Канон, творение Иоанна Дамаскина. Глас 4, Песнь 1

Ирмос: Мо́ря чермну́ю пучи́ну / невла́жными стопа́ми/ дре́вний пешеше́ствовав Изра́иль, / крестообра́зныма Моисе́овыма рука́ма / Амали́кову си́лу в пусты́ни победи́л есть.

Канон воскресен

Возне́слся еси́ на пречи́стем дре́ве кре́стнем, / на́ше отпаде́ние исправля́я, / е́же на дре́ве исцеля́я всегуби́тельство, Влады́ко, / я́ко Благ и Всеси́лен.

Во гро́бе пло́тски, во а́де же с душе́ю, я́ко Бог: / в раи́ же с разбо́йником, и на Престо́ле был еси́, Христе́, со Отце́м и Ду́хом, / вся исполня́я Неопи́санный.

Другий канон Крестовоскресен.

Исцели́л еси́ сокруше́ние челове́чества, Го́споди, / Боже́ственною Твое́ю Кро́вию обнови́вый то: / и сокруши́л еси́ си́льнаго в кре́пости, / и́же дре́вле сокруши́вшаго Твое́ созда́ние.

Ме́ртвых воста́ние, умерщвле́нием был еси́: / кре́пость бо отъя́тся умерщвле́ния, бра́вшися с Жи́знию ве́чною, / Иже все́ми влады́чествующу воплоще́нному Бо́гу.

Ин канон Пресвятей Богоро́дице,

Сотрясо́шася лю́дие, смято́шася язы́цы, / ца́рствия же держа́вная уклони́шася, Чи́стая, от стра́ха рождества́ Твоего́: / прии́де бо Царь мой, и низложи́ мучи́теля, / и мир от тли изба́ви.

Жили́ще Свое́, живы́й в вы́шних, / к челове́ком соше́д, освяти́ Христе́, и непоколеби́мо яви́: / Еди́на бо по рождестве́ де́вства сокро́вище, / Зижди́теля ро́ждши пребыла́ еси́.

 

Песнь 3

Ирмос: Весели́тся о Тебе́ Це́рковь Твоя́, Христе́, зову́щи: / Ты моя́ кре́пость, Го́споди, / и прибе́жище, и утвержде́ние.

Канон воскресен

Дре́во живо́тное, мы́сленный и́стинный виногра́д, / на Кресте́ ви́сит, всем источа́я нетле́ние.

Яко вели́к, я́ко стра́шен, я́ко а́дово низло́жь шата́ние, / и я́ко Бог нетле́нен, ны́не пло́тски воскре́се.

 

Другий канон,Крестовоскресен

Ядом испо́лнены в мя змий зу́бы вонзе́, Спа́се, / я́же, Вседержи́телю Влады́ко, гвоздьми́ рук Твои́х сокруши́л еси́: / я́ко несть свят во святы́х, па́че Тебе́, Человеколю́бче.

Ви́ден был еси́, Человеколю́бче, во́лею во гро́бе мертв, Животво́рче, / и врата́ разве́ргл еси́ а́дова, я́же от веко́в душа́м: / я́ко несть свят во святы́х ра́зве Тебе́, Человеколю́бче.

Ин канон, Пресвятей Богоро́дице,

Очища́ется челове́ков существо́, / Тобо́ю присовоку́пльшееся нестерпи́мому Боже́ственному Огню́: / я́ко сокрове́нный, Пречи́стая Де́во, в Тебе́ Хлеб испе́кшееся, / Иже и Тебе́ неврежде́нну сохра́ншему.

Ка́я сия́ я́же вои́стинну близ Бо́га; / я́ко превозше́дши вся а́нгельския чи́ны, / еди́на добро́тою де́вства, / я́ко Ма́ти сия́ющи Вседержи́теля.

Песнь 4

Ирмос: Вознесе́на Тя ви́девши Це́рковь на Кресте́, / Со́лнце Пра́ведное, / ста в чи́не свое́м, / досто́йно взыва́ющи: / сла́ва си́ле Твое́й, Го́споди.

Канон воскресен

Возше́л еси́, стра́сти моя́ исцеля́я, на Крест / стра́стию Пречи́стыя пло́ти Твоея́, / в ню́же во́лею обле́клся еси́. / Те́мже Ти взыва́ем: / сла́ва си́ле Твое́й, Го́споди.

Безгре́шнаго смерть вкуси́вши, / Животворя́щаго Те́ла Твоего́, / досто́йно, Влады́ко, умертви́ся: / мы же вопие́м Ти,/ сла́ва си́ле Твоей, Го́споди.

 

Другий канон,Крестовоскресен

Взако́нен сый Изра́иль, / Тебе́, Христе́, взако́нившаго Бо́га не позна́: / но я́ко беззако́нника, законопреступа́я, на Кресте́ пригвозди́, / и́же законоположе́нию недосто́йный.

Обоже́на Твоя́, Спа́се, Душа́, / а́дова сокро́вища плени́вши, / я́же от ве́ка совоскреси́ ду́ши: / живоно́сное же Те́ло всем нетле́ние источи́.

Ин канон, Пресвятей Богоро́дице,

Поживе́ с челове́ки, ви́димь быв Неви́димый, / во зра́це сый Непостижи́маго Божества́, / и вообра́жься из Тебе́, Отрокови́це, в чужде́е, / ве́дущих Тя, Чи́стую Богома́терь, спаса́ет.

Прия́т в веще́ственне Де́ва Невеще́ственнаго, в прича́стии вещества́, / Младе́нца от Нея́ бы́вша. / Те́мже во дву существу́, Еди́н познава́ется / плотоно́сец Бог, и Челове́к Пресу́щественный.

Песнь 5

Ирмос: Ты, Го́споди мой, Свет в мир прише́л еси́, / Свет Святы́й, обраща́яй из мра́чна неве́дения / ве́рою воспева́ющия Тя.

Канон воскресен

Ты, Го́споди, к земли́ ми́лостивно соше́л еси́: / Ты возне́сл еси́ па́дшее челове́ческое существо́, на дре́ве воздвиза́емь.

Ты взял ми еси́, Христе́, прегреше́ний осужде́ние: / Ты разруши́л еси́ боле́зни сме́ртныя, Ще́дре, Боже́ственным воскресе́нием Твои́м.

 

Другий канон,Крестовоскресен

Прия́т Тя всего́ усты́ ад безу́мный: / на Кресте́ бо пригвожде́на Тя ви́дев, / копие́м прободе́на, бездыха́нна, / Жива́го Бо́га про́ста вменя́ше челове́ка. / Разуме́ же искуси́вый кре́пость Твоего́ Божества́.

Разруше́ный, Человеколю́бче, Храм Твоего́ Телесе́, / гроб раздели́вый и ад нево́лею о́ба суда́ истязу́еми суть: / ов у́бо святы́х Твои́х ду́ши, / телеса́ же други́й соотсыла́юще, Безсме́ртне.

Ин канон, Пресвятей Богоро́дице,

Плоть от кро́ве Де́вственныя прия́л еси́, Христе́, / Безсе́менну, Пречи́сту, Ипоста́сну, / и слове́сну и у́мну, одушевле́нну, / де́йственну, хоте́тельну, / Самовлады́чну и Самовла́стну.

Мучи́телей ра́зум Де́вственное посрами́ чре́во: / Младе́нец бо я́зву а́спидную душегу́бную испыта́ руко́ю, / и отсту́пника го́рдаго низло́ж, / ве́рных под но́зе покори́.

Песнь 6

Ирмос: Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися / ра́ди ми́лости от ребр Твои́х / исте́кшею Кро́вию.

Канон воскресен

Возше́л еси́ на Крест, си́лою препоя́сався, / и сопле́тся с мучи́телем, я́ко Бог, с высоты́ свергл еси́, / Ада́ма же непобеди́мою си́лою воскреси́л еси́.

Воскре́сл еси́ блиста́яйся кра́сный из гро́ба, Христе́, / и разгна́л еси́ вся враги́ Боже́ственною си́лою Твое́ю, / и вся, я́ко Бог, весе́лия испо́лнил еси́.

 

Другий канон,Крестовоскресен

Отве́рзе горта́нь свой ад, и пожре́ мя, / и ду́шу разшири́ безу́мный: / но Христо́с соше́д, возведе́ жизнь мою́, я́ко Человеколю́бец.

Поги́бе сме́ртию смерть, / уме́рый бо воскре́се, нетле́ние мне да́руя: / я́влься же жена́м провеща́ ра́дость Безсме́ртный.

Ин канон, Пресвятей Богоро́дице,

Дре́вле у́бо прельсти́ мя змий, и умори́ мя, / прама́терию мое́ю Евою: / ны́не же, Чи́стая, Тобо́ю созда́вый мя из истле́ния воззва́.

Бе́здна Тя бе́здну неизрече́нно, / благоутро́бия Отрокови́це, избра́нную показа́ чуде́с: / и́бо из Тебе́ мо́лниею Божества́, / би́сер Христо́с возсия́.