц глаго́лет, и Сын, и Боже́ственный Дух.

 

Богородичен: Утро́ба Твоя́ Бо́га нам роди́, / воображе́на по нам: / Его́же, я́ко Созда́теля всех, моли́ Богоро́дице, / да моли́твами Твои́ми оправди́мся.

Таже: Го́споди, поми́луй. (Трижды.) Сла́ва, и ны́не:

Кондак:

Душе́ моя́, душе́ моя́, воста́ни, что спи́ши? / Коне́ц приближа́ется, и и́маши смути́тися. / Воспряни́ у́бо, да пощади́т тя Христо́с Бог, / везде́ сый и вся́ исполня́яй.

Песнь 7.

Ирмос: Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам; / но не преда́ждь нас до конца́, / отце́в Бо́же.

 

Манасси́ева собрала́ еси́ согреше́ния изволе́нием, / поста́вльши я́ко ме́рзости стра́сти, / и умно́живши душе́ негодова́ние, / но того́ покая́нию ревну́ющи те́пле, / стяжи́ умиле́ние.

 

Исчезо́ша дни́и мои́, я́ко со́ние востаю́щаго: / те́мже я́ко Езеки́я слезю́ на ло́жи мое́м, / приложи́тися мне ле́том живота́. / Но кий Иса́ия предста́нет тебе́ душе́, / а́ще не всех Бог?

 

Ахаа́вовым поревнова́ла еси́ / скве́рнам, душе́ моя́, увы мне, / была́ еси́ плотски́х скверн пребыва́лище, / и сосу́д сра́млен страсте́й, / но из глубины́ твоея́ воздохни́, / и глаго́ли Бо́гу грехи́ твоя́.

Припа́даю Ти, / и приношу́ Тебе́, я́коже сле́зы глаго́лы моя́: / согреши́х, я́ко не согреши́ блудни́ца, / и безако́нновах, я́ко и́ный никто́же на земли́, / но уще́дри Влады́ко, творе́ние Твое́, / и воззови́ мя.

 

Заключи́ся тебе́ не́бо душе́, / и глад Бо́жий пости́же тя: / егда́ Илии́ Фесви́тянина я́коже Ахаа́в, / не покори́ся словесе́м иногда́, / но Сара́ффии уподо́бився, / напита́й проро́чу ду́шу.

 

Погребо́х о́браз Твой, / и растли́х за́поведь Твою́, / вся помрачи́ся добро́та, / и страстьми́ угаси́ся, Спа́се, свеща́, / но уще́дрив возда́ждь ми / я́коже пое́т Дави́д, ра́дование.

 

Попали́ Илия́ иногда́ два́щи / пятьдеся́т Иезаве́линых, / егда́ сту́дныя проро́ки погуби́, / во обличе́ние Ахаа́вово, / но бе́гай подража́ния двою́ душе́, / и укрепля́йся.

 

Обрати́ся, пока́йся, откры́й сокрове́нная, / глаго́ли Бо́гу вся ве́дущему: / Ты ве́си моя́ та́йная, еди́не Спа́се, / но Сам мя поми́луй, я́коже пое́т Дави́д / по ми́лости Твое́й.

 

Преподо́бная ма́ти Мари́е, моли́ Бо́га о нас.

Марии: Возопи́вши к Пречи́стей Богома́тери, / пе́рвее отри́нула еси́ неи́стовство страсте́й, / ну́жно стужа́ющих, / и посрами́ла еси́ врага́ запе́ншаго, / но даждь ны́не по́мощь от ско́рби, / и мне, рабу́ твоему́.

 

Преподо́бная ма́ти Мари́е, моли́ Бо́га о нас.

Марии: Его́же возлюби́ла еси́, Его́же возжеле́ла еси́, / Его́же ра́ди плоть изнури́ла еси́ преподо́бная, / моли́ ны́не Христа́ о рабе́х: / я́ко да ми́лостив быв всем нам, / ми́рное состоя́ние да́рует / почита́ющим Его́.

 

Слава, Троичен: Тро́ице про́стая, неразде́льная, / единосу́щная, и Естество́ еди́но, / Све́тове и Свет, и Свя́та три: и еди́но Свя́то / пое́тся Бог Тро́ица. / Но воспо́й, просла́ви Живо́т и Животы́, душе́ / всех Бо́га.

 

Богородичен: Пое́м Тя, благослови́м Тя, / покланя́емся Ти Богороди́тельнице, / я́ко неразде́льныя Тро́ицы, / породила́ еси́ еди́наго Христа́ Бо́га, / и Сама́ отве́рзла еси́ нам / су́щим на земли́ небе́сная.

Песнь 8.

Ирмос: Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́́те / и превозноси́те во вся ве́ки.

 

Правосу́де Спа́се поми́луй, / и изба́ви мя огня́, и преще́ния, / е́же и́мам на суде́ пра́ведно претерпе́ти: / осла́би ми пре́жде конца́, / доброде́телию и покая́нием.

 

Сле́зную Спа́се сткля́ницу, / я́ко ми́ро истощава́я на главу́, / зову́ Ти я́коже блудни́ца, ми́лости и́щущая, / мольбу́ приношу́, / и оставле́ние прошу́ прия́ти.

 

Яко разбо́йник вопию́ Ти: помяни́ мя. / Яко Петр пла́чу го́рце: / осла́би ми Спа́се. Зову́ я́ко мыта́рь: / слезю́ я́ко блудни́ца. / Приими́ мое́ рыда́ние, / я́коже иногда́ ханане́ино.

 

Аще и никто́же, я́коже аз согреши́ Тебе́, / но оба́че приими́ и мене́, Благоутро́бне Спа́се, / стра́хом ка́ющася, и любо́вию зову́ща: / согреши́х Тебе́ еди́ному, / поми́луй мя Ми́лостиве.

 

Гное́ние, Спа́се, исцели́ / смире́нныя моея́ души́: еди́не Врачу́, / пла́стырь мне наложи́, и еле́й и вино́, дела́ покая́ния, / умиле́ние со слеза́ми.

 

Пощади́ Спа́се Твое́ созда́ние, / и взыщи́ я́ко Па́стырь поги́бшее, / предвари́ заблу́ждшаго, восхи́ти от во́лка, / сотвори́ мя овча́ / на па́стве Твои́х ове́ц.

 

Ханане́ю и аз подража́я, / поми́луй мя, вопию́, Сы́не Дави́дов: / каса́юся кра́я ри́зы, я́ко кровоточи́вая: / пла́чу, я́ко Ма́рфа и Мари́я над Ла́зарем.

 

Егда́ Судие́ ся́деши я́ко Благоутро́бен, / и пока́жеши стра́шную сла́ву Твою́ Спа́се: / о каковы́й страх тогда́! Пе́щи горя́щей, / всем боя́щимся нестерпи́маго суди́ща Твоего́.