Кыдз ме винакöт дугдi тöдчыны 2 страница

Таня и мамыс гусьöн сералiсö Марфа басни вылын. Марфа отсалiс Таняыс мамлö осьтны счастье вылö синнэз.

Сентябрь конецын рытöн Таня и зоотехник мунiсö колхознöй куш видззез вылöт чуклясьöм туёк кузя. Нiя эз тэрмасьö, сувтчывлiсö и видзöтiсö куш ыббез вылö. Таня баитiс, сералiс, а сыбöрын пондiс наизусть лыддьöтны кытшöмкö писатель рассказiсь отрывок:

«Коми инька... кин оз тöд коми советскöй инькаöс? Пыр величавöй, спокойнöй, добрöй, удж бердö лют. Коми инькалöн вына натура, сьöкыт, грознöй годдэзö вежас мужчинаöс, аслас биа сьöлöмöн шонтас слабöй мортöс, пöльыштас сыö вын, сувтöтас кок вылö. Кужö и гажöтчыны, радуйтчыны, крепыта любитны, биöн öзтыны сьöлöм».

— Правда, Серёжа, бурöсь кыввес? — юалiс Таня.

― Бурöсь, ежели тэныт гленитчöны, — паныт видзис ответ зоотехник.

Нiя локтiсö ю дорö. Пуксисö кер вылö. Серёжа босьтiс киэзас Танялiсь чикиссесö и внимательнöя видзöтiс ны вылö. Таня дернитiс чикиссесö, синнэсö сувтöтiс сы вылö, сыбöрын серöмтчис и ласковöя горöтчис:

— Орангутанг.

— Ежели тэ эшö пондан сiдз менö видны, сэсся ме тэнö ваись öтпыр ог кыскы, вöй, — ласкова горöтчис Сергей.

Таня повзьыштiс, чеччöвтiс местасис, веськыта видзöтiс сы синнэзö:

— Тэ! Вот кыдз. Сотча позорсянь! Но дак тэ сэсся менö он кыскы ваись.

Таня котöртiс ю дорö. Сергей сiйö вöтiс, лэбтiс киэз вылас и, кыдз кагаöс, жмитiс морос бердас.

Кытöнкö кылiс баддез коласын герскан. Тöлiсь югöррез вылын переливвезöн орсiс ва. Томмез ордчöн мунiсö ю дорöт и нем эз замечайтö, мый керсис гöгöр.

 

 

ТÖДIСЬ ПАЛАДЬ

 

Вот тi шуат, что тöдiссез — рочöн нiйö знахаррезöн шуöны; — нем пö нiя озö тöдö, только пемыт отирöс бöбöтлöны.

А ме, батя, верита нылö. И не только верита, эшö унажык висьтала: знахаррез — нiя, батя, öддьöн уна тöдöны. Эм миян öтiк сэтшöмыс. Сiдз и шуöны сiйö: тöдiсь Паладь.

Мый сералат? Сiйöн, мыля öмö пиньöла да шульга синö невна косöй? Эстöн эм причина. А кытшöм? Часöт висьтала. Неважын эшö ме вöлi öддьöн бытшöм, кыдз гöгрöса сёртни, стройнöй, кыдз вугыршать, басöк, голубöй-голубöй сина, м-м... кыдз бы тiянлö буржыка висьтавны... да, натьтö, адззывлiтö миянлiсь сера куканьсö öшын увтсиным, топ и топ сылöн синнэс.

Вот и висьтася, мыля ме эттшöм нёштöм лои. Эх, и гажтöм, батя, история вöлi, кывзат — синваэзныт петасö.

Перво наперво, конечно, тiянлö охота тöдны, кин ме сэтшöмыс. Висьтала — служащöй. Уджала ме солиднöй государственнöй учрежденнёын, Дуб-корьё или кокнитжыка шуны Бадь-шуль заготовительнöй организацияын. Должность менам тожö солиднöй — шуль прессуйтöм сьöртi зампомначбадь.

Дак вот. Ээ-э... Мый нö ме мöдi висьтавны? А-а, усис тöдвылам: ассим этö историяöс.

Öтпыр менам öддьöн и öддьöн пондiс пиньö висьны. Лыйö и лыйö, некытшöм спокой оз сет. Син одзын только гöрд-веж, гöрд-веж кöвьялö, анöс чашкöтлö. Мыйöн только, батя, эг лечит: и табаксö öмам видзи, и винасö вотьöтi, и ёдöн сотi, и... кыдз бы сiйö культурнöйжыка висьтавны — курöг назёмсö тэчлi, но немöн лечитны эг вермы.

Перво только öтiк анöс чашкöтлiс, а сыбöрын и рожабанö пыктiс, и öмö пиньöвтчис. Мый керны? Думайтi, думайтi да и некытчö лоис воштiсьны. Дугдывтöг пондi витшыктыны, а сыбöрын и мыктавны. Мыся, врач дынö колö мунны. Кыдз ме этö горöтчи, иньö дзик шардiс и пондiс модьны:

— Тэ мый, родимöй, эн мун больницаас, виясö тэнö сэтчин, öмсит коскаэтö быдöс мöдраласö. Сэтчин пиннесö пö черöбукöн да ломмезöн шедталöны. А вот тöдiсь Паладьыс öтпыр антö кресталас и сразу кыдз киöн шогöтсö босьтас.

Ме кыдз передовöй, несуевернöй морт, конечно, иньö вылö лöгаси и веськыта шуи:

— Тöдiсь Паладь дынö некöр ог мун. Ась, мыся, оча кок шватка, ась кула, но ачымöс ог понды позоритны!

Только ештi öмöс тупкавны, бöра кыдз ан кузям сöтiс, синнэзсим, батя, только би резсьыштiс, шульга бокам пондiс лыйны, чушыктыны оз сет, а гыркам дзик Илля пророк таратайкаöн пондiс гöняйтны... Сэсся нем ог тöд, мый мекöт вöлi, натьтö, кулавлi... быль, быль! Одö веритö дак иньöлiсь юалö. И вот кöр ловзи, сэк только вежöртi, что ме не гортын, а Паладь одзын ни сулала.

Кöть пиннез зника эзö сетö, сiдз висисö, а знахаркаыслöн чужöм-мыгöрыс сьöлöмöдз йиджис.

Мороссэс сылöн вылынöсь, кыдз подушка угöввез, синнэс гырисьöсь да сьöдöсь, дзарнитас тэ вылö — топ кöдзыт ваöн койыштас; серöмтчас — öм тырьяс веж только видзö — пиннес чисто золотöйöсь. Только мылякö öмсис самогон дук нырö вачкö. Но сiя не беда... А каджыс!.. Ой-ёй-ёй! Öнi только вежöртi, мыля менам соседö, Туригум Олёшыс, одз асыввезнас Паладьыс керку дынсянь гортас локтö. А кöр сылiсь юалан, дак шуас: «Вуграсьны тай ветлi».

Дак вот, Паладьыс оськöвтiс мелань, мигнитiс шульга синнас да юалiс:

— Кыным лун бессэс тэнчит пиннетö кеслöны?

— Кык лун, — ештi только паныт горöтчыны, кыдз ныр одзам сiя вайöтiс серебрянöй поднос да и шуö:

— Еныс жертва корö. Каждöй лун понда джын сотня.

Ме сетi деньгасö. А сiя мороссэз бердас ыжмитiс менчим юрöс и пондiс чертитны анöс, а ачыс ныр увтас шушкö: «Долытжык ни лоö, долытжык ни лоö». И меным быль долытжык лоис, пельö нельки шоналiс морос бердас и сысянь шонытыс визывтiс быд жилаöттям. Паладьыс малыштiс юрöс и медбöрья кыввесö висьталiс горöн:

— Пиньтö шедтыны колö, сыбöрын шёлковöй трепичö каттьыны да сiсьмöм мыр вужжез коласö дзебны. — Анöс эшö öтпыр кресталiс да содтiс: — Ен тэкöт.

Меным сэтшöм долыт вöлi, что век бы юрöс эг вöрзьöт сы морос вылiсь. Сэсся гусьöник дзарнитi Паладьыс синнэзö и гажöн петi керкусис.

Кык оськöв, натьтö, эг кер, перво ан кузям, сыбöрын юр кузям дзик кинкö зорöн öбыртiс... Сэк вöлись быдсöн вежöртi: и медбöрья кыввесö знахаркаыслiсь и деньгаö йылiсь, кöдö сылö сетi. Вир петтöдз лöгаси, нельки пиннезö дугдiсö висьны. Бертi, осьтi ыбöссö и порог сайсяняс горöтчи:

— Ах тэ, ведьма, а кин, мыся, пиньöс шедтас?! Паладьыс утка моз локтыштiс паныт, киэзнас тасалiс ыбöс косяккесö, волькыт каджсö бергöтiс мелань и пондiс пöтласьны-ваксьыны. Кöр серавны дугдiс, синкыммесö лэбтiс да нёштöма эд видзöтiс ме вылö:

— Дур-рак тэ, шуö. Конечно, доктур!

Ачыс, батя, клоп только пöдналiс ыбöссö. Ме сiйöн сорöн, ойзöмöн, иньдöтчи больницаö.

А тi шуат, что тöдiссес оз кужö лечитны.

Вот тiянлö и тöдiсь Паладь! Не сiя дак öнöдз бы маитчи пиньнам.

 

ГОРТÖ

 

I

 

Ар. Ойланьсянь букайтiс зэр сора лэчыт тöв. Стройконтораын öшыннэз дзик горзiсö. Ны вывсянь быгыльтчисö-рудзалiсö гырись ва воттез.

Пызан сайын пукалiс русöй юрсиа, вылын кымöса Алексей Шутёмов, техник-строитель. Сiя мымда бы эз видзöт öшынас, некыдз тöдвылас эзö усьö колана кыввез, медбы начальниклö гижны докладнöй записка. «Да эшö эта умöль погоддяыс, зэр, нять — вир сувтчö, юр вем откажитчö думайтны», — нервничайтiс Шутёмов. Сiя шумöн вештiс одзсис бумага листтэз, чапкис чернильнöй прибор вылö ручка и кыкнан кинас кутiс кымöссö.

Строительнöй техникум кончитöм бöрын Шутёмов эстöн уджалiс не аслас специальность сьöртi. Сылö висьталiсö, что кык месяц бöртi вежас техник строительöс, кöда петас пенсия вылö. Но чулалiс джын год ни, а Шутёмов сё эшö контораын стул нырыштö. Сылöн сьöлöм ни пондiс гудрасьны быдкодь докладнöйезсянь да справкаэзсянь, а аслас удж бердö эшö эз на кутчисьлы.

Дзуртöмöн оссис кабинетiсь ыбöс, и Шутёмов пеллез дынöдз локтiс виа голос:

— Алёша, председатель дынö.

— Мый? — чепöссис Шутёмов и лэбтiс юрсö.

Осьтöм ыбöс одзын сулалiс гöрд юрсиа нывка. Сылöн краситöм синкыммез увтсянь дзуз видзöтiсö гöгрöса зелёнöй синнэз и лукавöя сералiсö малина рöма тырппез.

— А-а, — лöгöн горöтчис Шутёмов, — часöт локта.

Сiя сюйис бумагаэсö пызанö и тэрмасьöмöн пырис кабинетö.

— Подшефнöй колхозö колö ветлыны, — шуис начальникыс. — Тöн председательыс звонитiс, ферма пö колö механизируйтны. Тэ он откажитчы отсавны?

— Верма ветлыны, — паныт горöтчис Шутёмов и рад сьöлöмöн петiс кабинетсис. Эд сылö сетiсö первöй заданнё аслас специальность сьöртi. И кытöн? Аслас роднöй колхозын. Эта юöрыс лэбтiс сылiсь настроеннё и сы коста жö чепöльтiс сьöлöмсö.

Ашынас погоддя мичамис. Алёша Шутёмов иньдöтчис колхозö подöн. Сiя мунiс ыб кузя. Чожа мыйись пондiс югдыны, а кöр мыччисис шондi и му вылö сидзисö сылöн медодзза югöррез, Алёша пондiс сьывны. Öткоста песня шыэзкöт юрас жагöника пондiсö уявны думаэз, кыдз сiйö панталас роднöй посад.

Алёша ачыс эз казяв, кыдз сибöтчис аслас чужанiн дынö. Керöс вылын сийöсöн пукалöны керкуэз. Посад шöрас пыкö небосö кресттöм каменнöй вичку. Öтмöдöрсянь посадö котöртöны сьöрсьöн-бöрсьöн телеграфнöй да высоковольтнöй столббез. А ылынжык видззез коласöт визывтö Иньва ю.

Алёша сувтчис. Дыр видзöтiс аслас роднöй местаэз вылö.

«Кин эз вовлы татчö, то оз и тöд бытшöмика коми край», — думайтiс сiя аскежас.

Паськыт да пыдын Иньва сотня километрся унажык юкталö ловья ваöн видззез да вöррез. Не öтiк векöн, кыдз добрöй уджалiсь, Иньва аслас долинаись мусö керис плодороднöйöн, мууджалiсьлö сетiс нянь, турун и счастье. Гожумнас сiя голубöй, сöстöм, быдсöн олан вуджöртчö сыын. Мымда сiя аслас кузь векын адззылiс быдкодь олансö, вöлi счастьелöн и горелöн немöй свидетельöн. Революция вотöдз конечтöг кылöтiс отирлiсь курыт синва. Öнi Иньва гöгöрын паськалö удж да счастье йылiсь гажа песнялöн говк.

Эна думаэзöн Алёша Шутёмов сибöтчис керку дынö, кайис тöдса посöдзö и пырис керкуö.

Керкуись хозяин, Кирья дед, крöмликтöмöн ляшмöвтiс Алексейлö паныт.

Сiя дыр видзöтiс пöрись синнэзнас и юалiс:

— Кин тэ? Эг эд, кöвдöм, шыыт сьöртi тöд.

Шутёмов оськöвтiс одзлань, матöжык пызан дынö, и горöтчис:

— Но, деду, буржыка ме вылö видзöт, поди тöдан.

Кирья öтнёж и мöднёж видзöтiс, сыбöрын китш-китш серöмтчис и киэсö павдöтiс:

— Вот, кöвдöм, вот Якуня Ваня, да Öлексей тай вöлöма! Тэ ловья? А ми тэнö мöд светас ни лыддим. Гришка Грачёв юöр вайис, что целина вылын геройскöя юр пуктöмыт. Ай да шельма, мый кузя нюжалöмыт. Старуха, кылан, Варанымлöн зоныс мöдiк светiсь локтiс.

Ужнайтöм бöрын Шутёмов видзöтiс и адззис, что керкуын эмöсь виль предметтэз. Пöлать кытчöкö öшöм, комыс торйöтöма заборöн, сы бердын сулалö варшавскöй кровать, джоджын половиккез, угöлын радиоприёмник.

Старик вежöртiс, что Алёша нёджжалö керкусö, и горöтчис:

— Буржыка пондiм овны. Нянь-квас бытшöм да и деньга лоис. Дед Кирья висьтасис, что виль картаэз строитiсö, клуб лэбтiсö, электричество сотчö. Но öтiк-мöдiк эшö уна оз тырмы. Том отир некыдз оз вермы гортын öшшыны. Сё бы кытчöкö мунöны. А вот пондасö, кöвдöммез, бöр гортö бертны готовöйыс вылö.

— Вот тэ тожö пышшин. Му бердiсь пельдiн, писарьö пуксин. А колхозö колöны том киэз, грамотнöй отир. Быдкодь машинаэз колхозаным сотняся унажык, а уджавны нiйöн некинлö.

Водiсö узьны.

Кирья дед гор вывсянь эшö пондöтiс басни:

— Öлексей, цыганкасö, поди, тöдлiн? Дак вот, чожа тэнат мунöм бöрын кулiс. Царство сылö небеснöй. А кулiкас пö висьталöма, что Марина сылö не внучка, сиротаöс позйöтöма. Ме думайтi жö, мыся, нывкаыт не цыганскöй родiсь.

Алёша, кöр кылiс этö баснисö, дрöгнитiс и гöрдöтiсö пеллес. Сьöлöмсö пидзыртiс кытшöмкö тöдтöм шогöт. Синнэз одзас, кыдз небытик бус пыр, мыччисис лöзсина Марина.

Алёша дыр эз вермы онмöссьыны. Тöдвылас усис быдсöн некузь оланыс. Первöй любитöм и первöй испытаннёэз...

Война вотöдз цыганскöй таборись кольччис öтiк убогöй инька овны посадö. Мыля сiя кольччис аслас соплеменниккез сьöрись — некин эз тöд. Нiя кыкöн нылочкакöт олiсö неыджыт пенсия вылын. Цыганка вöлi добрöй да ласковöй, орслывлiс гитараöн тöдтöм мелодияэз да асмознас сьылiс цыганскöй песняэз.

Но отир сылiсь полiсö, нимкодялiсö колдунняöн, мыля ворожитiс картiэзöн и кужис сувтöтны дойдöм местаись вир.

Нылочка, кöдö цыганкаыс шуис Маринаöн, синнэз одзын быдмис боёк да вежöра. А сёрöнжык, кöр сiя пондiс велöтчыны кыкьямысöт классын, лоис стройнöй да бытшöм. Зонкаэз, кöдна сыкöт велöтчисö öтiк классын, гусьöн видзöтыштлiсö сы вылö и старайтчисö, медбы Маринаыс ныкöт дружитiс.

Öкмысöт классын велöтчис Гриша Грачёв. Сiя асьсö лыддис медумнöйöн, медбытшöмöн и медвына зонкаок. Мöдiккез вылö сiя видзöтiс кыдзкö кымöс увтсянь, косöйöн, часто ошшасис, что нывкаэз сы бердö асьныс лякасьöны.

Кыдзкö перерыв коста Гриша Грачёв пондiс ошшасьны: вот пö видзöтö, кыдз цыганкаыс нывкöт понда дружитны.

Уроккез бöрын Марина иньдöтчис гортас. Гриша Грачёв вöтiс нывкасö, крепыта ыжмитiс ас бердас и зонкаэз син одзын мöдiс окавны сiйö. Эта коста Гриша пельпон вылö водiс крепыт ки и вынöн орöтiс Марина бердiсь. Эта вöлi Алёша. Сiя вирдыштiс синнэзнас Гриша вылö и горöтчис: «Эн вöрöт!»

Марина дзар керис Алёша вылö, но шы эз сет.

Сэксянь Алёша да Марина сьöлöммезын öтпыр усьöм бичирок сё буражык öзйис. Нiя öтлаын керлiсö уроккез, каникуллэз коста уджалiсö колхознöй фермаын, велöтчисö ысласьны конёккез вылын, орсны гитараöн.

Казявтöг лэбзисö эшö кык год. И бöра локтiс гажа тулыс. Кончитiсö шöрöт школа. Алёша и Марина первуись пукалiсö югдандорöдз öшын увтын скамейка вылын.

Алёша пондiс уджавны строительнöй бригадаын, Марина — телятницаöн.

Строителлезлöн бригадир, Алёшалö мамыссянь роднöй дед — Кирья, морт строгöй, но добрöй. Сiя, кыдз роднöй ай, велöтiс аслас профессияö том отирöс. Эта бригадаын Алёша уджалiс кык год. Сылö гленитчис эта уджыс.

Алёша и Марина пантасьлiсö почти быд рыт. Удж бöрын сёрöдз пукавлiсö Иньва ю дорын, баитiсö одзланься олан йылiсь, велöтчöм йылiсь и кöсйисисö öтамöдныслö век любитны.

Гриша Грачёв школа кончитöм бöрын шатласис городдэзын и локтiс бöр посадö. Эта коста Алёшалö доверитiсö ни неыджыт строительнöй бригада. Шутёмовлöн бригада пондiс строитны телятник. Нiя кöсйисисö сiйö лэбтыны месяцöн одзжык. Но чожа вежöртiсö, что фундамент понда оз тырмы цемент. Сэк Гриша Грачёв, кöдö примитiсö уджавны бригадаас, висьталiс, что сiя тöдö, кытöн эм цементыс, мед только вöлi автомашина.

Ашынас Гриша ошшасис, что сылö цементсö кöсйöмась мöдiк колхозын, но только сыбöрын нылö ковсяс сетны шифер.

Алёша дзарнитiс Гриша вылö и чорыта горöтчис:

— Только медбы вöлi керöма закон сьöртi.

— Эх, Алёша, тэ сё эшö меным он верит, вунöт ни челядься бöбалöмсö, — паныт видзис сiя ответ.

Рытнас Грачёв заводитiс машина, и нiя кыкöн Алёшакöт мунiсö соседньöй колхозö. Цемент, алебастр да мöдiк строительнöй материал куйлiс важ гунаын.

— Колiс перво явитчыны правленнёö, — горöтчис Шутёмов, кöр локтiсö гуна дынас.

— А мыйлö? — дивуйтчöмöн паныт шуис Грачёв. — Кладовщикыс меным сiдз и висьталiс: вермат, шуö, юасьтöг грузитны. Мийö эд огö гусясьö, разрешеннё кладовщикыс дынын... — и кутчис куль бердö.

— Не, норовит грузитны, ме сёжö ветла правленнёас, а тэ видзчись эстöн.

Правленнёсис Шутёмов некинöс эз застанит. Сыбöрын мунiс кладовщик дынö да юалiс разрешеннё йылiсь. Мöдыс нельки синнэсö барöтiс и шуис, что сiя первуись кылö этö баснисö.

Сы коста Грачёв грузитiс цементсö вит куль да только мöдiс заводитны мотор, кыдз сэтчö, ыб вывсянь бертiкö, локтiсö председатель да бригадир. Но и пондiсö юасьны: кысянь пö тiйö, да кин тшöктiс цементсö гусявны.

Грачёв быдöс пыкис Шутёмов вылö.

Ашынас горт деревняаныс быдöнныс ни тöдiсö «гусясьöм» йылiсь, и, конечно, медодз кылiс Марина.

Не етша павкис сэк Алёшалö. Перво сiйö чапкисö бригадирись, сэсся видöв-керисö комсомольскöй собраннё вылын. Пондылiс жö перво дорйисьны, да разь веритасö. «Ась, — думайтiс Алёша, — лишь бы Маринаыс сiйö вежöртiс». Собраннё бöрын мöдiс сылö быдöс висьтасьны сiдз, кыдз вöлi, но кöр аслас выступленнёын Маринаыс шуис: «Гусясьöм понда вашöтöны комсомолiсь», Алексейлiсь вывтырсö дзик пым ваöн заваритiс. Сiя чепöссис местасис и уськöтчис öтöрö, досповна эз и кывзы, мый эшö баитiсö, кытшöм решеннё примитiсö.

Алёша кык рыт сьöрна пукалiс Марина öшын увтын скамейка вылын, корис сiйö, медбы висьтавны быдöс, мый шогмис, но нывка эз пет. Сэк Алёша босьтiс котомка и мунiс аслас роднöй посадiсь. Год уджалiс целиннöй крайын, сыбöрын кончитiс строительнöй техникум.

Шутёмов мунöм бöрын Гриша керис быдöс, медбы сылö веритiс Маринаыс, баитiс, что любитö сiйö, кöсйисис сы вылын гöтрасьны, а медбöрын лэдзис басни, бытьтö Алёшаыс шедöм авария увтö Казахстанын и вийсьöм. Но Марина сылö эз верит. Мымда бы эз пессьы Грачёв, а нывкалöн сьöлöмыс вöлi кын сы дынö.

 

 

Шутёмов, кöть и дыр эз вермы онмöссьыны, саймис первöй петуххез китсасьöмсянь.

Завтрак бöрын, кöр Кузьма мыс сайсянь шондiлöн югöррес рöмсьöтiсö асыв ладорсö, Алёша пасьтасис.

Старик видзöтiс Алёша вылö и китшкöмöн серöмтчис:

— Ай да Якуня Ваня, быль кыдз сира пожум нюжалöмыт. Правленнёö, шуан, мунан? Мун, мун, детина. Ас синнэзнат быдöс нёджжав. Эттшöм мыгöрнат только и строитчыны. А пызан сайын пукавтöн рушман, детина.

Шутёмов мунiс посад кузя. Медодз, мый усис сы синнэз вылö, вöлiсö виль керкуэз, стройнöйöсь, крепытöсь, проекттэз сьöртi строитöмöсь. Керкуэзлöн гырись югыт öшыннэз гажöна нёджжасисö асывся шондi вылö. Посад шöрын сулалö кыксувда керку — колхозлöн правленнё.

Одзжык сiя эз вöв. Ордчöн челядь сад, а ылынжык ― виль клуб. Быд керку дын, разьсьöм стыннэз да йöррез туйö, виль палисадниккез. Эта вильыс гажöтö син, и Шутёмов дивуйтчис, кытшöм любовнöя и бытшöма быдöс строитöма. Но и кутiс сiйö вöвлытöм öбида, что этö керисö мöдiккез, а не сiя. А öнi сiя локтiс аслас роднöй посадö кыдз чужöй, кыдз шефствующöй организациялöн представитель, юасьны, кытшöм нуждаэз роднöй колхозлöн, роднöй отирлöн, мыйöн колö отсавны.

«Ме шеф, шеф...» — лöгöн шувлiс аслыс Шутёмов и видiс мортöс, кöдалö сетiс кыв техникум кончитöм бöрын уджавны стройконтораын, видiс асьсö сы понда, что эз мун уджавны колхозö назначеннё сьöртi.

Шутёмов сибöтчис правленнё дынö, недыр сулалыштiс посöдз дынын. Синнэз вылас усис передовиккез доска вылын нывкалöн тöдса ласковöй чужöм, кöда видзöтiс сы вылö фотокарточка вывсянь. Шутёмовлöн сьöлöмыс частожык пондiс токöтны. И зонка, кузя оськалöмöн, деревня пöлöн доль иньдöтчис фермаэзлань.

Кöр сiя кайис дояркаэзлöн краснöй уголок посöдзö, сьöлöмыс эшö öддьöнжык пондiс пессьыны.

«Кыдз панталас менö Марина?» — Эта думаыс спокой оз сет Шутёмов л о.

Керкуын некин эз вöв. Только öшынподушка вылын чöскыта узис пöт кань.

Шутёмов мунiс дворö. Сэтчин кык лёдзöн сулалiсö мöссэз. Нырö вачкис парнöй йöлöн. Мöссэз кыдз бытьтö дивуйтчöмöн видзöтiсö тöдтöм морт вылö и нюжöтiсö сыланьö чуккезнысö.

Шутёмов мунiс одзлань. Эз ешты керны кык оськöв, кыдз пондiс кывны небытик, ласковöй-ласковöй женскöй голос. Шутёмов саясис столб сайö.

А морт одзлань баитiс, кисьтiс сьöлöмсянь ласковöй кыввез:

— Дона тэ менам, басöк чужöм тэ менам. Тэ разь меным он верит? Ме тэнö медöддьöн любита. — И эна кыввез бöрын кылiс чöскыта окыштöм.

Алёшалö недолыт лоис сысянь, что лоис любитiссез коласын свидетельöн. Сiя мöдiс гусьöник петны тамбурöт, но чужйисис куран бердö и шумöн брякнитчис кормушка вылö. Эта коста кöрым вылiсь пуркйыштiс-лэбзис воробей табун. Кормушкаэз сайсянь мыччисис нывка. Сiя киас видзис кепись ыжда клевер турун. А сы одзын сулалiс гырись сюрреза мöс и нюлiс нывкалiсь киэсö.

— Марина! Марина! — мымда вын горöтiс Алёша, нельки картаыс чаналiс.

Марина сулалiс местаас и видзöтiс горöтлiсь морт вылö. Сылiсь юрсö вевттис веж клеткаа зелёнöй чышьян, кöда увтсянь нильдiс воöм рудзöг рöма юрси.

Шутёмов котöртiс Мариналö паныт. Мöдыс только и ештiс горöтчыны: «Алёша», кыдз Шутёмов ыжмитiс сiйö морос бердас. Марина чорыта видзöтiс Алёша вылö и мездöтчис сы бердiсь. Пырисö керкуö. Марина юалiс, кысянь пö чужин. Эстöн басни ны коласын орис. Дыр мыйись Шутёмов юалiс нывкалiсь, кыдз сiя олö. Марина öтiк кылöн видзис ответ, что олö, кыдз быдöнныс. Сэсся, медбы вежны баснилiсь темасö, пондiс баитны, что не öтiк лун ни видзчисьöны шеффезöс, но некин оз мыччись. Вот месяц ни кыдз кöсйисисö отсавны сувтöтны «ёлочка». И медбы буржыка вежöртiс Шутёмов, Марина содтiс:

— Мöс высьтан виль аппарат.

Эна кыввез бöрын Шутёмовлöн гöрдöтiсö пеллез и керкуын бöра лоис шы не тöв. Дворсянь кылiс мöссэзлöн баксöм.

— Мöссэз баксöны, — горöтчис Шутёмов.

— Баксöны? Зато миян заведующöйыс сьылö. Тöн религиознöй праздникö ветлöма. Сё эшö код, и фураж ваялiссез тожö кодöсь. Кукурузнöй силос вайтöм. — Марина уськöтчис öшын дынö. Шутёмов тожö дзар керис öшынö.

Фермасянь турьялöмöн локтiс мужик, кепкатöг, юрсиыс пашмöма. Сы сьöрын табунöн локтiсö нывкаэз. Марина пондiс нюжласьны-ваксьыны:

— А, шедiн. Вот ми тэныт мыччалам святöй угодниксö!.. Мужик кылö суськисис:

— Нывкаэз, ме только сто грамм, быль только сто грамм. Табунöн пырисö керкуö. Нiя вöлiсö сэтшöм лöгöсь, нельки эз казялö

Шутёмовсö. Марина перыта сибöтчис пызан дынö. Сылöн чужöмыс гöрдöтiс, синнэс лоисö эшö лöзжыкöсь. Мыгöр стройнöй, кыдз пöлян. Сiя не тэрмасьöмöн, но плавнöя босьтiс юр вывсис чышьянсö. Юрсиыс шёлкöн визывтiс гöгрöса пельпоннэс вылö. Шутёмов синнэз одзын Марина сразу лоис эшö бытшöмжык и любöйжык.

— Пуксьы татчö, код юр, — Марина мыччалiс табуретка вылö. — Пондас тэнö судитны коммунистическöй удж званнё понда пессиссезлöн коллектив. Люся, гиж протокол.

Дояркаэз строгöя судитiсö фермаись заведующöйсö и öтiк öмись висьталiсö корны правленнёöс, мед сiйö вашöтiсö фермасис, что нiя и сытöг вермасö уджавны.

Грачёв жагöника чеччис табуретка вылiсь. Сылöн синнэс пантасисö Шутёмов синнэзкöт.

— А-а, Алёша, друг! — чепöссис Шутёмов дынö Грачёв и мöдiс здоровайтчыны, но вежöртiс, что Шутёмов оз сет кисö, и öмсö нёштöма пиньöвтiс, лöгöн вирдыштiс гудыра синнэзнас да горöтчис:

— Бертiн. Бöра сувтiн менам туй вылö поперёк. Ми эшö тэкöт пессям! — и петiс керкусис.

Дояркаэз и ныкöт öтлаын Шутёмов мунiсö осьтны силоснöй яма.

Рытнас Алёша Шутёмов пантасис Маринакöт. Ны коласын, сiдз жö, кыдз и фермаын, басни бытшöмика эз шогмы. Только эта пантасьöм бöрын Шутёмов эшö öддьöнжык пондiс тöждiсьны, дзик сьöлöмас öгралiсö тöдтöм бичироккез. Алёша Шутёмов нёль лунöн заданнё тыртiс, öткоста видзöтiс колхознöй хозяйство и торьясьöм чувствоэзöн бертiс городö.

Сэксянь, кöр Шутёмов ветлiс роднöй посадö, мыйкö дзик эз понды тырмыны. Сылiсь мороссö нырыштiсö кык неöткодь чувство. Öтiк чувствоыс тшöктiс бертны гортö, роднöй колхозö, му дынö. Сы юрись эзö петö кыввез: «Му бердiсь пельдiн, писарьö пуксин... А кин пондас вильсасö лэбтыны, ми, пöриссес?» Шутёмов чуть да и касьтывлiс ассис другсö, Ваня Маеговöс, кöда эшö школаын велöтчикö мечтайтiс, планнэз керис колхозлiсь экономика лэбтöм йылiсь. Кытшöм гордöя сiя баитiс: «Вежöртан, Алёша, Иньва ю сайись мусö бергöтам, удобритам и кукуруза быдтам не умöльжыкö кубанскöйся». И былись, кыдз сiя думайтiс и баитiс, сiдз öнi и лоö. Колхозниккез сылö сетiсö ыджыт доверие — бöрйисö председательöн. И Ваня Маегов нельки шы эз сет Шутёмовлö сы кöркöся ошибка йылiсь. Алёша эз вунöт и сылiсь кыввез: «Шеффез, конечно, бур дело, но эшö буржык бы вöлi, ежели бы тэ гортö локтiн».