Молитвы ко Пресвятой Богородице по исходе души от тела

Пресвятая Владычице, Богородице! К Тебе прибегаем, Заступнице наша: ты бо скорая еси помощница, наша ходатаица у Бога неусыпающая! Наипаче же молим Тя в час сей: помози новопреставленному рабу Твоему (имя) прейти страшный и неведомый оный путь; молим Тя, Владычице мира, силою Твоею отжени от движимой страхом души его страшныя силы темных духов, да смятутся и посрамятся пред Тобою; свободи ю от истязания воздушных мытарей, разори советы их и низложи их, яко зломыслящих врагов. Буди ей, о Всемилостивая Госпоже Богородице, заступницею и защитницею от воздушнаго князя тьмы, мучителя и страшных путей стоятеля; молим Тя, Пресвятая Богородице, ризою Твоею честною защити ю, да тако безбоязненно и невозбранно прейдет от земли на Небо. Молим Тя, Заступнице наша, заступи за раба Твоего матерним Твоим у Господа дерзновением; молим Тя, Помоще нашa, помози ему, имущему судитися еще прежде онаго Страшнаго Судилища, помози убо оправдатися пред Богом, яко Творцем неба и земли, и умоли Единороднаго Сына Твоего, Господа Бога и Спаса нашего Иисуса Христа, да упокоит усопшаго в недрах Авраама с праведными и всеми святыми. Аминь.

* * *

Пресвятая Госпоже, Владычице Богородице! К Тебе прибегаем, чистая: Ты бо еси стена необоримая, предстательство и покров всем прибегающим к Тебе с верою и упованием! Молим Тя, Преблагословенная, услыши молитву недостойных раб Твоих и предстани присно за усопшаго раба Твоего (имя). Ты выну ходатайствуеши за православно чтущих Тя, прибегающих к покрову Твоему и тепле молящихся Тебе в болезнех, скорбех и напастех; но Твое ходатайство, Твое заступление наипаче благопотребно нам по смерти нашей; Ты выну являвши скорую помощь Твою рабом Твоим и не престаеши всем молящимся Тебе являти Свое благосердие, изливати великия и богатыя милости Сына Твоего и Бога нашего на всех верующих: на Тя бо единую по Бозе имамы твердую надежду и упование: никтоже тепле моляся, отходит от Тебе без надежды и радости, и спокойствия, и утешения, и услаждения. Молим Тя, о Пресвятая Богородице, владычице мира, надеждо ненадежных, буди убо днесь ходатаицею к Рождшемуся от Тебе за усопшаго раба Твоего (имя), умоли Сына Твоего и Бога нашего дати ему прощение и оставление прегрешений. Моли, Богородице, много бо может моление матернее ко благосердию Владыки; от Тебе бо приемлет Господь всяко слово прошения, приими убо и Ты наши молитвы и моления, приносимыя Тебе, Пресвятая Дево, от всего сердца нашего и от всея души нашея, за душу усопшаго раба Твоего. Молим Тя, помози ему, Владычице, матерним Твоим ко Господу дерзновением достигнути тихаго пристанища в Небесном Иерусалиме; помози ему, Заступнице усердная, непостыдно предстати на Страшном и втором Пришествии Сына Твоего, идеже кийждо от своих дел или прославится, или постыдится; помози ему, Благодатная, оправдатися пред лицем Седящаго на Престоле Славы, да не постыдится пред Ангелами и всеми святыми, пред целым миром горним и дольним. О Всепетая мати, Влыдычице Богородице! Молим Тя, заступи, спаси, сохрани и будущия изми муки усопшаго раба Твоего, да не погибнет во век, но да спасется Твоими молитвами и прейдет от смерти в живот. Мы же, грешнии и недостойнии раби Твои не отступим от Тебе, не престанем во умилении взывати к Тебе: Пресвятая Госпоже, Царице и Владычице! Моли Сына Твоего и Бога нашего об усопшем рабе Твоем (имя), да даст ему Господь отпущение прегрешений; помози ему, Благодатная, достигнути вожделеннаго отечества и узрети блага небесныя, ихже око не виде, ухо не слыша и на сердце человеку не взыдоша; моли о нем, Богородице, да сподобится по Твоему предстательству, вкушати блага сии во Царствии Сына Твоего, Христа Бога нашего. Ты бо еси единая благословенная в женах многомощная Заступнице, надежда, покров и прибежище всем притекающим к Тебе, Ты еси мосте, преводяй сущих от земли на Небо, и райских дверей отверзение. Аминь.