октября. Вторник. Прпп. схимонаха Кирилла и схимонахини Марии, родителей прп. Сергия Ра́донежского

Приводим также порядок совершения полиелейной службы прпп. Кирилла и Марии Радонежских

На великой вечерне «Блажен муж» – 1-й антифон.

На «Господи, воззвах» стихиры преподобных, глас 8-й:

Бу́ди благослове́на, земле́ Росто́вская, / в ма́лем селе́нии Ва́рнице / благочести́вую чету́ всему́ ми́ру яви́вшая, / Кири́лла и Мари́ю приснопа́мятных, / до́брый о́браз честна́го супру́жества, / досто́йныя роди́тели Се́ргия Вели́каго. / Ти́и бо ны́не Престо́лу Бо́жию / вку́пе предстоя́ще, // мо́лятся о спасе́нии душ на́ших. (дважды)

Имени́тии и сла́внии боя́рскаго ро́да насле́дницы, / князе́м росто́вским ве́рнии служи́телие, / всехва́льнии Кири́лле и Мари́е, / безве́стную Ва́рницу ле́поте гра́дстей предпоче́тшии, / иде́же благоче́стно пожи́вше, / вои́стинну дре́во добропло́дное яви́стеся, / плод прекра́сный израсти́вше, / Се́ргия Вели́каго, // с ним же моли́теся о душа́х на́ших. (дважды)

Преподо́бне о́тче Кири́лле, / печа́льника земли́ Ру́сския благослове́нный роди́телю, / в годи́ну тя́жких испыта́ний, / многоча́стне в стан неве́рных князе́м росто́вским сше́ствуя, / блага́я Оте́честву и Це́ркви / устроя́ти вспомоществова́л еси́. / Ны́не же в селе́ниих небе́сных водворя́яся, // моли́ся Го́споду да спасе́т от рабо́ты грехо́вныя ду́ши на́ша. (дважды)

Преподо́бная ма́ти Мари́е, / благоче́стием и целому́дрием сия́ющи, / житие́м твои́м Бо́гу угоди́ла еси́, / Той же сотвори́ тя досто́йну / избра́нный сосу́д Ду́ха Свята́го чревоноси́ти / и служи́теля усе́рднаго Святы́я Тро́ицы ми́ру яви́ти. / Ны́не же с ним в селе́ниих пра́ведных водворя́ющися, // моли́ся Го́споду спасти́ся душа́м на́шим. (дважды)

«Слава» – преподобных, глас 5-й:

Прииди́те, ве́рнии, / похва́льными словесы́ роди́тели Се́ргия преподо́бнаго воссла́вим, / достохва́льную чету́, добре́йшия супру́ги, / таково́му младе́нцу сподо́бльшияся бы́ти роди́тели. / Бог предуго́това их к ди́вному сему́ рождеству́, / бы́ста бо уго́дницы Бо́жии, / пра́ведницы пред Ним и людьми́ и вся́кими доброде́тельми украше́ннии, / ти́и и ны́не предстоя́т Престо́лу Святы́я Тро́ицы // и мо́лятся о душа́х на́ших.

«И ныне» – догматик, глас тот же:

В Чермне́м мо́ри/ неискусобра́чныя Неве́сты о́браз написа́ся иногда́:/ та́мо Моисе́й, раздели́тель воды́,/ зде же Гаврии́л, служи́тель чудесе́./ Тогда́ глубину́ ше́ствова немо́кренно Изра́иль,/ ны́не же Христа́ роди́ безсе́менно Де́ва./ Мо́ре по проше́ствии Изра́илеве пребы́сть непрохо́дно,/ Непоро́чная по рождестве́ Емману́илеве пребы́сть нетле́нна./ Сый и пре́жде Сый,/ явле́йся я́ко Челове́к,// Бо́же, поми́луй нас.

Вход. Прокимен дня. Паримии преподобных – 3.

На стиховне стихиры преподобных, глас 8-й:

О ве́ры сла́вныя, о любве́ благи́я! / Всечестни́и Кири́лл и Мари́я, / я́ко же и во дни дре́вния / Анна, ма́ти Самуи́ла проро́ка, / в служе́ние и дар Бо́гу, / Дарова́телю вся́ческих благ, / пре́жде да́же не роди́тися их младе́нцу, // в сове́те свое́м того́ прино́сят.

Стих: Честна́ пред Го́сподем / смерть преподо́бных Его́.

Богому́дрии Кири́лле и Мари́е, / ча́до ва́ше Варфоломе́я, / е́же есть сын ра́дости нарекли́ есте́, / той бо вои́стинну Росси́йстей земли́ яви́ся ра́дование, // ско́рый помо́щник и пресла́вный чудотво́рец.

Стих: Что возда́м Го́сподеви о всех, / я́же воздаде́ ми?

Промышле́нием Бо́жиим води́мии, / преподо́бнии Кири́лле и Мари́е, / в зе́млю Ра́донежскую пресели́стеся, / ю́же и доброде́тельми ва́шими украси́ли есте́, / по́двиги благоче́стия показа́вше, / и лю́ди в ней живу́щия, // путе́м Христо́вым ше́ствовати поуча́ли есте́, блаже́ннии.

«Слава» – преподобных, глас 4-й:

В по́двизе роди́тельстем до́бре труди́вшеся, святи́и, / в нем же и ча́да ва́ша, / Петра́, Стефа́на и Варфоломе́я избра́ннейшаго, / в ре́вностнем служе́нии Триеди́ному Бо́гу / и Пречи́стей Бо́жией Ма́тери воспита́сте. / Ны́не и нам моли́твами ва́шими помози́те, блаже́ннии, // путе́м Христо́вым неле́ностно ше́ствовати.

«И ныне» – Богородичен воскресный по гласу «Славы»:

При́зри на моле́ния Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющий,/ Тя бо Еди́ну тве́рдое и изве́стное утвержде́ние и́мамы/ и Твое́ предста́тельство стяжа́хом,/ да не постыди́мся, Влады́чице, Тя призыва́ющии,/ потщи́ся на умоле́ние Тебе́ ве́рно вопию́щих:/ ра́дуйся, Влады́чице,/ всех по́моще, ра́досте, и покро́ве,/ и спасе́ние душ на́ших.

По Трисвятом – тропарь преподобных, глас 3-й:

Блаже́нств Христо́вых прича́стницы, / честна́го супру́жества и попече́ния о ча́дех до́брый о́бразе, / пра́веднии Кири́лле и Мари́е, / плод благоче́стия, Се́ргия преподо́бнаго, нам яви́вшии, / с ним же усе́рдно моли́те Го́спода / низпосла́ти нам дух любве́ и смиренному́дрия, / да в ми́ре и единомы́слии // просла́вим Тро́ицу Единосу́щную.

«Слава, и ныне» – Богородичен воскресный, глас тот же:

Тя́ хода́тайствовавшую спасе́ние ро́да на́шего, / воспева́ем, Богоро́дице Де́во: / пло́тию бо от Тебе́ восприя́тою Сы́н Тво́й, и Бо́г на́ш, / Кресто́м восприи́м стра́сть, // изба́ви на́с от тли́, я́ко Человеколю́бец.

На утрене на «Бог Господь» – тропарь преподобных, глас 3-й (дважды). «Слава, и ныне» – Богородичен воскресный, глас тот же: «Тя, хода́тайствовавшую…».

Кафизмы 7-я и 8-я. Малые ектении. Седальны преподобных (по дважды).

Полиелей. Величание преподобных и избранный псалом. Седален преподобных по полиелее, глас 1-й (дважды). «Слава, и ныне» – Богородичен Минеи, глас тот же. Степенна – 1-й антифон 4-го гласа. Прокимен преподобных, глас 4-й: «Честна́ пред Го́сподем смерть преподо́бных Его́»; стих: «Что возда́м Го́сподеви о всех, я́же воздаде́ ми?». Евангелие – преподобных. По 50-м псалме: «Слава» – «Молитвами преподобных…». Стихира преподобных, глас 6-й:

Прииди́те, вси ве́рнии, / роди́тели Се́ргия вели́каго восхва́лим, / си́и бо в ли́це святы́х земли́ на́шея / предстоя́т Престо́лу Пресвяты́я Тро́ицы / и приле́жно мо́лятся // о спасе́нии душ на́ших.

Каноны: Богородицы со ирмосом на 6 (ирмосы по дважды) и преподобных на 8.

Библейские песни «Поем Господеви…».

Катавасия «Отверзу уста моя…».

По 3-й песни – седален преподобных, глас 2-й (дважды). «Слава, и ныне» – Богородичен Минеи, глас тот же.

По 6-й песни – кондак и икос преподобных, глас 4-й.

Конда́к, глас 4:

Днесь, ве́рнии, соше́дшеся, / восхва́лим дво́ицу блаже́нную / благове́рнаго Кири́лла и Мари́ю добронра́вную, / ти́и бо мо́лятся вку́пе с возлю́бленным сы́ном свои́м, / преподо́бным Се́ргием, / ко Еди́ному во Святе́й Тро́ице Бо́гу, / оте́чество на́ше в правове́рии утверди́ти, / до́мы ми́ром огради́ти, / ю́ныя от напа́стей и собла́знов изба́вити, / ста́рость укрепи́ти // и спасти́ ду́ши на́ша.

На 9-й песни поем «Честнейшую».

По 9-й песни «Достойно есть» не поется. Светилен преподобных (дважды). «Слава, и ныне» – Богородичен Минеи.

«Всякое дыхание…» и хвалитные псалмы.

На хвалитех стихиры преподобных, глас 4-й:

Приспе́ днесь пра́здник преподо́бных Кири́лла и Мари́и, / ра́дости духо́вныя испо́лненный, / прииди́те, росси́йстии собо́ри, / све́тло торжеству́им, / и сих хвала́ми и пе́сньми почти́м: / ра́дуйтеся, Небе́снии челове́цы и земни́и а́нгели, / Земли́ Росси́йския засту́пницы и храни́телие, // и моли́твенницы о душа́х на́ших.

За́поведь страннолю́бия соблюли́ есте́, святи́и, / лю́дем бо в путьше́ствии су́щим, / дом свой прибе́жище явля́сте. / Ны́не же в Небе́сных черто́зех пребыва́юще, / нам, в стра́нствии жития́ су́щим / в кро́ве Бо́га Небе́снаго помози́те водвори́тися // ва́шими моли́твами, блаже́ннии.

Доброде́тельми сия́юще, / благоче́стно в ми́ре пожи́ли есте́, / свя́те Кири́лле и Мари́е пресла́вная, / смиренному́дрием и чистото́ю укра́шеннии. / Ны́не же хода́таи к Бо́гу бу́дите о оте́честве ва́шем / и грехо́в оставле́ние испроси́те // чту́щим любо́вию святу́ю па́мять ва́шу.

Блаже́нства непоро́чных вожделе́вше, / путе́м за́поведей Госпо́дних теко́сте / и, суеты́ жите́йския изба́витися хотя́ще, / во оби́тель Пресвяты́я Богоро́дицы всели́стеся, / иде́же земно́е стра́нствие сконча́вше, / Вы́шняго Сио́на достиго́сте. / Сего́ ра́ди моли́теся, преподо́бнии, // и нам прича́стником Небе́снаго Ца́рствия яви́тися.

«Слава» – преподобных, глас 8-й:

Прииди́те, празднолю́бцы, / пе́сньми духо́вными благоче́стно восхва́лим / честну́ю дво́ицу, благочести́вую чету́, / Кири́лла и Мари́ю приснопа́мятных, / и́же во оби́тель Хотько́вскую прите́кше, / ве́чное упокое́ние обрето́ша. / Мы же, ра́це моще́й их моли́твенно предстоя́ще, / я́ко покрови́телем и нача́льником оби́тели сия́, / вку́пе вси согла́сно взыва́ем: / ра́дуйтеся, преподо́бнии Кири́лле и Мари́е, // оби́тели Хотько́вския пресла́вное похвало́ и утвержде́ние.

«И ныне» – Богородичен Минеи, глас тот же:

Влады́чице, приими́ моли́твы раб Твои́х / и изба́ви нас // от вся́кия ну́жды и печа́ли.

Великое славословие. По Трисвятом – тропарь преподобных, глас 3-й. «Слава, и ныне» – Богородичен воскресный, глас тот же: «Тя, хода́тайствовавшую...».

На часах – тропарь и кондак преподобных.

На Литургии блаженны преподобных, песнь 3-я – 4 (со ирмосом) и песнь 6-я – 4.

По входе – тропари и кондаки:

В храме Господском и Богородицы – тропарь храма, тропарь преподобных. «Слава» – кондак преподобных, «И ныне» – кондак храма.

В храме святого – тропарь храма, тропарь преподобных; кондак храма. «Слава» – кондак преподобных, «И ныне» – «Предстательство христиан…».

Прокимен, аллилуиарий и причастен – преподобных.

Апостол и Евангелие – дня и преподобных.