Харчудт седкл сергәхин төлә дуулсн дун - арвн шүлг -төгсв.

Эн насна йовдлыг керг угад медҗ,
Эцс хөөтин йовдлыг кергтә гиҗ медәд,
Эңк амулң нирваниг үндсндән төрүлхәр седҗ,
Эцкин орнас һаргсн күмн - тер хуврг.

Төрсн орндан бәәхлә,төрл садндан тачаһад,
Тедндән хорлгсн әмтиг өшәтн дәәснд бәрҗ,
Түүгәр удьрдгсн - килнцәр орчлңгин зовлң эдлдг.
Түүнәс шамдҗ зулдгнь - бурхна номын йосн.

Орчлңгин хутл төгсиг һалын һууд үзҗ,
Ок нирвана хутгиг* серүн бәәшңд үзҗ,
Олз,күндл тергүтниг - өөр цуснд үзҗ,
Ода гетлхәр шамдхла - маһд һарх седкл.

Энседкләр татгдҗ,эцкин орнас уудад,
Эңкр төрл садан нуульмсн мет хайҗ,
Эдлх аһурсн угаһар аглгт һарч чидхлә,
Эн бурхн шаҗнд маһд һарв гилцдг.

Әрүн седклиг үүскҗ маһд һаргсн хөөн,
Амлгсн таңһрг самнран йосчлн сәкх кергтә.
Али буру йовдлар таңһрг самнран эвдхлә,
Айс тамин йоралас гетлх цагнь берк.

Сәкх зөвтә зарчмиг йосчлн эс медхлә,
"Сәкнәв" гиҗ амлгсн үг болад төгсх.
Сән зәрлгт номлгсн үг утх хойриг
Сәәтр кецәҗ сурхла,түүнәс цуһар медгдх.

Алвар шахгсни эркәр хуврг болгсн биш,
Әрүн седклин эркәр хуврг болгсн болхла,
Ачта бурхни зәрлиг маһдт үннд медҗ,
Ардк хар садни бәрлдәг таслхнь зөвтә.

Хуврг болгсни кергиг сәәтр медл угаһар
Хутгт* мет дүнгәһәд,бәрц авхла - буру.
Хойр эцсин завсрар хувцлтха гиһә бәәтл,
Ховр,үнтә хамгиг өмсхәр седхлә - буру.

Керг үүл үлүдхлә,санвр шагшавд цалһарх,
Кетркә ардгсг болхла,шаҗни дәәсн болх.
Кецәҗ эрдм сурхла,зарчм цуһар медгдх,
Кинҗ сәәтр сәкхлә,керг цуһар медгдх.

Гелңгүд,манҗнртседкл сергәхин төлә дуулсн дун - йисн шүлг -төгсв.

Әмтиг ясх сурһуль бийдән уга бәәтл,
Алдр нерни кергт багш болдгнь һундлта.
Әмтни сүзгин бәрцәр цадхлң бәәһә бәәтлән,
Арсм кехин кергәр яарм кеддгнь һундлта.

Багш болхин дурн дегд ик бәәтлән,
Баһ гелңгүд манҗнран сурһдг угань һундлта.
Бәрц авх дурн дегд ик бәәтлән,
Бурхн номин кергт эдлдг угань һундлта.

Һөөв*тәвхин дурн дегд ик бәәтлән,
Һол номин йосиг меддг угань һундлта.
Һосн,девл тергүтн бәрц авдг бәәтлән,
Һорин гем алдсас меддг угань һундлта.

Әәрг,тарган бәргсни ачиг номлдг бәәтлән,
Арвн хар нүүлиг номлдг угань һундлта.
Әрүн йовдлыг эдлгч хурвг болгсн бәәтлән,
Ардк хар садан дегд эңкрлдгнь һундлта.

Хувргин аглһ орнд суух зөвтә бәәтлән,
Хотни әркиг кедҗ ар эргдгнь һундлта.
Хурл номын йовдлыг кех зөвтә бәәтлән,
Хург болһниг кедҗ төрт ордгнь һундлта.

Асрх зөвтә хувргнь самһа бәәһә бәәтл,
Ардксан байҗахин төләд мал өскдгнь һундлта.
Әрүн седкләр өрггсн өглһин эзнә бәрцәр
Ардк хар садан теткәд суудгнь һундлта.

Өглһин эзни бәрциг хураҗ суугсн бәәтлән,
Өнчн шевнрән өлссиг меддг угань һундлта.
Өргцин девл һосыг олар ирүлдг бәәтлән,
Өнчн шевнрән даархиг меддг угань һундлта.

Олз,күндлин эдлүрәр маш элвг бәәтлән,
Олн яду хуврган асрдг угань һундлта.
Онц бийинь керглсиг сәәнәр ясулдг бәәтлән,
Олни сүм суврһиг селвдг угань һундлта.

Әркиг сәктхә гисиг керглш уга бәәтлән,
Алвар шахгсн кевтә хуврг болдгнь һундлта.
"Амсхла - шевм биш" гигсиг медсәр бәәтлән,
Алд делм намҗрта* һөөв тәвдгнь һундлта.

Эгц олн хувргиг сурһх зөвтә бәәтлән,
Эврә ач-җичән үлү килмҗлдгнь һундлта.
Энкн насни бәрлдәтә садан доталдг бәәтлән,
Эцс хөөтин шевән һазалдгнь һундлта.

Аля азд хувргиг үзә,медә бәәтлән,
Адһн-шидһн зүткҗ закрдг угань һундлта.
Әрүн баһ манҗнриг зарц кедг бәәтлән,
Аштни юн болхинь тоолдг угань һундлта.

"Бурхна шевв" гиһәд амлхдан мергн бәәтлән,
Бурхни номин йосиг эдлдг угань һундлта.
Буйни ач-тусиг номлхдан мергн бәәтлән,
Бурхни номин йосиг цәәлһдг угань һундлта.

Өргцин ач-тусиг номлхдан мергн бәәтлән,
Үндс ясх сурһмҗиг номлдг угань һундлта.
Өглһин эзни номиг умшх дурта бәәтлән,
Өргцин ик баһар кемҗә тәвдгнь һундлта.

Манҗар гелң кехд маш дурта бәәтлән,
Маһд һаргсн зарчмиг заадг угань һундлта.
Маһдта тогтаҗ хәәрлгсн кемҗән бәәһә бәәтл,
Маш ик өргәг кеерүлн бәрдгнь һундлта.

Тәрнин авшг өгхд маш дурта бәәтлән,
Таңһрг эвдгсни хөөткиг меддг угань һундлта.
Тәкл даңһргин* саңгиг эдлх дурта бәәтлән,
Тамин халун һалас әәдг угань һундлта.

Ширә деер залрад,һөөв тәвхинь үзхлә,
Шалһдг мергдин йосар хуврган сурһм бәәдлтә.
Шилвлзәд адһн йовҗ мал өскхинь үзхлә,
Шиидм месиг белдҗ хулха кем бәәдлтә.

Әмтнә тусин йовдлыг амндан келсинь үзхлә,
Аврл даалһгсн күүһән маһдта татм бәәдлтә.
Алгчлҗ ардксин кергтән зүткҗ йовхинь үзхлә,
Айс тамин йоралд эврән кевтм бәәдлтә.

Өглһин ач-тусиг номлҗ суухинь үзхлә,
Олн әмтн хамгиг эврән теҗәм бәәдлтә.
Өглһин эзни бәрцд шунҗ суухинь үзхлә,
Өргәд уга бийәснь булаһад авм бәәдлтә.

Хувргин дунд залрад,номлҗ суухинь үзхлә,
"Хутгт гидгтн эн бө" гим дүңгә бәәдлтә.
Хуурмг арһар әмтиг меклҗ суухинь үзхлә,
Хурц месиг белдҗ ярһч болм бәәдлтә.

Харчудын дунд залрад,номлҗ суухинь үзхлә,
"Хәәрхн" гиҗ зальврад,ханш уга бәәдлтә.
Хармнн хәкн бәәҗ хураҗ суухинь үзхлә,
Хамг бәәсән өргв чигн деернь сурм бәәдлтә.

Бәргсн өрәһинь үзхлә,байн күвцин бәәдлтә,
Багшин бийинь үзхлә,улвр шарин дүрстә.
Байрхг бәәдлинь үзхлә,нойн күүни бәәдлтә,
Бас келхинь соңсхла,хуврг күүншң бәәдлтә.

Кермн девлинь үзхлә,кеергсн берәдин бәәдлтә,
Келгсн зәрлгинь соңсхла,багш күүншң бәәдлтә.
Кедг йовдлинь шинҗлхлә,күүкдтә күүнә бәәдлтә,
Кет бийинь шинҗлхлә,белвсн болдг бәәдлтә.

Тәргсн тәрәһинь үзхлә,таврчан кувцин бәәдлтә,
Тәкл зулынь үзхлә,хуврг күүни бәәдлтә.
Татгсн тергинь үзхлә,теңгә кувцин бәәдлтә,
Талдан келхинь соңсхла,бурхни шевин бәәдлтә.