Коми кывлöн аслыссикаслун

Класс

Сыктывкар 2012

На форзац

Коми сёрни

мелі, мыла.

Парма ёль моз

сёлякылö.

Сöстöм ёль моз

Сійö кывтö

Парма шöрöд,

видзьяс вывті.

Парма ёль моз

Йöзлы колö.

Олö йöзкöд

Öти олöм.

А.Лужиков

Колана пасъяс

JJ - сёрнитам (нывкалöн да зонкалöн воча юръяс)

Т - тöдмав

& - кывчукöр

С – синоним

А – антоним

О – омоним

² – велöд наизусть

G – босьт тöд вылö

: – вöч содтöд удж

– грамматика

– выль тема

H – гортса удж

К-А – кыв артмöм

¯ – енби пестан удж (творчествоа удж)

ﯕ - туялана удж (знак дороги или лупа)

? – вочавидз юалöм вылö

П – проект

Ö – öтувъя енбиа удж (КТД)

ВЫЛЬ ВЕЛÖДЧАН ВОÖН!

… удж. Лыддьы да гöгöрво кывбурсö. Гöгöрвоöд кывбурлысь коймöд строфасö. Вочавидз юалöмъяс вылö.

Турун пöвстті келысь,

Мича вöччöм пелысь

Шöпкöдчö да, кылö,

Гусьöникöн сьылö.

Турун ытшкöм бöрын

Кушмöм видзьяс шöрын,

Видзьясбокса вöрын

Öвтö арся кöрöн.

Видзöд, видзöд, видзöд

Кутшöм арыс мича –

Уна-уна рöма,

Озыр, зарни сьöма.

Рис. Осенний пейзаж. Скошенный луг, лес. На переднем плане гроздья рябины.

А.Лужиков

? Кутшöм рöмъясöн пöртмасьö арыс?

Кутшöм кöрöн öвтö арся вöрын?

Кутшöм кывъясöн гижысьыс ловзьöдö арсö?

С Корсь кывбурысь сетöм кывъяслы синонимъяс. Вöдитчы Л.М.Безносиковалöн, Е.А.Айбабиналöн, Н.К.Забоевалöн «Коми синоним» кывчукöрöн.

Вöччöм –

Видз –

Видзöдны –

Гусьöникöн –

Сьывны –

О Л.М.Безносиковалöн, Е.А.Айбабиналöн «Словарь омонимов коми языка» небöг отсöгöн корсь СЬÖМ кывлысь вежöртасъяссö. Кутшöм вежöртасын тайö кывйыс кывбурас?

… удж. Инды кывбурысь торйöдöм кывъяслысь кывсикассö. Гöгöрвоöд, мыйла тэ тадзи чайтан.

… удж. Сетöм кадакывъясысь артмöд шöркывъяс. Артмöд кывтэчасъяс. Лöсьöд сёрникузяяс, медым артмис висьт.

Лэбны Гылавны Кымрасьны Кисьмыны Пöртмасьны Вазьыны Кöдзавны Ыркавны Вежласьны Кушмыны Нярмыны

Коръяс Енэж Юсьяс Поводдя Ва Сынöд Пелысь Дзоридзьяс Градъяс Му Вотöсъяс

… удж.

Быд вогöгöрся кад вöзйö ассьыс рöм. Лэбыштіс зарни ар. Лунъяс лоöны дженьыдджыкöсь, водз пемдö, тшöкыда зэрö. Тайö каднас окота новлыны югыд рöма паськöм, медым лэптыштны ас кылöм. Арлы медъёна лöсялöны зарни рöмъяс – кольквиж да мырпом (оранжевöй).

… удж. Велöдчы сьывны «Зарни коръяс» сьыланкыв.

Зарни коръяс

Шыладыс Р.Паулслöн, кывъясыс Я.Петерслöн,

роч текстыс И.Шаферанлöн, комиöдіс Е.Козлов

1. Тайö мирас огö олö, Тайö мирас огö олö Шогтöг ми, шогтöг ми. Гожöм здук кежлö и воліс, Гожöм здук кежлö и воліс, А öні, а öні. Сьылтас: Зарни коръяс Ньöжйö гылылöны муö, Ыджыд тöлыс Найöс бергöдлöмöн нуö. Ставыс колис, Оз нин раскын кывны кöкъяс. Зарни коръяс, Кутшöм аддзанныд ті вöтъяс. 2. И мед тайö лунъяс частö, И мед тайö лунъяс частö Зэрлывлö, зэрлывлö… Ар со бара мусö койö, Ар со бара мусö койö, Мичлунöн, зарниöн.

Рис. Ноты на фоне падающих жёлтых листьев.

…удж Лыддьы да корсь тырмытöмторъяс (öшыбкаяс).

Ар

Ар. Кутшöм тэ збоя да нем тöждысьтöг пыран гожöмыслöн оланінö! Кöть яндысьыштін эськö да дзебсьыштлін на Урал сайö вежон-мöд кежлö! Видзöдлы вай гöгöр: öд абу на став быдмöгыс дасьтысьöмаöсь тэнад локтігкежлö, оз на тыдав на вылын тэнö виччысян паськöмыс. А тэ турунвиж паськöм выланыс соддзöн нин шыблалан лымсö. А мый нö вöчны байдöгъяслы, тэ думысь: найö öд абу на удитöмаöсь еджыд платтьöнысö пасьтавны? А кöчьяслы, думайтан, руд ёкмыльяс моз куйлыны еджыд прöстуня вылад? Он, ньöти тэ он думайт на йылысь, кын тэнад сьöлöмыд. Нинöм тэ он кывзысь, сöмын асьтö тöдан. Тэ нем жалиттöг талялан медбöръя мичсö сідз нин дженьыд гожöмыслысь. Ок и асныра жö тэ, войвывса ар! И енэжыд öд тэнад тшöтш зумыш, быттьö кузь тошка кöлдунъяс чукöртчöмаöсь öтилаö да дугдывтöг то öтарö, то мöдарö лэбалöны тундра весьтті, повзьöдлöны став ловъя ловсö, тшöктöны зверсö да пöткасö гуясö да позъясö пырны.

Лöсьöд ёрта сёрни ар йылысь.

Ö Дасьты да нуöд ёртъясыдкöд (шуам, орчча класскöд либö 8, 10 классаяскöд) «Арся кодзувъяс» шойччан рыт.

1. Лöсьöдöй «Арся кодзувъяс» рытлысь сценарий, бöрйöй лöсялана шылад, ворсöмъяс, нöдкывъяс. Юкöй öта-мöд костын рольяс: сценарий дасьтысь, режиссёр, рыт нуöдысьяс, сьылысьяс, жюри, видзöдысьяс. Дасьтöй козинъяс.

2. Бöрйöй да велöдöй ар йылысь сьыланкывъяс, дасьтöй петкöдчöм.

3. Мичмöдöй рыт нуöдан вежöссö зарни коръясöн, уна рöма шаръясöн.

4. Нуöдöй сьылан рытсö кык юкöнöн: öти сьыланкывйыс коми, мöдыс – роч. Бöрйöй вермысьясöс (I, II, III места да «Видзöдысьяслы сьöлöм вылö воöм сьыланкыв»).

5. Чолöмалöй вермысьясöс, козьналöй налы арся дзоридзьяс.

6. Вевттьöй пызан арся чöсмасянторъясöн да юöй тшай.

ФИНН-УГОР КЫВЪЯ КОТЫР

Шы вежласьöм – чередование Войдöр – прежде, раньше Подувкыв – язык-основа Öтласа – общий Сёрнитны велöдан небöг – разговорник Кывйитлöс – фраза Донпас – ценник Нимпас – этикетка, наименование Волысьны – дружить, общаться Нырччыны – стремиться Водзмöстчыны – проявить инициативу Öтувтчыны – объединиться Котыр – семья, организация Тöдмöдны – ознакомить Кывкöртöд – вывод Мог – цель Медшöр – главный Подулавны – обосновать

…удж. Лыддьы да гöгöрво.

Учёнöйяс чайтöм серти, финн-угор кывъя йöз войдöр овлöмаöсь öтлаын Кама да Волга юяс пöлöн Урал керöсöдз.

Кысянь локтісны Волга бассейнö важъя финно-угръяс, тайöс абу на тöдмалöма. Но учёнöйяс шуöны, мый зэв важöн финн-угръяслöн пöльясыс Асыввыв Европаö локтігöн на волысьöмаöсь индо-европейскöй, тюрскöй, монгольскöй, юкагирскöй войтыркöд.

Ёна сёрöнджык нин войтыр, коді сёрнитіс öтласа финн-угор подувкывйöн да оліс Асыввыв Европаын, кутіс волысьны лунвывсаджык иранскöй кывъя племяяскöд. Сэки финн-угор сёрниö пырис уна кыв индоиранскöй подувкывйысь.

Öні финн-угор войтырыс öта-мöдсö ас кыв вылас оз гöгöрвоны. Но эм уна öткодьлун – öти сикас структура, öткодь кыввужъяс. Шуам, коми «лым»,удмуртъяслöн «лымы», финъяслöн «лума», мариецъяслöн «лум», венгръяслöн «лом».

Уна кыв гöгöрвоана, торйöн нин нимвежтасъяс (коми «тэ», удмурт «ты», коми «ме», удмурт «мон»,коми «коді», удмурт «куд»), вöр-ва йылысь кывъяс(коми «ва»,удмурт «ву», коми «му», удмурт «му», коми «тöв», удмурт «лымы»), лыдакывъяс (коми «öтик», удмурт «одиг», эст «ȕкs», коми «сё», удмурт «сю», эст «sаtа»), мортлöн юкöнъяс(коми «син», удмурт «синь», коми «лы», удмурт «лы», коми «кыв», удмурт «кыл»).

Коми кыв пырö финн-угор кывъя семьяö и артмöдö удмуртъяскöд пермскö группа. Öні мирын ставнас 16 финн-угор кыв и войтыр. А мир пасьтала олö 25 миллион гöгöр финн-угор. Медуна лыд сертиыс венгръяс - 7 миллион, финъяс - 5 миллион, коми-зыряна – 350 000морт, коми-пермъякъяс – 150 000, удмуртъяс – 747 000.

Финн-угор кывъяслöн уна аслыссикаслун.

Öти-кö, финн-угор подувкыв вöлі агглютинативнöйöн: быд суффикс нуö ассьыс вежöртас (керка + яс(уна лыда суффикс) + ын (ина вежлöга суффикс – в домах).

Мöд-кö, öнія финн-угор кывъясын падеж лыдыс уна (венгр кывйын – 22, комиын – 16, финн да удмурт кывъясын – 15, мордва кывйын – 12 да с.в.).

Коймöд-кö, абу род категория, но эмöсь лично-притяжательнöй суффиксъяс (пи öй, пи ыд, пи ыс, пи ным, пи ныд, пи ныс).

Нёльöд-кö, ударениеыс пырджык усьö медводдза слог вылас.

Витöд-кö, этша шы вежласьöм (сов\сола).

Квайтöд-кö, кадакывъяс оз босьтны вид категория (гижны - писать и написать).

Сизимöд-кö, финн-угор кывъясын абуöсь предлогъяс, но эмöсь кывбöръяс.

… удж. «Финно-угорские и самодийские народы» краткий информационный справочник да Е.А.Цыпановлöн «Видза олан!: самоучитель коми языка» небöг отсöгöн помав таблица.

Рис. Обложка диска и самоучителя

Финн-угор кывъя войтыр	Ас ним	Ас му	Юркар	Олöны …-ын	Войтыр лыдыс
Финнъяс	Суоми	Финляндия	Хельсинки	Финляндияын, Швецияын, Роч муын Ленинград обласьтын, Карелияын	5 миллионысь унджык морт
Венгръяс	Мадьяр	…	…	…	…
…	…	…	…	…	…

…удж.Велöд коми кывлысь медшöр торъялöмъяссö.

Коми кывлöн аслыссикаслун

1. Коми кывным агглютинативнöй, сiдзкö уна суффиксъяса. Шуам, кар+ным+лöн, вокъ+яс+ныд+лысь

2. Коми кывйын уна öти слога кыв. Шуам, ю, тэ, ма, му, ва, ов.

3. Ударениеыс коми кывйын усьö медводдза слог вылас. Шуам, Менам шудлун – менам чужан му (А.П. Размыслов)

4. Коми кывйын в шыпас гласнöй водзын вежсьö л шыпас вылö. Шуам, овны – ола, сьывны – сьыла, вöв – вöлöн, сов - сола.

5. Коми кывйын эмакывъяслöн да кывбердъяслöн абу род категория. Шуам, мича ныв – красивая девушка, мича зон – красивый парень, мича ты – красивое озеро; велöдчысь - ученик и ученица.

6. Коми кывйын эм лично-притяжательнöй категория. Шуам, удж öй – моя работа, удж ыд – твоя работа, удж ыс – его, её работа, удж ным – наша работа, удж ныд – ваша работа, удж ныс – их работа.

7. Коми кывйын дас квайт вежлöг. Шуам, ёртлöн – у друга, вöрö - в лес, финнъяскöд - с финнами.

8. Лыдакывъяс эмакывъяскöд орччöн оз сувтöдсьыны уна лыдын. Шуам, дас нёль арöс - четырнадцать лет, сюрс шайт – тысяча рублей.

9. Коми кывйын кадакывлöн абу помалан да помавтöм вид категория. Шуам, гижны – писать, написать, записать, переписать, выписать.

10. Коми кывйын эм кык колян кад. Öтиыс – аддзывлi и висьтала, мöдыс –тöдмалi да висьтала. Шуам, лыдди, лыддьöма, мунí – мунöма.

11. Коми кывйын роч предлог пыдди кывбöр. Шуам, тэ йылысь, керка дорын, урок дырйи.

12. Эмакывйыс коми кывйын вермö лоны кывбердöн. Шуам, öдзöс вуг -дверная ручка, пу керка – деревянный дом.

13. Коми кывйын зэв уна сложнöй кыв. Шуам, вöр-ва, бать-мам, катшасин, турипув, енэж, кельыдлöз, аслыссяма, пырысьтöм-пыр.

Таöн коми кыв öткодь финн-угор кывъяскöд!

… удж. Лыддьы. Öткодяв кывбур юкöнъяссö. Лöсялöны-ö И.Куратовлöн да Г.Юшковлöн кывбуръясыс талунъя коми кывлы? Подулав мöвптö. Видлав кывбур юкöнъяслысь серпаса кывсö.

Тайö кылöн мукöд Гораджыка сьылас – Сё кызь сюрс пель сэки Уна буртор кылас! И.Куратов

Коми кыв! Кольöм нэмын на тэныд Уна потшöссянь кравзісны пом. А тэ сöдзöдчин, вояссö веніг, Гора юралан, важсьыс на том. Г. Юшков

¯ Ёртъясыдкöд дасьтöй проект «Коми кыв быдлунъя олöмын».

Кöнi позьö вöдитчыны коми кывйöн быдлунъя олöмын?

Пример вылö: сёян-юан ним пас (этикетка), вузасянiн нимъяс, автобусын сувтланiн юöртöм и с.в.

Мый верманнныд вöчны тi коми кыв быдлунъя олöмö пыртöм могысь?

Пример вылö: велöдны коми кыв, сёрнитны комиöн классын, юöртны роч кывъя йöзлы (бать-мамлы, ёртъяслы) коми кывлöн аслыспöлöслун йылысь, вöзйыны бать-мамлы, пöль-пöчлы гортын сёрнитны комиöн и с.в.

Дасьтöй вöзйöм школаса (сиктса) том йöзлы.

Пример вылö: «Талун сёрнитам комиöн!», «Танi позьö сёрнитны комиöн», «Ичöтик роча-комиа сёрнитны велöдан небöг» (öти лист бок вылын медся тшöкыда паныдасьлысь кывъяс да кывйитлöсъяс), «Комиа-роча донпасъяс (ценникъяс)» и с.в.

… удж. Лыддьы да орччöд удмурт да коми кывъяссö.