Кыдз ме винакöт дугдi тöдчыны 16 страница

— Здоровöсь олат, — горöтчис мужик. — Вот ошкин, дак ошö пöрмим. Каналья вот, ходовöй ремень орис. — Сiя няпыртiс чуннесö нöш кодь кулакö и грöзитiс кымöрлань: — Вот тэныт... вот... Грешнöй Илья. — Сыбöрын миянлiсь юалiс: — А, может, отирас мича? А, может, ми только грешнöйöсь? Каждöй лун ременнез орласьöны, а то ми важын ни бы няньсö дзимлялiмö.

— Висьтась, Николай Маркович, кыдз тiян семейнöй подряддэз уджалöны? — юалiс секретарь.

— Да уджалам, отир сьöрись ог кольччö, — сiя паныт секретарьлö видзис ответ.

Николай Маркович тшöктiс недыр кежö сувтчывны (сувтöтлыны?) уджалiсь комбайннэзöс и кытсалiс чукöртчыны ас дынас комбайнеррезöс.

Мужиккез жагöника, сьöрсьöн-бöрсьöн сибöтчисö тöдсасьны миянкöт.

Сибöтчис том мужик, пельпоннэзыс косöй сажень, юрсиэзыс сэтшöмöсь жö рыжöйöсь, кытшöмöсь и Николай Марковичлöн. Сiя кисö нюжöтiс здоровайтчыны и горöтчис:

— Кучев Василий, комбайнер.

Мöдiк мужик, сэтшöм жö здоровöй, висьталiс:

— Кучев Иван, комбайнер. Эшö öтiк:

— Кучев Григорий.

И сiдз сьöрсьöн-бöрсьöн тöдсасисö дас морт, кин комбайнерлöн помощник, кин шофёр, кин тракторист. Быдöнныс здоровöйöсь, топытöсь, рыжöйöсь. Быдса гвардия.

Ме дивуйтчöмöн, кытшöмкö тöдтöм интересöн видзöтi этна детинаэз вылö. Николай Маркович шыннялöмöн, чикыра синнэзöн видзöтiс то ме вылö, то парткомись секретарь вылö. Тыдалiс, что сiя гордитчö аслас бригадаöн.

— Но, кыдз, зоннэз, внучеккез, мый висьталам партийнöй секретарьлö да округись представительлö, — горöтчис Николай Маркович.

— А сiдз и висьталам, — горöтчис öтiк ны коласiсь, — медбы запчасттез ас кадö вайисö, а обязательствоэз ассиным тыртам. Гусеницаэз бы колöны. Ходовöй ременнез — сьöкыт комбайннэзыслö — нiя часто орласьöны.

Миян сёрни ныкöт вöлi не дыр. Комбайнеррез старайтчисö не лэдзны шондiлiсь дженытик мича петалöм.

Рытнас бригаднöй керкуö чукöртiм отирöс. Ме нiйö тöдсöтi, кыдз мунö уборка округын, висьтаси медодзись мунiсь механизаторрез йылiсь, кыдз нiя пессьöны урожай понда. Ме дынö да парткомись секретарь дынö вöлiсö уна вопроссэз: кöр метеосводка сьöртi сувтчас погода, мыля не аскадö снабжайтöны запчасттезöн, кытшöм виль приспособленнёэз керисö комбайннэзö, медбы чожажык дзимлявны сю.

А кинкö отир коласiсь обидаöн кöритiс миянöс, что уна висьтасим округись бур механизаторрез йылiсь, а татiсь комбайнеррез йылiсь шы эг сетö.

— А миян мый, разь умöльöсь? Вон видзöтö Николай Маркович пияннэз вылö. Быдса бригада, каждöй мужик — богатырь. Ми ог адззылö, кöр нiя ыб вылö кайöны, кöр гортö вовлöны. Чожа, натьтö, иннезныс ныись откажитчасö, — шыасис кытшöмкö инька.

Собраннё бöрын Николай Маркович миянöс корис гортас. Потшшуйтiс сола тшакöн, маöн, юкталiс сюромкаöн, конечно, вöлi и вина. Ми дыр баитiм öтiк-мöдiк йылiсь. А сыбöрын ме горöтчи Николай Марковичлö, что зоннэз, кыдз богатыррез, ладнöйöсь, ныкöт кокнит уджавны. Николай Маркович чикыртiс öт синсö, нёджжöвтiс инькаыс вылö и китш-китш ваксьыштiс. Хозяинлöн инькаыс лöгöн дзарнитiс мужикыс вылö и шваткис:

— Ошшась, ошшась, кöбель тэ.

— А мый тэ лöгалан, Липушка? Может, менам оланын эта и эм главнöй гордость. Дело керöм и кад ни уна чулалiс, и зоннэз — во! — сiя мыччалiс кыз, тупика певсö. — Сэтшöм детинаэсö округись он адззы. Бригадалöн опора. Менам позор счастьеö пöрис.

Иньыс мунiс комö и пондiс миськавны паньбекöр.

— Зоннэз, конечно, сира пуэз, не ме кодьöсь кöсперккез. Но эд нiя, кыдз вежöртанажыка висьтавны, не быдöнныс менам досповна зоннэз, не быдöнныс бытьтö закон сьöртi. Нiя менам зурасян кадся ошибкаэз.

Николай Маркович адззö, что ме ог вежöрт, китш-китш ваксьыштiс, кисьтiс рюмкаö вина.

— Этö медбы волькытжыка висьтаси, а тэ буржыка кывзы, — висьталiс хозяин.

— Тырмас ни тэныт быздыль моз пизьнытö, адззöмат мыйöн ошшасьны, — горöтчис иньыс комсянь.

— Эн шыасьлы, Липушка, ме этасянь öнi умöльжык ог ни ло. Дело важся ни. Но дак кывзö Марко Колялöн зурасян кад йылiсь.

Николай Маркович буржыка пуксис пызан бердö, коккезсö вежмалiс, керис чигарка, лэдзис öмсис кольцоэзöн тшын и пондöтiс:

— Война вотöдз миян деревня вöлi неыджыт, куимдас хозяйство гöгöр, но олiсö справнöя. Томпöлöсыс вöлi тыр, быд ар свадьбаэз орсiм. А ме эшö сэк вöлi няркодь, нывкаэз ме вылö дзар эз керö. Но деревняын ме вöлi медбур гармонист. Босьта ассим хромка, вонöлiсь козин — армияись вайис, паськöта сылiсь гöрд сарафана меххесö и деревняын, гожумнас öтöрын, а тöввезнас — посиделкаэз вылын, томмезсö пымавтöдз йöктöта.

Пондöтчис война. Первося месяцас жö кыдз тöвчикöн нöбöтiс том мужиккезöс и зонкаэзöс деревняись — война вылö мунiсö. Кольччисö только инькаэз да кынымкö старик. А джын год бöртi и ме мунi фронт вылö. Да мед сiя неладнöй, ме етша воюйтi.

Первося жö бой коста менам веськыт ки кузя кыдз жвангис осколок, сiдз киö плетьöн и öшöтчис. Логöдз кынöм вылам гуж кысси и куйла. Вдруг синнэз вылам усис — ме одзын, кынымкö метра ылына, тожö кынöм вылас куйлö фашист и ме вылö быгалöм синнэзнас барöтчö. Ме сы вылö сёян синнэзöн дзирга, сiя ме вылö рысь синнэзöн вирдалö. Сiя оз лый, ме тожö ог лый, да и кыдз винтовкасö босьта — киö плетьöн öшалö. Ме понда чеччыны, сiя тожö чеччö. Мый жö тэкöт керны, паразиткöт, зэлöта веммезöс, думайта. Сыбöрын ме, мымда эшö кольччис вын, горöтi: «Хöндö хох!» Сiя киэсö лэбтiс и сувтiс коккез вылас и чепöссис ме вылö. Автомат прикладнас сöтiс бы юр кузям, а ме сiйö одзалi и брынги кок коласас, фашист öмсö пиньöвтiс и усис гатш. Ме сы вылö, и нырыштi шульга кинам сылiсь юрсö му бердö. Но кытшöм менам вын, ранитöмлöн? Синнэз одзын то пемдö, то югдö. Веськыт киö сотчö. Фашист мездiсис и пондiс менö джагöтны. А кыдз одзлань шогмис, и висьтасьны ог вермы. Шедiс пиннез увтам мыйкö небыт, сыбöрын, кыдз порсь пель только ярс керис и нырам пондiс вачкыны вир дук. Фашист сырлёльсялiс. Кыдз веммезö югдыштiсö, менам пиннезö сё эшö фашистыслiсь горшсö сёйисö. Тьфу! Сэрпöсьтi öмöс гад вылын. Вот сымда ме и воюйтi.

Николай Маркович ыш ловзисис, спинасö веськöтiс и горöтчис:

— А миян деревняись отир бура воюйтiсö фашисттэзкöт, öтiк морт гортö эз берт ордентöг да медальтöг. А öтiк геройöн торксис.

Инькаыс комсянь бöра шыасис:

— Мый горзан, тэ эд тожö герой... Инькаэз боккезын.

— Ладно, Липушка, эн öмав, если пондi, всё одно, быдсöн висьтася. Дак вот, гöссез, сiдз менам и воюйтöм помассис. Госпитальын куйлi джын год, а киö сiдз эз и веськав. Локтi гортö медодз.

Деревняын похоронкаэзсянь герьялöны-горзöны инькаэз, челядь. А менö совесть кутö, кыдз бытьтö виноватöй, что кöть öтiк киа, а ловья.

Менö сувтöтiсö бригадирöн и пондi воюйтны инькаэзкöт да челядькöт. Гöрим, кöдзим, сю дзимлялiм и вöр керим. Кынöммезын кынмöм картошкаись похлёбка больöтö, коккез умöля кыскалiсö, а быд лун пемытсянь пемытöдз уджалiм. Быд мортлöн сьöлöмыс öгралiс: «Быдöс фронт понда».

Медбы кöть невна вöлi отирлö гажажык, ме шульга кинам велöтчи орсны гармошка вылын. Гожуммезнас амбар одзö пондiсö рыттэзнас чукöртчывлыны отир. Том вдоваэз гажтöмсянь тожö пондiсö петавлыны амбар дынö, медбы кöть невна кежö вунöтны ассиныс горесö.

Вот эстöн бес менö быдсöн и соралiс. Том, вир пизьö.

Перво пондi кольлавны визыв Аннаöс. Öддьöн ни бытшöм да ёся вöлi сiя. Кыдз синнэзнас вирдыштас, сiдз кыдз бытьтö гуö усян. Перво кольлавлi ыбöс дынöдз, сыбöрын порог весьтöдз, а сэсся и узьланöдз.

Анна бöрсянь сiдзжö пондi кольлавны Любаöс. Эта инька пыр вöлi печальнöй, гырись голубöй синнэзыс пыр мыйкö тöждiсисö, видзчисисö. А ме сiйö ас мознам вежöртi и сiйö грекö пыртi. Вот умнöй отир шуöны, оз пö туй сразу кыкöс любитны, а ме вот стрась кыдз любитi. Öнi касьтыла энö годдэсö, спина кузя кöдзыввез котöртöны.

Менам сэк совсем юрö бöбмис, мый одзлань лоас — нем эг думайт. Но чожа похмелья юрсим петiс. Перво öтiк вдова тырсялiс, сыбöрын мöдiк. Ме деревня кузя кыдз петух ветлöта, а ачым отир синнэзö пола видзöтны.

Перво Анна кык зон чужтiс, сыбöрын Люба — тожö кыкö. Кöть бы öтiкöн, а то кыкöн... И некытчö воштiсьны, суськисьны оз позь, быдöнныс, кыдз нарочно, ме вылö вачкисьöны, рыжöйöсь, понпутшаöсь. Йöзö оз туй петны, кин-нибудь лöгöн бöрсяням кыдз вазгас-горöтчас: «Кобель-производитель».

Эг вермы терпитны эттшöм позорсö, вöрö уджавны пышши. Сэтчин и Липушкакöт öтлаасим, сiя меным эшö öтiк зон чужтiс.

Пышшав эн пышшав, а куим год бöртi гортö ковсис бертны. Керку сиротаöн коли, а эта миян деревняын мужиклö медыджыт позор. Только гортö локтi и петi деревня вылö, кыдз бес уснитöм: Анна паныт шедö рыжöй пияннэзнас. Сiя ме вылö лöгöн синнэзнас вирдыштiс и зоннэзыслö висьталiс, вот пö тiян тятьныт. Менам сьöлöм чуть эз пот, коккезö только викыль керсисö — вот-вот камгися-пöра.

Кыдзкö ме гуна вылын сёрми и менö гöгöртiсö Анна да Люба, кыдз тiян шуöны, важ модззезö. Нiя кыдз змеяэз перво ме вылö дзардiсö, и сэсся Анна горöтчис, ноко пö, Люба, шулялам жöничокнымöс. Ме сiдз и этадз пондылi падмöтны нiйö, да кытчö тэ. Пöрöтiсö, стыд и позор, вешьянöс лэдзисö, да кыдз вермисö, петшöрöн кулисö да кулисö. А Анна горöтлö, сэтчö пö, сэтчö, грех керан кузяс буржыка вольдам. А Люба вак-вак ваксьыштiс, сьöвзис грех керан вылам да горöтчис: «И ме эттшöм лёшмöм гобанас сыкöт узьлi...»

— Николай, срамник, кыдз эшö тэнат совесть тырмö сэтшöмсö висьтасьны, мый йöз морт тэ йылiсь думайтас? — öлiс хозяинлöн иньыс. — Кыдз унажык пöрисьман, сымда мывкыдтö öштан. Да орöтны колiс, медбы меринöн ветлöтiн.

Николай Маркович кинас öвтыштiс и одзлань пондiс висьтасьны: «Инькаэз згальничайтiсö-згальничайтiсö да лэдзисö жö. Ладно пö, кольлам эшö, может, кинлöкö ковсяс.

Эта бöрсянь бöр гöгöрö неделя висис, не пуксьыны, не водны бытшöмика эг вермы.

А чожа инькаэз бöра ме вылын згал керисö: челяддезнысö гортö вайöтiсö и колисö, пияннэтö пö пестунчайт, пасьтöт, верд да юктав. А зонкаэз, рыжöй чертёноккез, быдсöн керкусö мöдöртiсö. Мый кытöн вöлi: пимиэз гор вылiсь джоджö лэдзисö, молотоккезöн стукöтчöны, лампа жугдiсö, ведраись ва джоджö пöрöтiсö, садiсисö. Чуть ме ныкöт неделя коста эг йöймы и пышши керкусим. И тi бы мый думайтiт — Липушкаö этна инькаэзкöт заодно вöлöма.

Неделя бöртi Анна и Люба нöбöтiсö зоннэзнысö. И вот сэксянь ме пондi аслам законнöй и незаконнöй зоннэз вылö уджавны. Пес вая, турун отсала ытшкыны, паськöм неба, велöтчыны отсалi.

А чертёноккез учöтсянь пондiсö шуны тятьöн, перво лöгалi, кöть бы дядьöн ли мый ли шуисö, сыбöрын велалi и нельки рад лои. И инькаэзлöн сьöлöмись мезмис ме вылö лöгалöм.

Зонкаэз быдмисö. Отсаси, быдтi, вердi, сирзисö пияннэз. И öнi öддьöн ни бур, да спасибо, что тятьöн öнöдз величайтöны.

Но сё эшö юр веммез мукöдпырся пильöтö думка — бертiсö бы инькаэзлöн мужиккез, Марко Колялöн бы юр майöг вылын öшалiс. Кыдз этö думайта, вывтыр кузя кöдзыт ваöн койыштö.

Но и висьтасьöм бöрсянь керам вывод: сё жö эта шогмис не весь. Вон кытшöм гвардия быдтi: колхозлö бур, государстволö — защитниккез, да инькаэзлö тожö отсöт. А внучоккезö мымда — о-о, быдса деревня, быд угöлын величайтöны дедöн.

Вот мый вермис шогмыны зурасян кад коста. Николай Маркович эшö юкталiс миянöс сюромкаöн и горöтчис:

— Мый вöлi, то вöлi. Петшöрöн ни быдмис. Но некинлö ог желайт, медбы сiдз шогмис. Кыдз шуö поговорка: «Ассит честьтö томсянь берегит». Но а миян семейнöй подряд понда эд тöждö. Сю дзимлялам. Не Илья пророк, не сотана менчим богатыррезöс оз падмöт.

Николай Маркович чеччис ас местасис и горöтчис:

— Но, Липушка, медбöрьяись висьтаси.

Ме сё жö эг терпит, юалi сылiсь, висьтав, мыся, миянлö, Николай Маркович, кыдз тэнат зоннэзыт да внучеккезыт некытчö эзö мунö гортiсь мöдiк местаэзö. А то мöдiк деревняэзiсь томпöлöсыс видзöтö, кыдз бы городдэзö мунны.

Хозяин менам юасьöм вылö шынь керис, кашляйтыштiс и горöтчис:

— Мыйлö мунны городö? Менам зоннэз да и внучеккез учöтсянь велöтчöмась му бердö. Му — этö, батюшко, быдöс: олан, счастье. Менам челядь, кыдз только пондiсö вермыны пуксьыны вöв вылö, пондiсö му гöгöр гуддисьны. А быдмисö, мунiсö велöтчыны комбайнерö, трактористö, шофёрö. А öнi и деревня мöдкодьсялiс. Видзöтö кöть миян деревня вылö: электричество эм, быд керкуын телевизор, радио, шыркйöны-гöняйтöны мотоцикллэз вылын, пасьтасьöны, кыдз городын. А природа, вöр — сiя разь эм городын? Конечно, самöй главнöйыс — колö учöтсянь велöтны любитны, любитны му, природа.

Ми сёрöдз пукалiм. Асывланяс кымöрыс пондiс югдыны, кылiс петуххезлöн китсасьöм.

Николай Маркович видзöтiс öшынö и висьталiс, что öтöрын мича, колö чеччöтны зоннэсö и мунны уджавны ыб вылö. Öнi быд мича час — золото.

 

ОШ ВИЙИССЕЗ

 

Педагогическöй институт кончитöм бöрын менö ыстiсö уджавны севернöй районö, медылiсь деревняö. Деревня, кöдö шуисö Ошйöрöн, районнöй центрсянь вöлi дассизим километра гöгöр. Да и кин сiйö тöдö, быль ли сымда? Деревняын олiсь отир, кöр касьтылам дассизим километра, шыннялöмöн горöтчасö: «Кин тöдö, ош меряйтiс». Эта деревняын ме велöтi челядьöс.

Öтпыр, кöр ми лöсьöтчим челядькöт мунны экскурсияöн вöрö, ме юалi учениккезлiсь, кин бура тöдö вöр, кинöс бöрйыны старшöйöн. Öтiк нылочка перыта сувтiс и гордöя горöтчис:

— Вон тай, Колькаыс, ош вийисьыс. Сiя бура тöдö, и герой...

Ме тшöктi Коляöс сувтны. Восьмиклассник Коля, топытик, синнэз добрöя шыннялiсö, но сiя немымда эз вачкись герой вылö. Сыбöрын эшö неöтпыр кылi, кыдз челядь нимкодялiсö Коляöс и сылiсь вонсö, Ваняöс, ош вийиссезöн. Менö кутiс интерес, мыля нiйö сiдз нимкодялiсö, и вот мый меным висьтасисö челядь...

Война бöрын сьöкыт эшö вöлi овны. Нянь эз тырмы, да и картошка-капуста пöттöдз эз вöв. Колялöн да Ванялöн (öтiкыс сэк велöтчис витöт классын, мöдыс — нёльöтын) пыр сималiсö кынöммезныс, сьöлöммезныс кошшисисö сёйны чöскытжыкö. Но кысь сiйö чöскытжыксö ваян? Магазинiсь он босьт — абу.

Айныс зонкаэзлöн война вотöдз вöлi бур вöралiсь, некöр эз берт вöрсянь пустöй котомкаöн, сё ни мыйкö ваяс: дозмöр, тар, кöч, а кöр и ыджыт сюраöс. Но öнi айыс оз прокмы. Война вылын веськыт коксö снаряд орöтöма. А пишаль-централка öшалö полать вевдöрын, нач весь. Айыс гажтöма видзöтлö весь öшалiсь пишаль вылö, коккезыс вылö и ныр увтас бура видö фашисттэзöс... А мукöдпырся кöрттув вылiсь лэдзас пишальсö, кыдз учöтик кагаöс малалас-любитас, ыш ловзисяс да бöра öшöтас. Думаэзнас горöтчас: «Зоннэзöс бы велöтны вöравны, да кыдз коккезтöг велöтан».

Коля бытьтö тöдiс думаэсö айыслiсь и тожö важын ни видзöтлiс весь öшалан пишаль вылö, но сё полiс юавны айыслiсь — откажитас.

Арнас айыс кынмалiс и пондiс бура шогавны: перво не öддьöн кашляйтiс, а сыбöрын пондiс вирöн сьöвзьыны. Деревняас отирыс баитiсö, что айыслöн пö нёштöм шогöт, медбы веськавны, колö пö бура вердсьыны: яй-кольть сёйны. Сiдзжö отирыс баитiсö, колö пö отсавны мужикыслö — шедтыны кыськö яй.

Пондöтчис ноябрь. Юэз зэлöтiс мороз. Усисö медодзза лыммез. Зонкаэз адззöны, айныслö быд лун лоö сё умöльжык и умöльжык. Öддьöн жаль сы вылö видзöтны, кыдз сiя кусö.

Кыдзкö Коля кытсалiс Ваняöс комö, медбы некин эз кыв и горöтчис:

— Ванька, ветлам вöравны? Пишаль весь öшалö... Тятьö кусö...

— Тэ мый, Колька, — повзис вонокыс. — Айö видчыны пондас, а то вартлас.

Коля сё ассис: видзöт пö, тятюö сё умöльжык и умöльжык, сылö пö колö сёйны яй, а то эд кулас. Да и ми бы сёйим пö.

Кресенняö, кöр только пондiс югдыны, воннэз гусьöника лэдзисö пишаль, петiсö комö и проверитiсö провиант.

— Этна заряддэзыс пöткалö, а этна ог тöд мый понда, — гусьöнмоз баитiс Коля.

— А вон пуляэзöн, — мыччалiс патроннэз вылö Ваня.

— Нiя, натьтö, лоссез понда, — содтiс Коля. Зонкаэз кытсалiсö Тупыльöс, сiдз шуисö поннысö, иньдöтчисö вöрö. Мунiсö огородеччезöт, баняэз сайöт, медбы некин эз адззыв, эз пантась.

Локтiсö вöрö — шы не тöв. Разь только чегас ув или чепöссясö-лэбзясö учöтик кайез. Кык вон, Коля одзас, Ваня мышкас, оськалiсö одзлань. А вот и Нюрвидз чулалiс, эстöн пуягöд да чöд гожумнас челядь öктöны. Кыдз только пырисö вöрö, Тупыль кытчöкö öшис. Эшö мымдакö мунiсö, и поныс пондiс чожа-чожа вувтны. Зонкаэз кинитчисö вувтöм вылö. Тупыль дзöрис, чеччалiс и вувтiс кöз вылö. Челядь нёджжалiсö-нёджжалiсö, некин син вылö эз усь.

— Бöбöтчан тэ, Тупыль, — горöтчис Коля, и мöдiс мунны ни, кыдз син вылас усис ылiсь ур. Коля лэдзис пельпон вылiсь пишаль и лöсьöтчис лыйны, но Ваня падмöтiс, весь пö эн торк зарядсö, кытшöм пö сыись яй, да и кин сылiсь, понся, яйсö сёйö. Колька кывзiс, быль пö, колö ли торкны заряд, поди, дозмöр ли, кöч ли шедас. Тупыль адззö, что весь сiя горшсö летiс, никöстiс, викыльтiс бöжнас и котöртiс одзлань.

Зонкаэз дыр ни шатласисö вöрын, сэсся некин паныт эз шед: не кай, не ур. Мыдзисö, коккез вугмисö. Ванялöн öшис интерес вöралöм дынö. А Коля думаэз вылö усис шогалiсь айыс и синваэз петiсö: весь кывзiс вонсö и эз уськöт урсö. Мукöд отирыс тай и урресö сёйöны — лекарство понда. Да и казялас айыс, что босьтiсö пишальсö юасьтöг — видас, а сiдз бы, может, и эз.

Коля висьталiс воныслö, петам пö Шарыбланьö и, если некин паныт оз шед, мунам гортö. Только горöтчис медбöрья кыввезсö, кывсис горзöмöн, нёштöма Тупыльлöн вувтöм. Зонкаэз котöртiсö понлань. Кöр сибöтчисö, Тупыль чеччалiс то öтöрö, то мöдöрö, то петитчас, то кинитчас пöрöм ыджыт коряга вылö.

Коряга одзын нораö осьта, а осьтасис петö кымöрокöн ру.

— Колька-а, кинкö сэтчин эм, — полöмöн нюжöтiс Ваня, и аслас юрсиэзыс пондiсö лэбтыны шапка. — Поди, ош?..

— Эн кижгы, — дразнитöмöн горöтчис Коля, — поди, ош... Кытшöм татöн, деревня дорын, лоас ош? Мало ли кин нораас оз дзебсись.

Но сё жö Колька пишальсö зарядитiс. Мало ли, думайтiс зонка.

— Ванька, чувйышт норасö, — шушкöмöн сiя мыччалiс кузь чегöм ув вылö.

Ваня жагöника, дрöжитан коккезöн сибöтчис нора дынö и полöмöн чувйыштiс осьтаас. Шы не тöв. Коля сайöвтчис пожум сайö, лöсьöтiс пишаль и видзöтiс Ванялань. Сiя перытжыка пондiс чувйыны норасö. Тупыль горшсö летiс, чеччалiс нора одзын. И сэсся, кыдз вöтын: мыччисис нораись ыджыт, кыдз кык ведра тöрик сьöд чугун юр и ньылыштiс Ваняöс öтлаын бедьнас, а Тупыльлöн только юр-кокыс резсис. Колька метитчис или эз метитчы, сiя ачыс оз вермы висьтавны, — пишальыс кожгис-лыйис. Сы коста жö Коля моросö мыйöнкö дангисö и сiя берездасис пожум бердö. Сэсся быдлаын лоис лöнь. Не ош, не Ванька, не Тупыль — некин абу.

Колялöн веммезыс пемдiсö, и ачыс эз казяв, кыдз сiя локтiс деревняö, ышки-пойки пырис гортас, чöвтчис-пöрччасис и водiс горвылö.

Мамыс, кöда лöсьöтчис пуны картошка, кинитчис зоныс дынö:

— Ах тэ, каналья, бöра кинкöткö тышкасин, вот ме тэнö, — шедiс киас рос, и мöдiс вачкыны. А зонка туплясис, сыркьялiс-горзiс. Комись петiс айыс и тожö сибöтчис зоныс дынö.

— Колька, мый тэкöт? Кытöн бöра, мый бöбалiн? — видчöмöн юасис айыс.

Коля кыв эз вермы горöтчыны, дрöжитiсö коккез, киэз, кыдз бытьтö зэгйис лихорадка. Сыбöрын сорасьöмöн горöтчис:

— Тять, сэтчин... ош... Ванькасö ньылыштiс...

— Кытшöм эшö ош? — мамыс хлоп вачкис киэзнас боккез кузяс.

— Сэтчин, Шарыбас... — сыркьялiс Коля.

Айыс вижгыльтчöмöн уськöтчис ыбöсö, котöртiс деревняö. Чожа öксисö кынымкö вöралiсь. Доддялiсö вöввез, Коляöс пуксьöтiсö додьö и гöнитiсö вöрö.

Локтiсö сiя местаö, кытöн только неважын шогмис трагедия. Перво вöралiссез синнэз одзö мыччисис понлöн юр, а тушаыс öшалiс коряга вуж вылын. Кöр жагвыв мöдöртiсö, адззисö коряга увтiсь ыджыт ош гу, асланыс синнэзлö эз веритö: пукалö ыджыт пöрись ош и, кыдз бытьтö ассис пиянсö, ласковöя ыжмитöм ас бердас зоночкаöс — Ваняöс. Ош абу ловья. Шульга лопатка увтiсь сё эшö сöдзö вир. Ваня нето узьö, нето садьтöм. «Но и но, — только бергöтлiсö юррезнаныс вöралiссез, — но и история...»

Недыр мыйись зонкаэз повзьöмсянь веськалiсö. Ош яй да гос содтiсö вынсö айныслiсь и сiя пондiс веськавны. А зонкаэзöс деревняын нимкодялiсö «ош вийиссезöн».

 

ВЕШТIСЬÖМ

 

Ме ола городын, но öддьöн радейта ветлыны горт деревняö, кытöн чужи да быдми.

Миян деревняын отир добрöйöсь, ласковöйöсь и весельчаккез, мужиккез и инькаэз проворнöйöсь да отчаяннöйöсь — не весь сöстöм руöн лолалöны и бур зöрись брага юöны.

Кöр локта гортö, менам земляккез ой кежö непременно нуöтöны чериавны. И ме пыр радöн согласитча. Сэтчин, ю дорын, сьöд избушкаын, кузь гожумся рыттэзö нiя меным висьтасьöны быдкодь историяэз. Чери кыйиссез, кыдз вöралiссез жö, висьтасьны кужöны. Кытöн содтасö, кытöн мый.

А öння ветлöмын вот мый йылiсь висьтасисö.

... Кöдзыт ар. Мунö гражданскöй война. Колчаклöн отряддэз чывкöтöны-бандиталöны Коми крайын. Чочкоммезлöн отряд пырöм Юкся селоö ни. Сэтчинсянь миян деревняöдз, кыдз каян Чаня мыс вылö, кылiс винтовкаэзсянь да пулемёттэзсянь лыйсьöм.

Йöзыс баитiсö, что вот-вот нiйö куллес вайöтасö миянöдз, сiдзжö шушкöтчисö, что чочкоммез пö мырддялöны буржык вöввез, нöбöтöны сьöраныс паськöм да сёян, вартлöны отирöс, насильничайтöны нывкаэзöс да инькаэзöс, мобилизуйтöны асланыс отряддэзö том мужиккезöс.

Этатшöм басниэз сьöрын отир дзебасö вöввез, гуэзö новьясö паськöм, том отир мунасö пишаллезöн вöрö, а нывкаэз пукалöны джоджулын.

Кынымкö лун бöртi чочкоммез быль öтiк розваль додьын мыччисисö деревняö. Нiя перво пыраласö керкуэзö, вишкасö-нюкайтчасö, корасö буржыка вердны, винаöн юктавны. Сыбöрын ны коласiсь медглавнöй, — офицер, тшöктас чукöртны отирöс деревня шöрö.

Отир öксясö куимдас гöгöр морт, унажык пöрись мужиккез, инькаэз да эшö челядь,

Офицер гудыра кодь синнэзнас дыр дзиргас неыджыт пöрись отирись да челядись чукöр вылö и пондас горöтлыны:

— Тi мый, инороднöй племя, сылöн величество Колчак солдаттэз вылын кешитчат!.. Кытöн мужиккезныт? Кытчö вöввез дзебит? Гöрддэзöс видзчисят? Ме тiянлö мыччала бöбöв племялö, мыччала!.. Ачыс горшсö летiкö только шовк да шовк орсö небытик нагайкаöн. Сэсся сибöтчас деревняись медпöрись старик Никипер дынö да пондас тюкöтны нагайка оропнас сы морос кузя:

— Висьтав, пöрись, кытöн зоннэзыт?!

Дед Никипер перво пернапасасяс, матöжык сибöтчас офицер дынö да рочöн пондас баитны (сiя дыр царскöй армияын служитöм да бура рочнас велавлöм):

— Ваше шкабродде, менам 1914 годö Отечество понда куим зон юррезнысö пуктiсö война вылын. Менам некин сэсся абу, вот эта ме кодь жö пöрись понся.

Офицер чывкьялас-ветлöтас отир шöрын, öтiклiсь-мöдiклiсь юалас, кытчö дзебисö вöввез, кытöнöсь мужиккез.

Отирыс шы не тöв, мышкыра юррезöн сулаласö да видзчисясö, мый лоас одзлань.

Офицер сибöтчас старушка дынö, чатыртас сылiсь пöрись юрсö, тюкöтыштас сы моросö чуньнас и горöтас:

— Но, пырттöм, кытöн тэнат зоннэзыт?

Старуха тожö чожа-чожа пернапасасяс и пондас бобгыны ныр увтас: «Господи помилуй, господи помилуй, ме рочöн ог вежöрт и ог баит».

Эта коста отир коласiсь, кыдз чужмöр, чурс только петiс Христофор, богатей Парамонлöн батрачок, деревняись самöй отчаяннöй зонка, згальник и балагур. Сiя сибöтчас старуха дынö и пондас шушкыны сы пель одзö, этадз пö висьтав, этадз. А старуха пеллез вылас сьöкыт да и шуны бытшöма оз куж и то мый горöтчас: